ސަރުކާރުގެ ސިޔާސަތާ އެއްގޮތަށް ފުލުހުންގެ މެޑިކަލް ސްކީމް ރިވިއުކުރަނީ އިސްރާފު ކުޑަކުރަން ކަމަށާއި، އޭގެ ސަބަބުން މިހާރު ލިބޭ އެއްވެސް ޚިދުމަތަކަށް ނުވަތަ އެލަވަންސަަކަށް އުނިކަމެއް ނާންނާނެކަމަށް ފުލުހުންގެ ތަރުޖަމާނު, އެސިސްޓަންޓް ކޮމިޝަނަރު އަހްމަދު ޝިފާން މިއަދު ވިދާޅުވެއްޖެއެވެ.
ސިފައިންނާއި ފުލުހުނަށާއި އެ މީހުންގެ އާއިލާތަކަށް ބޭސް ފަރުވާގެ ހިދުމަތް ދިނުމަށް މިހާރު ފޯރުކޮށްދެމުން އަންނަ ވަކި ލިމިޓެއް ނެތް ސްކީމް އުވާލުމަށްފަހު ޕްރައިވެޓް އިންޝްއަރެންސެއް ފޯރުކޮށްދޭން ސަރުކާރުން ވަނީ ނިންމައިފައެވެ.
އެކަމާ ގުޅިގެން ފުލުހުންގެ ތެރޭގައި ހުރި ކަންބޮޑުވުންތަކާ ގުޅިގެން އެކްސްގައި ކުރެއްވި ޕޯސްޓެއްގައި ޝިފާން ވިދާޅުވީ ފުލުހުންނަށް ދޭ މެޑިކަލް ސްކީމްގެ އިސްރާފު ވީ އެންމެ ބޮޑަކަށް ކުޑަކުރުމަށް ޓަކައި ރިވިއުކުރާނެ ކަމަށެވެ.
ނަމަވެސް މިހާރު ދޭ އެއްވެސް އެލަވަންސެއް މި ސްކީމް ރިވިއުކުރާއިރު އުނިކުރުމުގެ އެއްވެސް ވިސްނުމެއް ފުލުހުންގެ މިހާރުގެ ލީޑާޝިޕްގެ ނެތްކަމަށް ވެސް ޝިފާން ވިދާޅުވިއެވެ.
އިތުރު ތަފްސީލް ހިއްސާ ކުރައްވައި "ސަން"އާ ވާހަކަދައްކަވަމުން ޝިފާން ވިދާޅުވީ ފުލުހުންގެ ގާނޫނުގައި ބަޔާންކޮށްފައި އޮންނަނީ ފުލުހުންނާއި އެ މީހުންގެ އާއިލާތަކަށް ބޭސްފަރުވާގެ ޚިދުމަތް ފޯރުކޮށްދޭން ޖެހޭނެކަމަށެވެ.
"އޭގެ މާނައަކީ ބޭސްކޮށްދޭން ކުރަންޖެހޭ ހުރިހާ ކަމެއް ފުލުހުން ހަމަ މިހާރު އޮންނަ އުސޫލުން ކުރިއަށް ގެންދާނޭ. އެ ކަމަށް އެއްވެސް އުނި އިތުރެއް ނާންނާނޭ،" ޝިފާން ވިދާޅުވިއެވެ.
އޭނާ ވިދާޅުވީ ފުލުހުންގެ މެޑިކަލް ސްކީމް ރިސްޓްރަކްޗާކުރުމުގެ ބޭނުމަކީ ސްކީމަށް ޒިންމާދާރުވެ، އޭގެ ބޭނުން އެންމެ ބޭނުންތެރި ގޮތުގައި ހިފޭކަން ކަށަވަރުކޮށް ފުލުހުންގެ ޚިދުމަތުގައި އުޅޭ މުވައްޒަފުންނާއި އޮފިސަރުންނަށް ފޯރުކޮށްދިނުން ކަމަށެވެ.
އޭރުން ނަހަމަ ގޮތުގައި އެ ސްކީމު ބޭނުންކުރުން ވެސް ހުއްޓުވޭނެކަމަށް ވިދާޅުވިއެވެ.
އަންނަ އަހަރަށް ލަފާ ކުރާ ދައުލަތުގެ ބަޖެޓުގެ ތަފުސީލީ ފޮތުގައި ފިނޭންސް މިނިސްޓްރީން ބުނީ ސިއްހީ ނިޒާމު މިހާރު ބައްޓަން ވެފައި އޮތްގޮތުން ނާޖާއިޒު ފައިދާ ނެގުމުގެ ފުރުސަތު އެބައޮތް ކަމަށެވެ.
އެގޮތުން އާސަންދައާއި މެޑިކަލް ވެލްފެއާ ޕްރޮގްރާމްތަކާއި ސިފައިންނާއި ފުލުހުންގެ މެޑިކަލް ވެލްފެއާ ޕްރޮގްރާމްތަކުން އެއް ހިދުމަތަކަށް އެއްފަހަރާ އެހީ ހޯދުމުގެ ފުރުސަތު އެބައޮތް ކަމަށް ފިނޭންސްއިން ބުނެއެވެ.
އަދި އާއްމުގޮތެއްގައި ސިއްހީ އިންޝުއަރަންސްތަކުން ކަވަރު ނުކުރާ ކޮސްމެޓިކް ޕްރޮސީޖާތައް ސިފައިންނާއި ފުލުހުންގެ މެޑިކަލް ޕްރޮގްރާމްގެ ތެރެއިން މިހާރު ކަވަރު ކުރާ ކަމަށް ފިނޭންސްއިން ބުންޏެވެ.
"މިކަންކަމުގެ ސަބަބުން އިސްރާފު އިތުރުވެ، އެންމެ ބޭނުން ޖެހިފައިވާ ފަރާތްތަކަށް ސަރުކާރުން ފޯރުކޮށްދޭން ޖެހޭ އެހީތެރިކަން އެކަށީގެންވާ މިންވަރެއްގައި ފޯރުކޮށްދިނުމަށް ދަތިވެ، އިޖުތިމާއީ ރައްކާތެރިކަން ގާއިމުކުރުމުގެ މަގުސަދުތަކާ ފުށުއަރާ،" ފިނޭންސް މިނިސްޓްރީން ބުންޏެވެ.
އެ މިނިސްޓްރީން ބުނިގޮތުގައި ސިފައިންނާއި ފުލުހުންގެ މެޑިކަލް ސްކީމަށް އާސަންދައިގެ ބޭރުން މިއަހަރުގެ ނިޔަލަށް 321.7 މިލިއަން ރުފިޔާ ހަރަދުވާނެ ކަމަށެވެ. މި ސްކީމަށް މިހާރު ލިމިޓެއް ކަނޑައެޅިފައި ނުވާއިރު ކޮސްމެޓިކް ޕްރޮސީޖާތަކާއި ބައެއް ކޮންސިއުމަބަލްސް ވެސް މި ސްކީމުގެ ތެރެއިން މިހާރު ދެމުން އަންނަކަން މިނިސްޓްރީންއިން ފާހަގަ ކުރިއެވެ.