ދުނިޔޭގެ އެކި ކަންކޮޅުތަކަށް ނަޒަރު ހިންގައިލުމުން ހަނގުރާމަތަކަށް ހިފެހެއްޓުމެއްނެތި ފައިސާ ޚަރަދުކުރަމުން ދާއިރު، މޫސުމީ ބަދަލުތަކަށް އެކަށީގެންވާ ވަރަށް ފަރުވާ ނުބެހެއްޓޭ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސް އެހެން ވިދާޅުވީ، އަޒަރުބައިޖާނުގައި މިހާރު ކުރިޔަށްދާ ކޮޕް29 ސަމިޓުގައި ރާއްޖޭގެ ބަޔާން އިއްވެވުމަށް ކުރެއްވި ތަގުރީގުގައެވެ.
ރައީސް އިއްވެވި ބަޔާނުގައި ރާއްޖޭގެ މޫސުމީ ހާލަތަށް އަލިއަޅުއްވާލައްވައި ވިދާޅުވީ، އާންމު ގޮތެއްގައި ދިވެހިރާއްޖެ ސިފަވެގެންދަނީ ނާޒުކު ގައުމެއްގެ ގޮތުގައި ކަމަށް ވިޔަސް މިއީ ހިތްވަރުގަދަ ރައްޔިތެއް ދިރިއުޅެމުންދާ ގައުމެއް ކަމަށެވެ.
މީގެ 35 އަހަރު ކުރިން ފެށި އެންމެ ފުރަތަމަ، ސްމޯލް އައިލެންޑްސް ކޮންފަރެސުން ފެށިގެން މޫސުމީ ބަދަލުތަކާ ގުޅިގެން އަޅަމުންދާ ފިޔަވަޅުތައް ވަރުގަދަ ކުރުމަށް މި ގައުމުން ގޮވާލަމުން އަންނަކަން އެ މަނިކުފާނު ފާހަގަ ކުރެއްވިއެވެ. އެ ގޮވާލުމާއި އެ ކަމަށް ގޮވާލަން ޖެހޭ ސަބަބު ވެސް ބަދަލުނުވާ ކަމަށް ވިދާޅުވިއެވެ.
ރާއްޖެއަށް ތިމާވެއްޓާއި ކަނޑަކީ ހަމައެކަނި ގުދުރަތީ ވަސީލަތްތައް ނޫން ކަމަށާއި، އެއިން ދިވެހިރާއްޖޭގެ ސަގާފަތް ވެސް ރަމްޒުކޮށްދޭ ކަމަށް ރައީސް ވިދާޅުވިއެވެ. އަދި އެ ތަންތަން ހިމާޔަތް ކުރުމަކީ ދިވެހީންގެ މައްޗަށް އޮތް ވާޖިބެއް ކަމަށް ވިދާޅުވިއެވެ.
މިދިޔަ ކޮޕް 28ގައި މޫސުމީ ބަދަލުތަކާ ގުޅިގެން ރާއްޖޭގެ ތަސައްވުރު ހިއްސާކުރައްވާފައިވާނެކަން ރައީސް ވަނީ ފާހަގަ ކުރައްވައިފައެވެ. އެ ގޮތުން ބޮޑެތި ގޮންޖެހުންތަކާ އެކުގައި ވެސް "އުންމީދީ ފަތިހެއް" ފެންނަމުންދާ ކަމަށް ރައީސް ސިފަ ކުރެއްވިއެވެ.
ރާއްޖޭގެ ބަޔާން އިއްވަވަމުން ރައީސް ވަނީ ރާއްޖެއިން މި ފަހުން ހަކަތައިގެ ސިޔާސަތުތަކަކާއި ރޯޑްމެޕެއް ލޯންޗުކޮށްފައިވާކަން ފާހަގަ ކުރައްވައިފައެވެ. އަދި ކާބޯތަކެތީގެ ރައްކާތެރިކަމާއި، ހެޔޮ އަގުގައި ބޯހިޔާވަހިކަން ލިބޭނެ ގޮތް ކަށަވަރު ކުރުމަށާއި، ޚާއްސަ އިގުތިސާދީ ސަރަހައްދުތަކެއްގެ އިތުރުން، ޑިވެލޮޕްމަންޓް ބޭންކިން ތައާރަފުކުރުމުގެ އިތުުރުން އައު އިންވެސްޓްމަންޓް ފުރުސަތުތައް ތިމާވެއްޓާ ރަށްޓެހި ގޮތަކަށް ހުޅުވައިލައިފައިވާ ކަމަށް ވިދާޅުވިއެވެ.
