ޓްރީޓޮޕް ހޮސްޕިޓަލުން ހަތަރު ދަރިވަރަކަށް ނަރުސްކަން ކިޔެވުމަށް ސްކޮލާޝިޕްގެ ފުރުސަތު ދީފިއެވެ.
އެ ހޮސްޕިޓަލުގައި ބޭއްވި ރަސްމިއްޔާތުގައި ސްކޯލާޝިޕް ލިބުނު ދަރިވަރުންނަށް ސްކޯލާޝިޕް ހަވާލުކޮށްދެއްވީ އެ ހޮސްޕިޓަލުގެ ޑިރެކްޓާ އޮފް ނާސިން ސޫޒަން ހަބަޓްއެވެ.
ޖުމްލަ ހަތަރު ދަރިވަރުންނަށް ސްކޯލާޝިޕް ހަވާލުކުރެވުނުއިރު މި ސްކޯލާޝިޕަށް ހުޅުވާލުމުން 15 ދަރިވަރުން އެ ކަމަށް ޝައުގުވެރިކަން ފާހަގަކޯށްފައިވާކަން އެ ހޮސްޕިޓަލުން ވަނީ ފާހަގަކޮށްފައެވެ.
ޓްރީޓޮޕުން ހަތަރު ނަރުހަކަށް ސްކޮލާޝިޕްގެ ފުރުސަތު ދީފި --- ސަން ފޮޓޯ/ އިބްރާހިމް ނާއިޝް
މި ރަސްމިއްޔާތުގައި ވާހަކަދައްކަވަމުން އެ ހޮސްޕިޓަލުގެ ސީއީއޯ ސްރިވާޓްސަން ސްރިދާރު ވަނީ ނަރުހުން ތަމްރީނު ކުރުމަށް ކުރިއަށްގެންދާ މި ޕްރޮގްރާމަކީ މީހުން ބިނާ ކުރުމަށް ކުރާ އިންވެސްޓެއް ކަމަށެވެ.
އަދި ޓްރީ ޓޮޕުން މި ސްކޮލަޝިޕް ފުރިހަމަ ކުރާ ދަރިވަރުން ރާއްޖޭގައި ޚިދުމަތް ކުރާނެ ކަމުގެ އުންމީދު ކުރައްވާ ކަމުގައި ވެސް އޭނާގެ ވާހަކައިގައި ވަނީ ފާހަގަކުރައްވާފައެވެ.
ނަރުހުން ތަމްރީނުކުރުމަށް ދެމުން އަންނަ ސްކޯލާޝިޕް ޕްރޮގްރާމަކީ އެ ހޮސްޕިޓަލުން 2021 ވަނަ އަހަރުން ފެށިގެން ކުރިއަށް ގެންދާ ޕްރޮގްރާމެކެވެ. އަދި މި ޕްރޮގްރާމްތަކުގައި މިހާތަނަށް 15 ދަރިވަރަކު ވަނީ ތަމްރީނުކޮށްފައެވެ. މީގެތެރެއިން ހަތް ނަރުހުން މިހާރު ވެސް އެ ހޮސްޕިޓަލުގައި މަސައްކަތް ކުރަމުން އަންނަކަން އެ ހޮސްޕިޓަލުން ވަނީ ފާހަގަކޮށްފައެވެ.
ޓްރީ ޓޮޕް ހޮސްޕިޓަަލަކީ ޒަމާނީ ޚިދުމަތްތަކުގެ އެހީގައި މުޅީން އައު ޚިދުމަތްތައް ރާއްޖެއަށް ތާރަފްކުރަމުން އަންނަ ހޮސްޕިޓަލެކެވެ.
އެ ހޮސްޕިޓަލުން މިހާރު ވެސް އަންނަނީ ކޮލެޓީ ރަނގަޅު އެތައް ސިއްޚީ ޚިދުމަތެއް ރައްޔިތުންނަށް ފޯރުކޮށްދެމުންނެވެ.