އިސްރާއީލުން ފަލަސްތީނުގެ ޣައްޒާގައި ކުރަމުންދާ ހަނގުރާމަ ހުއްޓުމަކަށް ގެނެސް، ހަމާސް ޖަމާއަތާއި އިސްރާއީލު ސުލްހަކޮށް އެއްބަސްވުމަކަށް ގެނެވޭތޯ އިސްވެ ޤަތަރުން ކުރަމުންދިޔަ މަސައްކަތް މެދުކަނޑާލައިފިއެވެ.
އެ މަސައްކަތް ފަށާނީ ހަނގުރާމަ ހުއްޓާލުމަށް ދެ ފަރާތުން ވެސް އެ މީހުންގެ އަމިއްލައަށް މަސައްކަތްކޮށް ސީރިއަސްވުމުން ކަމަށް ޤަތަރުން ވަނީ ބުނެފައެވެ.
ޤަތަރުގެ ޚާރިޖީ ވުޒާރާގެ ތަރުޖަމާނު މަޖީދު އަލް އަންސާރީ ހޮނިހިރު ދުވަހު އެކްސްގައި ކުރެއްވި ޕޯސްޓެއްގައި ވިދާޅުވީ، ޤަތަރުން ނިންމާފައިވާގޮތް މީގެ 10 ދުވަސް ކުރިން ކަމާބެހޭ ފަރާތްތަކަށް އަންގާފައިވާ ކަމަށެވެ.
މިސްރާއި އެމެރިކާ ވެސް ބައިވެރިވާ މަޝްވަރާތަކުގައި މިހާތަނަށް ހަމަލާތައް ހުއްޓުވުނީ މިދިޔަ އަހަރުގެ ނޮވެމްބަރު މަހު އެންމެ ހަފުތާއަކަށް އެކަންޏެވެ. މިހާރު ކުރިއަށްދާ މަޝްވަރާތައް ވެސް ވަނީ މާ ބޮޑު ކުރިއެރުމެއް ނުލިބި ވަކި ހިސާބަކުން ހުއްޓިފައެވެ.
މިދިޔަ އަހަރުގެ އޮކްޓޯބަރު މަހުގެ ހަތްވަނަ ދުވަހު ހަމާސްއިން އިސްރާއީލަށް ދިން ހަމަލާތަކާ އެކު އިސްރާއީލުން ދޭން ފެށި ހަމަލާތައް ހުއްޓުމަކަށް ގެނައުމަށް އެ ވަގުތުން ފެށިގެން ޤަތަރުން އަންނަނީ މަސައްކަތްކުރަމުންނެވެ. ގަތަރަކީ 2012 ވަނަ އަހަރުން ފެށިގެން ހަމާސްގެ ލީޑަރުންނަށް އެ ގައުމުން ހިމާޔަތް ދީ ސިޔާސީ މަސައްކަތްކުރުމަށް އެމެރިކާގެ ވެސް ރުހުމާ އެކު އެހީވަމުން އަންނަ ގައުމެކެވެ.
ނަމަވެސް، ހޮނިހިރު ދުވަހު އެސޯސިއޭޓެޑް ޕްރެސްއިން ޑިޕްލޮމެޓިކް މަސްދަރަކާ ހަވާލާދީ ރިޕޯޓްކޮށްފައިވާ ގޮތުގައި ޤަތަރުގައި ހުންނަ ހަމާސްގެ ސިޔާސީ އޮފީހަކީ މިހާރު މަސައްކަތްކުރާ އޮފީހެއް ނޫން ކަމަށެވެ.
އަލް އަންސާރީ ވިދާޅުވީ، ދޯހާގައި ހުންނަ ހަމާސްގެ ސިޔާސީ އޮފީހާ ގުޅޭ ރިޕޯޓްތައް ތެދު ނޫން ކަމަށާއި ޤަތަރުގައި ހުންނަ އެ އޮފީހުގެ މައިގަނޑު އަމާޒަކީ ކަމާބެހޭ ފަރާތްތަކުގެ މެދުގައި މުއާމަލާތްކުރުމުގެ ޗެނަލަކަށްވުން ކަމަށެވެ.
ހަމާސްގެ އިސް އޮފިޝަލަކު ވިދާޅުވީ، މެދުވެރިއެއްގެ ދައުރު އަދާކުރުން ޤަތަރުން މެދުކަނޑާލަން ނިންމިކަން އެ މީހުންނަށް އެނގޭ ކަމަށާއި، ނަމަވެސް، ޤަތަރުގައި ހުންނަ އެ ޖަމާއަތުގެ އޮފީހުގެ މަސައްކަތް ހުއްޓާލުމަށް އެއްވެސް ފަރާތަކުން އަންގާފައި ނުވާ ކަމަށެވެ.
ވޮޝިންޓަން ޑީސީން އެމެރިކާގެ އޮފިޝަލަކު ވިދާޅުވީ، ދޯހާގައި ހަމާސްގެ އޮފީސް ހިންގުމަކީ މިހާރު ބޭނުންތެރި ކަމެއް ނޫން ކަމަށާއި ހަމާސްގެ ވަފުދު ވެސް އަބުރާ ފޮނުވާލަންޖެހޭ ކަމަށް އެމެރިކާގެ ރައީސް ޖޯ ބައިޑަންގެ ސަރުކާރުން މީގެ ދެ ހަފުތާ ކުރިން ޤަތަރަށް އަންގާފައިވާ ކަމަށެވެ.
އިސްރާއީލުން ޣައްޒާއަށް ދެމުންގެންދާ ހަމަލާތަކުގައި މިހާތަނަށް 43،000 އަށްވުރެ ގިނަ މީހުން ޝަހީދުކޮށްލާފައިވާއިރު، އެތައް ބަޔަކު ވަނީ ޒަޚަމްކޮށްލާފައެވެ. އޭގެ ތެރޭގައި 70 އިންސައްތަ މީހުންނަކީ އަންހެނުންނާއި ކުޑަކުދިން ކަމަށް ވެސް އދ ން ވަނީ ހާމަކޮށްފައެވެ.