މިދިޔަ ސަރުކާރުން ފެށި "ގެދޮރުވެރިޔާ" ސްކީމްގެ ދަށުން ތަރައްގީކޮށްފައިވާ 4،000 ފުލެޓުގެ ހައްގުވެރިން ކަނޑައަޅައި، އަންނަ ހަފުތާގައި ވަގުތީ ލިސްޓު އާންމުކޮށް، އަހަރު ނިމުމުގެ ކުރިން އެ ފުލެޓުތައް ހަވާލުކުރާނެ ކަމަށް ހައުސިން މިނިސްޓަރު ޑރ. އަލީ ހައިދަރު ރޭ ވިދާޅުވެއްޖެއެވެ.
ފުލެޓު ލިބޭ މީހުން އާންމުކުރަން ހައުސިން މިނިސްޓްރީން ނިންމީ މިދިޔަ މަހުގެ ތެރޭގައެވެ. ނަމަވެސް، ހުރިހާ ފޯމުތަކެއް ރީއިވެލުއޭޓް ކުރުމަށް އިތުރު ވަގުތު ބޭނުންވާ ކަމަށް ބުނެ، އެ ކަން ފަސްކުރީއެވެ.
ދައުލަތުގެ މީޑިއާގައި ވާހަކަދައްކަވަމުން މިނިސްޓަރު ވިދާޅުވީ، 4،000 ފުލެޓަށް އެދި 20،697 ފޯމު ހުށަހަޅާފައިވާ ކަމަށެވެ. މިނިސްޓަރު ވިދާޅުވި ގޮތުގައި އެ ހުރިހާ ފޯމެއް އެއްކޮށް ރީއިވެލުއޭޓު ކުރުމަށް ފަހު، ކުރިއަށް އޮތް ހަފުތާގެ ތެރޭގައު ވަގުތީ ލިސްޓު އާންމުކޮށް ޝަކުވާގެ ފުރުސަތު ހުޅުވައިލާނެއެވެ.
ގެދޮރުވެރިޔާ ސްކީމްގެ ދަށުން ދޫކުރާ 4،000 ފުލެޓު ހަވާލުކުރުން ލަސްވީ އެންޓި ކޮރަޕްޝަން ކޮމިޝަން (އޭސީސީ)ން އެ ފުލެޓުތަކާ ގުޅޭ މައްސަލަ ބެލުމަށް ފަހު، އެންގި އެންގުމާ ގުޅިގެންނެވެ. އެ ކޮމިޝަނުން ނިންމީ މިދިޔަ ސަރުކާރުން ފުލެޓުތައް ދޫކޮށްފައިވަނީ ގޯސްކޮށް ކަމަށެވެ.
އެއާ އެކު ފުލެޓުގެ ކަންތައްތަކާ ގުޅިގެން އުފައްދާފައިވާ ކޮމިޓީއާއި މާލެ ސިޓީ ކައުންސިލްގެ ފަސް މެންބަރުން ހިމެނޭ ކޮމިޓީގެ ލަފާއާ އެކު ވަނީ ފޯމުތައް ރީއިވެލުއޭޓް ކުރަން ނިންމައި، އެ މަސައްކަތް ފަށައިފައެވެ.
"ތަހުގީގުކޮށް ނިންމާފައި އަޅުގަނޑުމެންނަށް ރިޕޯޓު ފޮނުވިއިރު މި އޮތީ، ވަރަށް ބޮޑަށް އަޅުގަނޑުމެންނަށް އެ އޮތް ގޮތަށް ވެއްޖިއްޔާ ލިސްޓު އޮތް ގޮތަށް ދޫނުކުރެވޭ ގޮތަށް. އެއީ 60 ޕަސަންޓު އެއްގޮތަކަށް ވެސް ޝަރުތު ހަމަނުވާ ކަމަށް މި އޮތީ،" މިނިސްޓަރު ވިދާޅުވިއެވެ.
ގެދޮރުވެރިޔާ ސްކީމުން ފުލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި 15،000 އަށްވުރެ ގިނަ މީހުނަށް ފުލެޓު ދިނުމަށް އެމްޑީޕީ ސަރުކާރުން އޮތީ ނިންމައިފައެވެ.