އުމުރުން 11 އަހަރުގެ އަންހެން ކުއްޖަކާއި ހަތް އަހަރުގެ އަންހެން ކުއްޖަކަށް ޖިންސީ ގޯނަކުރި ކަމަށް ތުހުމަތު ކުރެވޭ މައްސަލައިގައި އުމުރުން 56 އަހަރުގެ ފިރިހެނަކު ފުލުހުން ހައްޔަރުކޮށްފިއެވެ.
މިކަމާ ގުޅިގެން ފުލުހުން ބުނީ، މި ހާދިސާ ހިނގީ ދެކުނުގެ އަތޮޅުތައް ކަމަށްވާ ގއ. ގދ. ޏ. އަދި ސ. އަތޮޅުގައި ހިމެނޭ ރަށެއްގައި ކަމަށެވެ.
އަދި މި މައްސަލަ ރިޕޯޓުކުރީ މިމަހުގެ ހަތަރު ވަނަ ދުވަހުގެ ރޭ ކަމަށް ފުލުހުން ބުންޏެވެ.
ހަމައެއާއެކު މި މައްސަލައާ ގުޅިގެން 56 އަަހަރުގެ ދިވެހި ފިރިހެނަކު ރޭގެ ވަގުތެއްގައި ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށް ފުލުހުން ބުންޏެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
ފުލުހުން ބުނީ ކުޑަކުދިންނާ ގުޅޭ މައްސަލަތަކަކީ ސީރިއަސް މައްސަލަތަކަކަށް ވާތީ، ކުއްޖާގެ އައިޑެންޓިޓީ ރައްކާތެރިކުރުމުގެ ގޮތުން ކުއްޖާގެ އަތޮޅާއި ރަށް ހާމަނުކުރާނެ ކަމަށެވެ.