ހެލްތު މިނިސްޓްރީން އިންޒާމުކޮށްގެން ބޭއްވި މިއަހަރުގެ ހެލްތް އެކްސްޕޯގައި ޓްރީ ޓޮޕް ހޮސްޕިޓަލުން ބައިވެރިވެއްޖެއެވެ.
މިދިޔަ ބުރާސްފަތި ދުވަހާއި ހުކުރު ދުވަހު ހުޅުމާލޭ ސެންޓްރަލް ޕާކުގައި ކުރިއަށް ގެންދިޔަ މި ހަރަކާތުގައި ވަނީ ސިއްޙީ ޚިދުމަތްދޭ ފަރާތްތަކާއި ވެލްނެސް ޖަމިޢްޔާތަކާއި ސަޕްލަޔަރުންނާއި ސިއްޙީ މަޢުލޫމާތު ދޭ ފަރާތްތަކުގެ ޚިދުމަތް ފޯރުކޮށްދީފައިވެއެވެ.
ޢާންމުންނަށް ޞިއްޙީ ކަންކަމާ ބެހޭ ގޮތުން ހޭލުންތެރިކަން އިތުރުކުރުމުގެ މަގުސަދުގައި ކުރިއަށްގެންދިޔަ މި ހެލްތު އެކްސްޕޯގައި ބައިވެރިވި ފަރާތްތަކަށް ޞިއްޙީ ތަޢުލީމާއި ކެރިއަ ގައިޑެންސްއާއި ދުޅަހެޔޮކަމާ ގުޅޭ ގިނަ މަޢުލޫމާތުތައް ވަނީ ފޯރުކޮށްދީފައެވެ.
ޓްރީޓޮޕް ހޮސްޕިޓަލުން ބައިވެރިވި، މި އަހަރުގެ ހެލްތު އެކްސްޕޯ ބާއްވައިފި --- ފޮޓޯ/ ޓްރީޓޮޕް
ޓްރީޓޮޕް ހޮސްޕިޓަލުން ބުނީ، މި އެކްސްޕޯގައި އެ ހޮސްޕިޓަލުގެ ފެމިލީ މެޑިސިން ޑޮކްޓަރުންނާއި ދަތުގެ ޚާއްސަ ޑޮކްޓަރުންގެ އިތުރުން ޑައިޓީޝަނުން ދުޅަހެޔޮ ދިރިއުޅުމަކަށް އެޅިދާނެ ފިޔަވަޅުތަކާ ގުޅޭ މަޢުލޫމާތުތަކާއި އެ ހޮސްޕިޓަލުން ލިބެންހުރި ފަރުވާގެ މަޢުލޫމާތުތައް އާންމުންނަށް ފޯރުކޮށްދިން ކަމަށެވެ.
މި ހަރަކާތާ ގުޅިގެން ޓްރީޓޮޕް ހޮސްޕިޓަލްގެ ސީއީއޯ ޑރ .ސްރީވަތު ސަން ސްރީދާރްޖީ ވިދާޅުވީ، ހެލްތު އެކްސްޕޯގައި ބައިވެރިވުމަކީ ދިވެހި ރައްޔިތުންގެ ސިއްހަތާއި ދުޅަހެޔޮކަމަށް އެހީތެރިކަން ފޯރުކޮށްދިނުމަށް ކުރާ މަސައްކަތާ ގުޅިފައިވާ ކަމެއް ކަމަށެވެ.
ޓްރީޓޮޕް ހޮސްޕިޓަލުން ބައިވެރިވި، މި އަހަރުގެ ހެލްތު އެކްސްޕޯ ބާއްވައިފި --- ފޮޓޯ/ ޓްރީޓޮޕް
މިކަހަލަ ހަރަކާތްތަކުގެ ތެރެއިން މުޖުތަމަޢުއާ ގުޅުން ބަދަހިކޮށް، އެ ހޮސްޕިޓަލުގެ ހެލްތް ކޭމްޕްތަކުގެ ޚިދުމަތާއި ހިލޭ ހެލްތް ސްކްރީނިންއާއި ރާއްޖޭގެ އެކި ކަންކޮޅުތަކުގައި ބާއްވާ ކުޅިވަރު މުބާރާތްތަކުގައި މެޑިކަލް ސަޕޯޓް ދިނުމަށް އަބަދުވެސް ޝައުގުވެރިވާ ކަމަށް ސީއީއޯ ވިދާޅުވިއެވެ.
އުއްމީދަކީ، ދިވެހި ރައްޔިތުންގެ ދުޅަހެޔޮކަމަށް ސަރުކާރުން އަދި މުޖުތަމަޢުއިން ކުރިއަށް ގެންދާ މިފަދަ އިތުރު ހަރަކާތްތަކުގައި ވެސް ބައިވެރިވުން ކަމަށް އޭނާ ވަނީ ފާހަގަކުރައްވާފައެވެ.