ޓްރީ ޓޮޕް ހޮސްޕިޓަލްއިން މި އަހަރުގެ ދެވަނަ ޚިތާނީ ކޭމްޕްގައި ރަޖިސްރީކުރުމަށް ހުޅުވާލައިފިއެވެ.
މި ކޭމްޕުގައި ބައިވެރިވުމަށް ޝައުގުވެރިވާ ފަރާތްތަކަށް އަންނަ ޑިސެމްބަރު މަހުގެ 27 ވަނަ ދުވަހުގެ ނިޔަލަށް ނަން ނޯޓުކުރުމުގެ ފުރުސަތު މިހާރު ވަނީ ހުޅުވާލައިފައެވެ.
އެ ހޮސްޕިޓަލުން ބުނީ އެ ކޭމްޕުގައި ޚިދުމަތް ދިނުމަށް ހަމަޖެހިފައި ވަނީ އޮޕަރޭޝަނަށް ފަރުވާއަށް ޚާއްސަވެފައިވާ ޑޮކްޓަރުންނާއި، ކުޑަކަމުދާ ނިޒާމުގެ ޚާއްސަ ޑޮކްޓަރުން ހިމެނޭ ތަޖުރިބާކާރު މެޑިކަލް ޓީމަކުން ކަމަށެވެ.
އެ ޓީމުގައި ހިމެނެނީ ޑރ. ހުސައިން ހަދީވް، ޑރ. އުކްތަމް އަބްދުއްލާޔެވް، ޑރ. މައުމޫން އާސިމް، ޑރ. އިބްރާހީމް މުއުމިން، ޑރ. މުހައްމަދު ޝަރީފް، ޑރ. އަބްދުﷲ އުބައިދު އަދި ކުޑަކަމުދާ ނިޒާމުގެ ޚާއްސަ ޑޮކްޓަރު ޑރ. މެހްމެތު އޮޑަރެވެ.
ޓްރީ ޓޮޕް ހޮސްޕިޓަލުގެ ޗީފް އެކްޒެކެޓިވް އޮފިސާ ޑރ. ސްރިވަސްތަން ސްރީދާރް ޖ ވިދާޅުވީ، މި އަހަރުގެ ކުރީ ކޮޅު ހިތާނީ ކޭމްޕުތަކަށް ލިބުނު ތަރުހީބު މި އަހަރުގެ ޑިސެމްބަރު މަހު ވެސް ލިބޭނެ ކަމަށް އުއްމީދުކުރައްވާ ކަމަށެވެ. އަދި އެ ކޭމްޕު ކުރިއަށް ގެންދާއިރު ކުދިންނަށާއި މައިންބަފައިންނަށް ހިތްހަމަޖެހޭ މާހައުލެއް ގާއިމުކުރުމަށް އިސްކަންދެއްވާނެ ކަމަށް ވިދާޅުވިއެވެ.
އެ ހޮސްޕިޓަލުން ބުނި ގޮތުގައި ޚިތާނީ ޕެކޭޖުގެ އަގު ކަނޑައަޅާފައިވަނީ 5,000 ރުފިޔާއަށެވެ. މީގެ އިތުރުން، ކޮޓަރި އަޕްގްރޭޑް ކުރުމަށާއި ޕްރައިވެޓް ކޮޓަރިތަކަށް ޚާއްސަ އަގުތަކެއް ހަމަޖައްސާފައިވާކަމަށް އެ ހޮސްޕިޓަލުން ބުންޏެވެ.
ޙިތާނީ ކޭމްޕްގައި ބައިވެރިވުމަށާއި އިތުރު މައުލޫމާތު ހޯދުމަށް 3351610 އަށް ގުޅުމަށް އެ ހޮސްޕިޓަލުން ވަނީ އެދިފައެވެ.