ކުރެވޭ ކުޑަކުޑަ ކަމަކުން، ކިތައްމެ ބޮޑު ނަތީޖާއެއްވެސް ނުކުމެދާނެއެވެ. ހަމައެފަދައިން ނުކޮށް ދޫކޮށްލެވޭ ކުޑަކުޑަ ކަމަކުންވެސް އެހާމެ ބޮޑު ނަތީޖާއެެއް ނުކުމެދާނެއެވެ. ކުރަން ޖެހޭ ކަމެއް ނުކޮށް ދޫކޮށްލެވިޖެނަމަ، ގިނަފަހަރު ކުރިމަތިލާން ޖެހެނީ ނުރައްކާތެރި ނަތީޖާއަކާއެވެ. މީގެ ކުޑަކުޑަ މިސާލަކީ، ކަރަންޓު ބޭނުންކުރުމުގައި ރައްކާތެރިކަމުގެ ގޮތުން ކޮންމެހެން ހުންނަންޖެހޭ އާރތު ލީކޭޖް ސަރކޭޓް ބްރޭކަރ ނުވަތަ އީ.އެލްސީ.ބީ ހަރުކޮށްފައި ނެތް ހާލަތެއްގައި މީހަކު ކަރަންޓުގައި ޖެހިގެން ނުކުމެދާނެ ނުރައްކާތެރި ނަތީޖާއެވެ. މިފަދަ ހިތާމަވެރި ހާދިސާތައް ރާއްޖޭގައި މަދުންނަމަވެސް ހިނގަމުންދާކަމީ، މިކަން ލުއި ގޮތަކަށް ނަގައިގެން ފަރުޖެއްސޭނެ ކަމެއް ނޫންކަމުގެ ހެއްކެކެވެ. ކަރަންޓު ބޭނުންކުރާ ކޮންމެ ތަނެއްގައި އީ.އެލްސީ.ބީ ހަރުކޮށްފައި ހުންނަން ޖެހެނީ، ފުރާނައިގެ ރައްކާތެރިކަމަށްޓަކައެވެ. ތިމާއާއި އަނެކާގެ ސަލާމަތަށްޓަކައެވެ.
އީ.އެލްސީ.ބީއަކީ، ކަރަންޓުގެ މައްސަލަތަކުންނާއި ކަރަންޓު ޝޮކުގެ ނުރައްކަލުން މީހުންނާއި މުދާ ރައްކާތެރިކުރުމަށް ފަރުމާކުރެވިފައިވާ ކަރަންޓުގެ މުހިންމު ސަލާމަތީ ވަސީލަތެކެވެ. މި ވަސީލަތް މަސައްކަތްކުރަނީ ސާރކިޓުގައި ދައުރުވާ ކަރަންޓު މޮނިޓަރކޮށް، ސާރކިޓަށް ވަންނަ އަދި ނުކުންނަ ކަރަންޓުގެ މެދުގައި ހުންނަ ތަފާތުތައް ދެނެގަތުމުގެ މައްޗަށެވެ. ސާރކިޓެއްގައި އަބަދުވެސް ވަންނަ ކަރަންޓު ނުވަތަ ލައިވް ފަށުގައި ހުންނަ ކަރަންޓާއި އަދި ނިކުންނަ ކަރަންޓު ނުވަތަ ނިއުޓްރަލް ފަށުގައި ހުންނަ ކަރަންޓު އެއްވަރުވާނެއެވެ. ކޭބަލްގެ އިންސިއުލޭޝަންއަށް ޑެމޭޖްވުމުގެ ސަބަބުން ނުވަތަ އެހެނިހެން ސަބަބަކާހުރެ ކޭބަލްގައި ދައުރުވާ ކަރަންޓް ލީކްވާނަމަ، އީ.އެލް.ސީ.ބީއަށް ވަންނަ ކަރަންޓް އަދި ނިކުންނަ ކަރަންޓް ދޭތެރޭ ފަރަގެއް އުފެދޭނެއެވެ. އީ.އެލް.ސީ.ބީއިން މި ފަރަގު ދެނެގަނެ، ވަގުތުން ބްރޭކާރ ވައްޓާލާ އެ ސާރކިޓުގެ ކަރަންޓު ކަނޑާލާނެއެވެ. އީ.އެލްސީ.ބީއަކީ ކަރަންޓު ބޭނުންކުރާ ހުރިހާތަނެއްގައި ކަރަންޓުގެ މައްސަލަތަކުން ރައްކާތެރިވުމަށް ކޮންމެހެން ބޭނުންވާ އެއްޗެކެވެ. ޚާއްޞަކޮށް ތެތްކަން ހުންނަ ނުވަތަ ފެނުގެ އަސަރުކުރުމުގެ ފުރުސަތު އޮތް ތަންތަނުގައި، ކަރަންޓު ލީކުވާ މިންވަރު ގިނަވުމުގެ ފުރުސަތު އޮންނާތީ، މިފަދަ ތަންތަނުގައި އީ.އެލްސީ.ބީ ހުރުމުގެ މުހިއްމުކަން ވަކިން ބޮޑެވެ. މައްސަލައެއް ދެނެގަނެވޭ ހިނދު ވަގުތުން، އޮޓަމެޓިކުން ކަރަންޓު ކަނޑާލުމުގެ ޤާބިލްކަން ލިބިފައިވުމުގެ ސަބަބުން، ކަރަންޓުގައި ޖެހުންފަދަ ހާދިސާތައް ހުއްޓުވުމާއި ކަރަންޓުގެ ރައްކާތެރިކަން ކަށަވަރުކުރުމުގައި އީ.އެލްސީ.ބީ އަދާކުރާ ދައުރު ވަރަށް މުހިންމެވެ.
