ހުޅުމާލޭ ދެވަނަ ފިޔަވަހިން ދިރިއުޅުމަށް ބީލަމުގެ އުސޫލުން އިތުރު އަށް ބިން ވިއްކުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން މިއަދު އިއުލާނު ކޮށްފިއެވެ.
އެޗްޑީސީން ވިއްކަން އިއުލާނުކޮށްފައި ވަނީ، ބީޗްފްރަންޓުން ދެ ބިމާއި ބީޗް ސައިޑުން ހަ ބިމެކެވެ. ބީޗް ފްރަންޓުން ވިއްކަނީ 1737 އަކަފޫޓުގެ ބިމަކާއި 1708 އަކަފޫޓުގެ ބިމެކެވެ.
ބީޗް ސައިޑުން ވިއްކަން އިއުލާނުކޮށްފައި ވަނީ:
- 1534 އަކަފޫޓުގެ ފަސް ބިން
- 1513 އަކަފޫޓުގެ އެއް ބިން
ހުޅުމާލެ ދެވަނަ ފިޔަވަހިން ދިރިއުޅުމަށް 18 ބިމެއް ބީލަމުގެ އުސޫލުން ވިއްކަން، އެޗްޑީސީން މީގެ ކުރިން ވެސް ހުޅުވައިލިއެވެ.
އެޗްޑީސީން ބުނީ މި ބީލަމުގައި ބައިވެރިވެވޭނީ 18 އަހަރު ވެފައިވާ ދިވެހިންނަށް ކަމަށެވެ. އޭގެ ތެރޭގައި 100 ޕަސަންޓް ދިވެހިންގެ ހިއްސާ އޮންނަ ކުންފުނިތަކަށް ބައިވެރިވެވޭނެއެވެ.
މި ބިންތަކުގެ ތެރެއިން ބީޗް ސައިޑުން ބީލަން ފެށޭ އަގަކީ އަކަފޫޓަކަށް 4،000 ރުފިޔާއެވެ. އަދި ބީޗު ފްރަންޓުން ވިއްކާ ބިންތަކަށް ބީލަން ފެށޭ އަގަކީ އަކަފޫޓަކަށް 4،500 ރުފިޔާއެވެ.
ބީލަމުގެ އުސޫލުން ބިން ވިއްކުމަށް ހަމަޖެހިފައިވާ މަރުހަލާތައް:
މަރުހަލާ 1: ޕޯޓަލް މެދުވެރިކޮށް ޝައުގުވެރިވެލައްވާ ބިމަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުން
މަރުހަލާ 2: އެއް ފަރާތަށްވުރެ ގިނަ ފަރާތުން އީއޯއައި ހުށަހަޅާފައިވާނަމަ އެ ބިމަކަށް ބިޑް ކުރުން
އެޗްޑީސީން ބުނީ ބީލަން ހުށަހަޅަން ޝައުގުވެރިވާ ފަރާތްތަކުން ބީލަމުގެ އުސޫލުން ބިން ގަތުމަށް އެދި ހުށަހަޅާނީ ޕޯޓަލް މެދުވެރިކޮށް ކަމަށެވެ. އެހެންވެ، ޕޯޓަލްގައި ރަޖިސްޓަރީކޮށް މިއަދުން ފެށިގެން ބީލަށް ހުށަހެޅޭނެ ކަމަށާއި އިތުރު މައުލޫމާތު އެ ކޯޕަރޭޝަންގެ ހޮޓްލައިން 1516އިން ލިބޭނެ ކަމަށް އެޗްޑީސީން ބުންޏެވެ.