އެމެރިކާގެ ރިޔާސީ އިންތިޚާބުގެ ކުރިން ރިޕްބަލިކަން ޕާޓީގެ ރިޔާސީ ކެންޑިޑޭޓް ޑޮނަލްޑް ޓްރަމްޕް އަވަހާރަކޮށްލަން ރޭވިކަމުގެ ތުހުމަތުގައި މީހަކަށް ދައުވާ ކޮށްފިއެވެ.
އެމެރިކާގެ ޖަސްޓިސް ޑިޕާޓްމަންