ރާއްޖޭގައި ގާއިމުކުރުމަށް ނިންމާފައިވާ ބައިނަލްއަގުވާމީ ފައިނޭންޝަލް ސެންޓަރަށް ބޭނުންވާ ފަންނީ އެހީތެރިކަން ދިނުމަށް ގަތަރު ފައިނޭންޝަލް ސެންޓަރު (ކިއުއެފްސީ)އާއި އިކޮނޮމިކް މިނިސްޓްރީއާ ދެމެދު އެމޯޔޫއެއްގައި މިއަދު ސޮއިކޮށްފިއެވެ.
އިކޮނޮމިކް މިނިސްޓްރީން ނެރުނު ބަޔާނެއްގައި ބުނީ، މި އެމްއޯޔޫ އާއެއްކޮށް ރާއްޖޭގައި ބައިނަލްއަގުވާމީ ފައިނޭންޝަލް ސެންޓަރު ގާއިމުކުރަން ބޭނުންވާ އިލްމު ހޯދުމަށާއި ކެޕޭސިޓީ ބިނާކުރަން މަގުފަހިވާނެ ކަމަށެވެ.
އެގޮތުން، މި އެމްއޯޔޫގެ ދަށުން ކިއުއެފްސީން ފައިނޭންޝަލް މެނޭޖުމަންޓުގެ ބެސްޓް ޕްރެކްޓިސްތަކާއި އެކަމާ ބެހޭ ގާނޫނީ އޮނިގަނޑުގެ އިތުރުން އޮޕަރޭޝަނަލް ސްޓްރެޓެޖީތަކާ ގުޅޭ މައުލޫމާތު ސެޝަންތަކެއް ކުރިއަށް ގެންދާނެ ކަމަށް މިނިސްޓްރީން ބުނެފައިވެއެވެ.
މިނިސްޓްރީން އިތުރަށް ބުނީ މި އެއްބަސްވުމުގެ ތެރެއިން މާލީ އިންސްޓިޓިއުޝަންތަކާއި މި ދާއިރާގެ މަސައްކަތްތައް ރެގިއުލޭޓުކުރާ ގާނޫނީ ޝަހުސުތަކާއި ތަޖުރިބާކާރުންނާ އެއްކޮށް ނެޓްވޯކިން ފުރުސަތުތަކެއް ގަތަރުގެ ފައިނޭންޝަލް ސެންޓަރުން ފަހިކޮށްދޭނެ ކަމަށެވެ.
މި އެމްއޯޔޫއާ ގުޅިގެން އިކޮނޮމިކް މިނިސްޓަރު މުޙައްމަދު ސައީދު ވިދާޅުވީ، މިއީ ރައީސް ޑރ. މުޙައްމަދު މުއިއްޒުގެ ތަޞައްވުރާ އެއްގޮތަށް ބައިނަލްއަގުވާމީ ފައިނޭންޝަލް ސެންޓަރެއް ގާއިމުކުރުމަށް އެޅޭ މުހިންމު ފިޔަވަޅެއް ކަމަށެވެ. އަދި، އެކަމުގައި ކިއުއެފްސީގެ ބޮޑު އެހީތެރިކަމެއް ލިބޭނެ ކަމުގެ ޔަގީންކަން އޮތް ކަން މިނިސްޓަރު ވަނީ ފާހަގަކުރައްވާފައެވެ.
ސަރުކާރުން ވަނީ ކ. ފުނަދޫގައި ހުރި ތެޔޮ ޓޭންކުތައް ބަދަލު ކުރުމަށްފަހުގައި އެ ރަށުގައި ޒަމާނީ ފެންވަރުގެ ފައިނޭންޝަލް ސެންޓަރެއް ތަރައްގީކުރުމަށާއި ކޮންވެންޝަން ސެންޓަރުތަކާއި ހޮޓާތައް ތަރައްގީކުރަން ނިންމާފައެވެ.