ދެމެހެއްޓެނިވި ގޮތެއްގައި މޫސުމީ ބަދަލުތަކަށް ހޭނިފައިވާ އަދި ތަރައްގީވެފައިވާ ގައުމެއްގެ ގޮތުގައިވުމަށް ޓަކައި، ކުރިޔަށް އޮތް 20 އަހަރަށް ރާއްޖޭން ޕްލޭނެއް އެކުލަވައިލުމުގެ މަސައްކަތް ކުރަމުންދާ ކަމަށް ވެސް ރައީސް ވިދާޅުވިއެވެ.
އެހެން ނަމަވެސް ރާއްޖޭން ހާސިލްކުރަން ބޭނުންވާ ލަނޑުދަނޑިތަކަށް އެޅޭ ހުރަހަކީ މާލީ ގޮންޖެހުންތައްކަން ރައީސް ފާހަގަ ކުރެއްވިއެވެ. އެހެން އެ ކަން ދިމާވާންވީ ސަބަބާމެދު ސުވާލު އުފައްދަވައި ރައީސް ވިދާޅުވީ ކޮޕް ސަމިޓުގައި އެ ކަމަށް ޓަކައި ބޭނުންވާ ފައިސާ ލިބޭނެ ގޮތް ހަމަޖައްސަންޖެހޭ ކަމަށެވެ.
ރައީސް ވިދާޅުވީ މޫސުމީ ބަދަލުތަކުން ލިބޭ ގެއްލުންތަކަށް ފައިސާ ކަނޑައަޅައިއިރު، އެ މައްސަލައިގެ ސަބަބުން ކުރިމަތިވާ ދަތިތަކުގެ ހަގީގީ މިންވަރު ދައްކުވައިދޭން ޖެހޭ ކަމަށެވެ. މި ކަމަށް ޓަކައި ފައިސާ ބޭނުންވަނީ ބިލިއަނުން ނޫން ކަމަށާއި، އެ ކަމަށް ފައިސާ ބޭނުންވަނީ ޓްރިލިއަނުން ކަމަށް ރައީސް ވިދާޅުވިއެވެ. އެ ގޮތުން ތަރައްގީވަމުން އަންނަ ކުދި ޖަޒީރާ ގައުމުތަކުގެ ހާލަތަށް ވިސްނަންޖެހޭ ކަމަށް ރައީސް ވިދާޅުވިއެވެ.
މޫސުމަށް އަންނަ ބަދަލުތަކަށް ހޭނުމަށާއި ގެއްލުންތައް ކުޑަކުރުމަށް އިސްކަންދޭ މިންވަރު އިތުރުކުރުމަށް ރައީސް ގޮވައިލެއްވިއެވެ. އަދި ތަރައްގީވެފައިވާ ގައުމުތަކުން މި ކަމަށްޓަކައި ކުރާ ޚަރަދު އިތުރު ކުރަންޖެހޭ ކަމަށް އެ މަނިކުފާނު ވިދާޅުވިއެވެ.
ރައީސް ވިދާޅުވީ މޫސުމީ ބަދަލުތަކާ ގުޅުން ހުރި ކަންކަމަށް މާލީ ގޮތުން ކަނޑައަޅާފައިވާ ލަނޑުދަނޑި އަޒަރުބައިޖާނުގައި މިހާރު އޮތް ސަމިޓުގައި ހާސިލް ކުރެވެންޖެހޭނެ ކަމަށް ރާއްޖޭގެ ވަފުދުން ދެކެއެވެ. އެގޮތުން މި މަސައްކަތުގެ ނަތީޖާ މި ފަހަރު ތަފާތުވާން ޖެހޭ ކަމަށް އެ މަނިކުފާނު ވިދާޅުވިއެވެ.