އިންޑިއާގެ ތެލުގޫ ސިނަމާގެ މަގުބޫލު އެކްޓަރު ވިޖޭ ދެވެރަކޮންދާގެ ކެރިއަރުގެ ފުރަތަމަ މިއުޒިކް ވީޑިއޯގެ ޓީޒާ ދައްކާލައިފިއެވެ.
ވިޖޭ ފުރަތަމަ ފަހަރަށް ބެލުންތެރިންނަށް ފެންނަ މި މިއުޒިކް ވީޑިއޯގެ ބަތަލާ އަކީ ބޮލީވުޑްގައި ކުރިއަރަމުން އަންނަ ޒުވާން ބަތަލާ ރާދިކާ މަދަންއެވެ.
އިންޑިއާގެ ޕަންޖާބު ލަވަކިޔުންތެރިޔާ ޖަސްލީން ރޯޔާލްގެ އަޑުން ކިޔާފައިވާ މި ލަވައިގެ ޓައިޓްލް ނަމަކީ "ސާހިބާ"އެވެ. ބަތަލާ ރާދިކާ ވަރަށް ޝާހީ ގޮތަކަށް ފެންނަ މި ލަވައިން ވިޖޭއާއެކު ދެން ފެންނާނީ ސައުތު ސިނަމާގެ މަގުބޫލު އެކްޓަރު ދުލްގީރު ސަލްމާންއެވެ.
މި މިއުޒިކް ވީޑިއޯ މި މަހުގެ 15 ވަނަ ދުވަހު ބެލުންތެރިންނާ ހަމައަށް ގެނެސްދޭނެކަން އިއުލާނުކޮށްފައިވާއިރު މި ތިން ތަރިންގެ ކެމިސްޓްރީއަށް ވަރަށް ގިނަ ބަޔަކު އަންނަނީ ތައުރީފުކުރަމުންނެވެ.
ފިލްމު "ލައިގަ"އިން ބޮލީވުޑަށް ތައާރަފުވެފައިވާ ތެލުގޫ އެކްޓަރު ވިޖޭ އެންމެފަހުން ބެލުންތެރިންނަށް ފެނިފައި ވަނީ މި އަހަރު ރިލީޒްވި ތެލުގޫ ފިލްމު "ދަ ފެމިލީ ސްޓާ"އިންނެވެ. ވިޖޭ ދެން އެންމެ އަވަހަށް ބެލުންތެރިންނަށް ފެންނާނީ މިހާރު މަސައްކަތް ފަށާފައިވާ ފިލްމު "ވީޑީ 12"އިންނެވެ.
ރާދިކާ އާއި ވިޖޭ ކަވަކިޔުންތެރިޔާ ޖަސްލީން ރޯޔަލްއާ އެކު--ފޮޓޯ/ފޭސްބުކް
ބަތަލާ ރާދިކާ ބެލުންތެރިންނަށް އެންމެފަހުން ފެނިފައި ވަނީ އެކްޓަރު އަކްޝޭ ކުމާރުއާ އެކު ކުޅުނު ފިލްމު "ސަރުފީރާ"އިންނެވެ.
ޓެލެވިޒަން ސީރީސްތަކުން ބެލުންތެރިންގެ މަގުބޫލުކަން ހޯދުމަށްފަހު ބޮލީވުޑަށް ތައާރަފްވި ބަތަލާ ރާދިކާ އަކީ ފިލްމު އިންޑަސްޓްރީގައި އުޖާލާ ކުރިމަގެއް އޮތް ބަތަލާއެއް ކަމަށް ގިނަ ބަޔަކު ވަނީ ބުނެފައެވެ. ރާދިކާ ދެން އެންމެ އަވަހަށް ބެލުންތެރިންނަށް ފެންނާނީ މިހާރު މަސައްކަތް ފަށާފައިވާ ފިލްމު "ސުބޭދާރު"އިންނެވެ.