ސަރުކާރުން ކުރިޔަށްގެންދާ ފަސް މިލިއަން ގަސް މަޝްރޫއުގެ ދަށުން މޯލްޑިވްސް އިސްލާމިކްބޭންކުން 1000ގަސް އިންދައިފިއެވެ.
އެމްއައިބީން މިއަދު ކުރިއަށް ގެންދިޔަ ގަސް އިންދުމުގެ ހަރަކާތުގެ ތެރެއިން 1000 ގަސް އިންދާފައިވަނީ މާލެ ސަރަހައްދުގެ ރައްޔިތުން ދަތުރު ދިޔުމަށް ހާއްސަކޮއްފައިވާ ކ. ކުޑަގިރީގައެވެ.
އެމްއައިބީގެ މި ހަރަކާތް ރާވާ އިންތިޒާމުކުރުމުގައި ހަރަކާތްތެރިވެފައި ވަނީ ކްލީން މޯލްޑިވްސް ޖަމިއްޔާއިން ކަމަށް އެ ބޭންކުން ބުނެއެވެ. މީގެ އިތުރުން އެޗްޑީސީއާއި އެމްޓީސީސީ، އޭޝިއާ ފޯވަޑިން، އައިކެއާ، މޯލްޑިސް ޕޮލިސް ސާވިސް އަދި ދަ ހޯކްސް ޕްރައިވެޓް ލިމިޓެޑުން ޕާޓްނަރުންގެ ގޮތުގައި މި ހަރަކާތުގައި ބައިވެރިވެފައި ވާކަމަށް އެ ބޭންކުން ވަނީ ބުނެފައެވެ.
އެޗްޑީސީގެ ބޮޑު އެހީތެރިކަމަކާއިއެކު އެމްއައިބީއިން ކުރިޔަށް ގެންދިޔަ ގަސްއިންދުމުގެ ހަރަކާތުގައި ގިޔާސުއްދީން ސްކޫލްގެ ގިނައަދަދެއްގެ ދަރިވަރުންނާއި ބެލެނިވެރިން ބައިވެރިވެފައި ވާކަން އެ ބޭންކުން ވަނީ ފާހަގަކޮށްފައެވެ.
މި ހަރަކާތް ރަސްމީކޮއް ފައްޓަވައިދެއްވީ އެމްއައިބީގެ ސީއީއޯ މުފައްދަލް އިދްރީސް ހުމްރީއެވެ. މި ހަރަކާތް ފެށުމުގެ ގޮތުން ދެއްކެވި ވާހަކަފުޅުގައި ސީއީއޯ ވަނީ ތިމާވެށި ހިމާޔަތް ކުރުމަކީ ކޮންމެ މީހެއްގެ ވެސް ފަރުދީ ޒިންމާއެއްކަމަށް ދެކިގެން ކުރިޔަށް ދިޔުމަށް ނަސޭހަތްތެރި ވެފައެވެ.
އެމްއައިބީއަކީ އިޖްތިމާއީ ކަންކަމަށް ބޮޑެތި ހޭދަތަކެއް ކުރަމުންދާ ކުންފުންފުންޔެކެވެ. އަދި މިއީ ރާއްޖޭގައި އެންމެ ހަލުވިކަމާއިއެކު ކުރިއަރަމުން އަންނަ ބޭންކެވެ.