ތަރައްގީވަމުން އަންނަ ކުދި ގައުމުތަކަށް އދ.ގެ ނިޒާމުގެ ތެރެއިންނާއި ބައިނަލްއަގްވާމީ ބޭންކުތަކުން އިންވެސްޓުކުރުމަށް ރައީސް ޑރ. މުޙައްމަދު މުއިއްޒު މިއަދު ގޮވައިލައްވައިފިއެވެ.
ކޮޕް29ގެ ހަވާސާގައި އޮތް ސިޑްސް ލީޑަރުންގެ ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ މޫސުމަށް އަންނަ ބަދަލަކީ ހަމައެކަނި ޚިޔާލީ ކަމެއް ނޫން ކަމަށެވެ.
އެ މަނިކުފާނު ވިދާޅުވީ، އެއީ އަހަރުތަކެއް ވަންދެން ކުރެވުނު ތަރައްގީގެ ކުރިއެރުންތައް ފޮހެލައި، ފުރަތަމަ ފަށައިގަތް ހިސާބަށް ކުޑަ ވަގުތުކޮޅެއްގެ ތެރޭގައި އަނބުރާ ގެންގޮސްފާނެ އެއްޗެއް ކަމަށެވެ.
މި އަހަރުގެ ކޮޕް ސަމިޓުގެ ޝިއާރުކަމުގައިވާ "ފެހި ދުނިޔެއަކަށް އެކުވެރިކަމާއެކު" އަކީ ހަމައެކަނި އެކުވެރިކަމަށްވުރެ އިތުރު ބާރެއް ބޭނުންވާ ކަމެއް ކަމަށާއި އެއީ ބަދަލުވުމަށް ގޮވައިލާ ގޮވައިލުމެއް ކަމަށް ރައީސް ވަނީ ވިދާޅުވެފައެވެ.
އަދި ހަމައެއާއެކު މިހާރުގެ މާލީ ނިޒާމުން ކުދި ގައުމުތަކުގެ ކުއްލި ބޭނުންތައް ފުއްދައި ނުދޭކަމަށް ވެސް ރައީސް ވިދާޅުވިއެވެ.
އެއާއެކު ރައީސް ވަނީ ތިން ކަމެއް ކުރުމަށް ގޮވައިލައްވައިފައެވެ. އެއީ
- އދ.ގެ ނިޒާމާއި، ތަރައްގީގެ ބޭންކުތަކާއި، ބައިނަލްއަގުވާމީ މާލީ އިދާރާތަކާއި، އަމިއްލަ ދާއިރާތައް އެކުވެގެން ކުދި ޖަޒީރާ ގައުމުތަކަށް އެއްބާރުލުން ދިނުމާއި ރިސްކުތައް ކުޑަކޮށް، ކުދި ޖަޒީރާ ގައުމުތަކަށް އިންވެސްޓްކުރުމަށް އިތުރު ޝައުގުވެރިކަން އުފެއްދުން.
- އައު އީޖާދީ މާލީ ހައްލުތައް ހޯދައިދިނުން.
- މޫސުމީ ބަދަލުތަކުން އަރައިގަތުމަށް ހޯދާ ކާމިޔާބާއެކު ދަރަނި މައާފުކޮށްދިނުން
މި ބައްދަލުވުމުގައި ވެސް ރައީސްވަނީ ތިމާވެއްޓާ ރައްޓެހި ގޮތަކަށް ތަރައްގީކުރާ ރަސްމާލެއަށް އިންވެސްޓްކުރަމުން އަންނަކަން ފާހަގަކުރައްވައިފައެވެ.
އެއީ ގޯތިގެދޮރުގެ މައްސަލައަށް ދާއިމީ ހައްލެއް ހޯދައި، އިގުތިސާދީ ފުދުންތެރިކަމުގެ މަރުކަޒަކަށް ވާނެ ސިޓީއަކަށް ވާނެ ކަމަށް ރައީސް ވިދާޅުވިއެވެ. އަދި އެންމެ ޒަމާނީ އަދި ތިމާވެއްޓާ ރަށްޓެހި ދަތުރުފަތުރާއި ހަކަތައިގެ ނިޒާމުތައް ވެސް އެ ސިޓީގައި ގާއިމްކުރާނެކަމަށް ވިދާޅުވިއެވެ.