އިޒްރޭލު ޕާސްޕޯޓުގައި ރާއްޖެ އެތެރެވުން މަނާކުރުމަށް އިމިގްރޭޝަންގެ ގާނޫނަށް ހުށަހަޅާފައިވާ އިސްލާހުގެ މަސައްކަތް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ)އިން އަންނަ އަހަރުގެ ފެބްރުއަރީ މަހާ ހަމައަށް ދަންމާލަން މިއަދު ފާސްކޮށްފިއެވެ.
މިއަދުގެ 241 ކޮމިޓީއަށް އެ ހުށަހެޅުން ހުށަހެޅުއްވީ ތުޅާދޫ ދާއިރާގެ މެންބަރު އަބްދުލް ހަންނާނެވެ. އެ ހުށަހެޅުމަށް ތާއީދުކުރެއްވީ މާފަންނު އުތުރު ދާއިރާގެ މެންބަރު މުހައްމަދު ނާޒިމެވެ.
އެއާއެކު ކޮމިޓީން ނިންމީ ކަމާ ގުޅުން ހުރި އިދާރާތަކާ ބައްދަލުކޮށް، މަޝްވަރާ ބައްދަލުވުންތައް ބޭއްވުމަށެވެ.
އިޒްރޭލު ޕާސްޕޯޓުގައި ރާއްޖެ އެތެރެވުން މަނާކުރުމަށް ހުށަހަޅާފައި އޮތް ބިލުގެ މަސައްކަތް ލަސްވާތީ އެކަމާ ކަންބޮޑުވުން ފާޅުކޮށް، އެ ބިލު އަވަހަށް ފާސްކުރުމަށް ބާރުއަޅައިދިނުމަށް ސަރުކާރަށް ގޮވާލައި އިދިކޮޅު އެމްޑީޕީއަށް ނިސްބަތްވާ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ވަނީ ގަރާރެއް ވެސް ހުށަހަޅައިފިއެވެ.
މިއަދުގެ ޖަލްސާއަށް އެ ގަރާރު ތައާރަފުކުރިއިރު، ގަރާރު ހުށަހަޅުއްވާފައި ވަނީ މިދިޔަ މަހުގެ 28ގައެވެ.
މީގެ ކުރިން ވެސް އެ ބިލުގެ މަސައްކަތް ލަސްވާތީ އެމްޑީޕީން ކުއްލި މައްސަލަތައް ހުށަހަޅާފައިވެއެވެ. ނަމަވެސް އެ މައްސަލަތައް ބަލައިނުގަނެ މަޖިލީހުން ވަނީ ބޭރުކޮށްފައެވެ. ހަމައެއާއެކު އެ ބިލު ލަސްވާ ސަބަބު ސާފުކުރުމަށް، ބިލު ހުށަހެޅުއްވި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވަނީ މަޖިލީހުގެ ރައީސް އަބްދުއްރަހީމް އަބްދުﷲ އަށް ސިޓީއެއް ވެސް ފޮނުއްވާފައެވެ. ނަމަވެސް މިހާތަނަށް އެ ސަބަބެއް ހާމަކޮށްދެއްވާފައެއް ނުވެއެވެ.
އެ މައްސަލައިގައި މިހާރު ހުށަހަޅާފައި އޮތް ގަރާރުގައި މި ބިލު، ވަކިގޮތެއް ނުނިމި މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީގައި (241 ކޮމިޓީ) ހުއްޓިފައި އޮތް ސަބަބު ބަލައިދިނުމަށް އެދިފައިވެއެވެ. އެ ބިލުގެ މަސައްކަތް އަވަސްކުރުމަށް ހުރި ގޮންޖެހުންތައް ދެނެގަނެ، ވީހާވެސް އަވަހަކަށް އެ ބިލުގެ މަސައްކަތް ނިންމާ ރައްޔިތުންގެ މަޖިލީހުން އެ ބިލު އަވަހަށް ފާސްކުރުމަށް ބާރުއަޅައިދިނުމަށް ސަރުކާރަށް ގޮވާލައި ގަރާރު ވަނީ ހުށަހަޅާފައެވެ.
އެ ގަރާރުގައި ބުނެފައި ވަނީ އިޒްރޭލުން ފަލަސްތީނުގެ ނަސްލު ނައްތާލުމަށްޓަކައި ދެމުންދާ ހަމަލާތަކަށް އަހަރެއްވެގެން ދިޔައިރު، އެ މައްސަލާގައި އިޒްރޭލު ކުށްވެރިކުރުން ފިޔަވައި އެކަމާ ގުޅިގެން ހަރުދަނާ އެއްވެސް ފިޔަވަޅެއް އެޅުމަށް ސަރުކާރުން ނުކުޅެދިފައިވާ ކަމަށެވެ.
ޖޫން މަހުގެ 10ވަނަ ދުވަހު މަޖިލީހަށް ބަލައިގަތުމަށް ފާސްކޮށް، 241 ކޮމިޓީއަށް ފޮނުވި ބިލުގެ މަސައްކަތް ކޮމިޓީގައި އޮންނަތާ ފަސް މަސްވެގެން ދިޔައިރު، އިދިކޮޅު އެމްޑީޕީން އަންނަނީ އެކަމާ ކަންބޮޑުވުން ފާޅުކުރަމުންނެވެ.
ކޮމިޓީއަށް ވެސް އެޖެންޑާނުކޮށް އޮތުމަށްފަހު، އެ މައްސަލަ ވަނީ މިދިޔަ އާދިއްތަ ދުވަހު 241 ކޮމިޓީގައި ފަށާފައެވެ.