މިދިޔަ ބުރާސްފަތި ދުވަހު ހުޅުމާލޭ ދެވަނަ ފިޔަވަހީގެ ހިޔާ ފުލެޓެއްގައި މީހަކު ރަހީނުކުރި މައްސަލައިގައި ހައްޔަރުކުރި 12 މީހުންގެ ވަނަވަރު ފުލުހުން އާންމުކޮށްފިއެވެ.
ސޯޝަލް މީޑިއާގައި ދައުރުވަމުންދާ ފޮޓޯތަކާއި ވީޑިއޯތަކުގައިވާ ގޮތުން އެ ހާދިސާ ހިނގައިފައިވަނީ ނުވަ ވަނަ ޓަވަރުގެ 20 ވަނަ ފްލޯގެ 11 ވަނަ އެޕާޓްމެންޓުގައެވެ.
އެ މައްސަލައިގައި ހައްޔަރުކުރި މީހުންނަކީ:
- އަލްމާން އަލީ ޚާލިދު، 22އ، ގދ. ވާދޫ/ ވެހި
- މުޙައްމަދު އިޒްކާން، 18އ، މ. ހަތިކަނޑު
- އިޒާން އަހުމަދު، 18އ، މ. ހަތިކަނޑު
އެ ތިން މީހުން ފަސް ދުވަހަށް ބަންދު ކުރުމަށް ކްރިމިނަލް ކޯޓުން އަމުރުކޮށްފައިވާ ކަމަށް ފުލުހުން ބުންޏެވެ. ބާކީ ނުވަ މީހުންނަށް ކޯޓުން ޖެހީ ހަތް ދުވަހެވެ. އެއީ:
- އަހުމަދު ޒާހިދު، 36އ، ށ. ފޯކައިދޫ/ ދަންމަރު
- އާދަމް ހުސައިން، 48އ، ލ. މާވަށް/ ޖަމީލާ މަންޒިލް
- އިބްރާހީމް ނަޝީދު، 34އ، ލ. އިސްދޫ/ ހިޔާލީގުލްޝަން
- އަހުމަދު ސަމީހު، 22އ، ބ. ގޮއިދޫ/ ނައިޓްސްޓާ
- އިސްމާއީލް ވިޝާމް މުހައްމަދު، 29އ، ވ. ގާމާ
- ވިޝަމް މުހައްމަދު، 23އ، ގދ. ވާދޫ، ޗިޗަންޑާގެ
- ވިސާން މުހައްމަދު، 30އ، ހުޅުމާލެ ހިޔާ 3-17-14
- މުސްތާގު ޝާކިރު، 37އ، ގދ. ވާދޫ، ޖަނަވަރީގެ
- ހަސަން ގާލިބް، 38އ، މ. ކޮޅުފުށި، އާރެސް
ރަހީނުކޮށްފައި ހުރި މީހާ ސަލާމަތް ކުރަން ދިޔައިރު އެ މީހާއަށް ބިރު ދައްކައި، އޭނާގެ ބޯ ބާލައިފައިވާ މަންޒަރު ވެސް ވީޑިއޯތަކުން ފެނެއެވެ.
މީގެ އިތުރުން އެ މީހާއަށް އަނިޔާކުރުމަށް ބަހައްޓައިފައިހުރި ކަމަށް ބެލެވޭ ބައެއް ތަކެތި ވެސް ވީޑިއޯތަކުން ފެނެއެވެ.
އެ މީހާ ސަލާމަތް ކުރުމަށް ކުރިއަށްގެންދިޔަ އޮޕަރޭޝަން ބައްލަވައިލެއްވުމަށް ހޯމް މިނިސްޓަރު އަލީ އިހުސާން ވެސް ވަޑައިގަތެވެ.
އެ މައްސަލައާ ގުޅޭ ގޮތުން އިހުސާން ވިދާޅުވީ ބައެއް ފުލެޓުތަކާއި އެ ނޫންވެސް ތަންތަން ތަކުރާރުކޮށް ކުށްކުރާ ތަންތަނުގެ ގޮތުގައި ބޭނުންކުރާކަން ފާހަގަވާ ކަމަށާއި، އެފަދަ ތަންތަން ގާނޫނަށް ބަދަލު ގެނެސްގެން ނަމަވެސް ދައުލަތަށް ނެގޭނެ ގޮތެއް ހަމަޖައްސަވާނެ ކަމަށެވެ.
ހިޔާ ފުލެޓުތަކަށް މީހުން އޮޅުވާލައިގެން ގެންގޮސް، ބިރުދައްކައި، ރަހީނުކޮށްގެން ފައިސާ ހޯދުމުގެ މައްސަލަތަކެއް މީގެ ކުރިން ވެސް ފެންމަތިވެފައިވެއެވެ.