ދައުލަތުގެ ސިއްހީ ފަރުވާގެ އިންޝުއަރެންސް ސްކީމް، އާސަންދަ ނިޒާމު އިތުރަށް ހަރުދަނާކުރުމަށް ޓަކައި، މުއްސަނދިންގެ އަތުން އެ ސްކީމް ފައިނޭންސްކުރާ ގޮތަށް ބަދަލުކުރަން ނިންމައިފިއެވެ.
އަންނަ އަހަރަށް ދައުލަތުން ލަފާކޮށްފައިވާ ބަޖެޓުގެ ރިކަރެންޓު ޚަރަދުގެ 5.1 އިންސައްތަ ހިއްސާކުރަނީ އާސަންދައަށް ކުރާ ހޭދައެވެ. އެއާއެކު ސަރުކާރުން އާސަންދަ ނިޒާމު އިސްލާހުކުރުމަށް ކަނޑައަޅައިފައިވާ ކަންކަން އަންނަ އަހަރަށް ލަފާކުރާ ބަޖެޓު ފޮތުގެ ތަފްސީލުގައި ވަނީ ހިމަނާފައެވެ.
އޭގައިވާ ގޮތުން އާސަންދައިގެ ޚިދުމަތް ބޭނުންކުރުމުގައި އެންމެ މުއްސަނދި ފަރާތްތަކަށް ބޭހާއި އައުޓްޕޭޝަންޓު ޚިދުމަތްތަކަށް ކޮންމެވެސް މިންވަރަކަށް ފައިސާ ދައްކަން ޖެހޭހެން ނުވަތަ އަމިއްލައަށް ޚަރަދުކުރަން ޖެހޭގޮތަށް ބަދަލުކުރަން ވަނީ ނިންމައިފައެވެ.
އަދި އިންކަމް ޓެކްސް ދައްކާ ފަރާތްތަކުގެ އަތުން ޕްރީ ޕޭމަންޓެއް ނަގައި، އާސަންދަ ނިޒާމު ފައިނޭންސްކުރަން އެ ފަރާތްތައް ހިއްސާވާ ގޮތަށް ބަދަލުކުރަން ވަނީ ނިންމައިފައެވެ.
މި ނިންމުންތަކަކީ ދައުލަތުން އަންނަ އަހަރު އާސަންދައަށް ކުރާ ހޭދަ ކުޑަވާނެ ކަމަށް އަންދާޒާކުރި ސަބަބުތަކެކެވެ.
މީގެ އިތުރުން އާސަންދަ ސްކީމުން ޕްރައިވެޓް ހޮސްޕިޓަލްތަކާއި ފެސިލިޓީތަކުގައި ދޭ ޚިދުމަތްތަކަށް ޕެކޭޖް އަގުތައް ކަނޑައަޅައި ހާމަނައިޒްކުރާނެކަމަށް ވަނީ ލިޔެފައެވެ.
މިހާރު ވެސް ބައެއް ފިޔަވަޅުތަކަށް އަމަލުކުރަން ވަނީ ފަށައިފައެވެ.
އެގޮތުން އަމިއްލަ އިންޝުއަރެންސް ގެންގުޅޭނަމަ އެ އިންޝުއަރެންސް ކަވަރުކުރާ އައުޓްޕޭޝަންޓް ޚިދުމަތްތަކަށް އާސަންދަ މިހާރު ނުދެއެވެ. ނަމަވެސް ޕްރައިވެޓް އިންޝުއަރެންސްއިން ކަވަރުނުކުރާ ކޮންމެ ހާލަތެއްގައި ވެސް އާސަންދަ ލިބޭނެއެވެ.