ރާއްޖޭގައިވެސް މި ވަސީލަތް އެއްހާސް ރުފިޔާއަށްވުރެ ކުޑަ އަގަކަށް ލިބެން ހުރިއިރު އެ އަގަކީ، މިވަސީލަތުގެ މުހިއްމުކަމާއި، އަދާކުރާ ދައުރުގެ ސަބަބުން ލިބޭ ރައްކާތެރިކަމުގެ އަގާ އަޅާނުކިޔޭނެ އަގެކެވެ. ރާއްޖޭގެ އެންމެ ބޮޑު އާބާދީއަކަށް ކަރަންޓުގެ ޚިދުމަތް ފޯރުކޮށްދޭ ފެނަކައިން ވަނީ، ކަރަންޓުގެ ޚިދުމަތް ދެމުންގެންދާ ހުރިހާ ތަނެއްގައި އީ.އެލް.ސީ.ބީ ހަރުކޮށްފައި ހުރިތޯ ޔަގީން ކުރުމަށް ޚާއްސަ ސަރވޭއެއް މިދިޔަ އޮކްޓޫބަރު މަހުގެ ތެރޭގައި ފަށާފައެެވެ. އަދި އީ.އެލް.ސީ.ބީގެ މުހިއްމުކަމާއި ގުޅޭ ހޭލުންތެރިކުރުމުގެ ކެމްޕެއިނެއްވެސް މި ސަރވޭއާއެކު ކުރިއަށް އެބަދެއެވެ. މި ސަރވޭގެ މަޤްސަދަކީ، ކުންފުނިން ފޯރުކޮށްދޭ ކަރަންޓުގެ ސަލާމަތީ މިންގަންޑު، ޔުޓިލިޓީ ރެގިއުލޭޓަރީ އޮތޯރިޓީގެ މިންގަނޑުތަކާ އެއްހަމަކޮށް، އާއްމު ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށްދިނުމެވެ.
އާއްމު ދިރިއުޅުން ކަރަންޓުން ބޭނުންކުރެވޭ ވަސީލާތަކަށް މުޅީންހެން ބަރޯސާވެފައިވާ ޒަމާނެއްގައި، ރައްކާތެރިގޮތުގައި ކަރަންޓު ބޭނުން ކުރުމަކީ، އިޚްތިޔާރީކަމެއްގެ ގޮތުގައި ދެކިގެން ނުވާނެއެވެ. އީ.އެލްސީ.ބީ ހަރުކޮށްފައި ހުރުމަކީ، ރާއްޖޭގައި ހެދިފައިވާ ޤާނޫނުތަކާއި ޤަވައިދުތަކުން ލާޒިމްކޮށްފައިވާ ސަލާމާތީ މިންގަނޑަށްވާއިރު، މިކަމަށް އެއްބާރުލުންދީ، ތަބާވުމަކީ، ކޮންމެ މީހެއްގެ މައްޗަށްވެސް އޮތް ފަރުދީ ޒިންމާއެކެވެ.
ނޯޓް: މިއީ ރައްކާތެރި ގޮތުގައި ކަރަންޓު ބޭނުންކުރުމާއި، އީ.އެލް.ސީ.ބީގެ މުހިއްމުކަން އަންގައިދިނުމަށް ފެނަކައިން ކުރިޔަށްގެންދާ ޙަރަކާތުގެ ދަށުން ގެނެސްދޭ ހޭލުންތެރިކުރުމުގެ ލިޔުމެކެވެ.