މި މަހުގެ އެއްވަނަ ދުވަހު ރިލީޒްކުރި ޑައިރެކްޓަރު ރޯހިތު ޝެޓީގެ ފިލްމު "ސިންގްހަމް އަގެއިން"އަށް ބޮކްސް އޮފީހުގައި ބޮޑު ކާމިޔާބީއެއް ހޯދައިފިއެވެ.
ފިލްމު ރިލީޒްކުރި ހަފުތާ ބަންދާ ހަމައަށް ވެސް އިންޑިއާ ހިމެނޭގޮތަށް އެކި ޤައުމުތަކުން ފިލްމަށް ލިބުނު އާމްދަނީގެ އަދަދު 22 މިލިއަން ޑޮލަރަށް އަރާކަމަށް ފިލްމީ ޚަބަރުތައް ބުނެއެވެ.
މި ފިލްމު އުފައްދަން 350 ކްރޯޑާ 370 ކްރޯޑާ ދެމެދުގެ އަދަކަށް ފައިސާ ޚަރަދުވިއިރު މިހާތަނަށް ފިލްމަށް ލިބެމުން އަންނަ އާމްދަނީއާ ބަލާފަ ފިލްމުގެ ޚަރަދު މާ ބޮޑަށް ވެސް ފޫބެއްދޭނެ ކަމަށް ރިޕޯޓުތައް ބުނެއެވެ. ބޮކްސް އޮފީހުގައި ފިލްމު "ސިންގްހަމް އަގެއިން"އަށް މިހާތަނަށް ލިބުނު އާމްދަނީގެ އަދަދަކީ 294.34 ކްރޯޑު ރުޕީސްއެވެ.
ފިލްމު ޑައިރެކްޓަރު ރޯހިތު ޝެޓީ--ފޮޓޯ/ފިލްމުފެއަ
ރޯހިތު ޝެޓީގެ އެންމެ މަގުބޫލު އެއް ފްރެންޗައިސް ކަމަށްވާ "ސިންގަހްމް އަގެއިން"އަށް ލިބެމުން އަންނަ ކާމިޔާބީއާ ގުޅިގެން ފިލްމުގެ ކާސްޓުންނާއި ޓީމުން އުފާފާޅުކުރަމުން އަންނައިރު މިއީ ރޯހިތުގެ ކެރިއަރުގެ 100 ކްރޯޑު ކްލަބުން ޖާގަ ހޯދި ފަސްވަނަ ފިލްމެވެ.
ފިލްމު "ސިންގްހަމް އަގެއިން"އާ އެއް ދުވަހެއްގައި ރިލީޒްކުރި އެކްޓަރު ކާތިކް އާރްޔަންގެ ފިލްމު "ބޫލް ބުލައްޔާ 3"އަށް ރޯހިތުގެ ފިލްމުގެ ހިޔަނި އެޅުމުގެ ސަބަބުން އުއްމީދުކުރި ވަރަށް އެ ފިލްމަށް ބޮކްސް އޮފީހުގައި ކުރި ހޯދޭ ގޮތެއް ނުވެއެވެ. އެހެންނަމަވެސް، އެ ފިލްމުގެ ސެޓެލައިޓް ރައިޓްސް ވިއްކާލައިގެން ފިލްމުގެ ޚަރަދު ފޫބެއްދޭނެ ކަމަށް ލަފާކުރެވޭ ކަމަށް ރިޕޯޓުތައް ބުނެއެވެ.
ފިލްމު "ސިންގްހަމް އަގެއިން" އަކީ އަޖޭ ދޭވްގަން، އަރުޖުން ކަޕޫރު، ދީޕިކާ ޕަދުކޯން އަދި ކަރީނާ ކަޕޫރު ޚާން މުހިއްމު ރޯލް ކުޅެފައިވާ ވަރަށް ވަރުގަދަ އެކްޝަން ތުރިލާއެކެވެ. ފިލްމުގައި އަރުޖުން ކަޕޫރު ކުޅެފައިވާ ރޯލުގެ ފުރިހަމަކަމުން ގިނަ ބައެއްގެ ތައުރީފު އަރުޖުންއަށް އަންނަނީ އޮހެމުންނެވެ.