ދިވެހިރާއްޖޭގެ ތަޢުލީމަށް ޚިދުމަތްކުރުމުގެ އެންމެ މަތިވެރި ޝަރަފު، ނިޝާން އިއްޒުއްދީނުގެ އިއްޒަތުގެ ވެރިޔާ އަދި ދިވެހިރާއްޖޭގެ އިސްލާމީ ޔުނިވަސިޓީގެ ޗާންސެލަރު ޑރ. މުޙައްމަދު ޒާހިރު ޙުސައިނަށް ރައީސް، ޑރ. މުޙައްމަދު މުއިއްޒު މިރޭ އަރުއްވައިފިއެވެ.
ރައީސް މުއިއްޒު މި ޝަރަފު ޒާހިރަށް އަރުވާފައި ވަނީ ޖުމްހޫރި ދުވަހުގެ މުނާސަބަތުގައި މިރޭ ބޭއްވި ރަސްމިއްޔާތުގައެވެ. މިގޮތުން، ރައީސް މުއިއްޒު ވަނީ ޝަރަފުގެ އައްޑަނައާއި ޝަރަފުގެ މެޑަލް ޒާހިރަށް އަރުއްވާފައެވެ.
މީގެ ކުރިން ޒާހިރު ވަނީ ސަރުކާރުގެ އެކި މަގާމުތައް ފުރުއްވައިފައެވެ. އެގޮތުން ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގެ އެޑިއުކޭޝަން މިނިސްޓަރު ކަމާއި ޔޫތު މިނިސްޓަރުކަން ވެސް ކުރެއްވިއެވެ.
ޑރ. މުޙައްމަދު ޒާހިރު ހުސައިނާއި، ތިން ބޭފުޅުންނާއެކު ރައީސް މުއިއްޒު ފޮޓޯއަކަށް ހުއްޓިވަޑައިގެން -- ފޮޓޯ: ރައީސް އޮފީސް
އެއަށްފަހު ރައީސް މައުމޫންގެ ޚާއްސަ މުސްތަޝާރުގެ މަގާމު ވެސް އަދާކުރެއްވިއެވެ.
ޒާހިރަކީ ނޫސްވެރިކަމުގެ ދާއިރާގައި ވެސް ޚިދުމަތް ކުރައްވައިފައިވާ ބޭފުޅެކެވެ. އެގޮތުން 1979 ވަނަ އަހަރުން 2016 ވަނަ އަހަރުގެ ނިޔަލަށް ނެރުނު ދުވަހު ނޫސް ހަވީރުގެ މަސްއޫލު ވެރިޔަކަށް ހުންނެވިއެވެ. އޭނާ ތަފާތު މައުޟޫތަކަށް ނޫސްތަކާއި މަޖައްލާތަކަށް ލިޔުއްވައިފައިވެއެވެ.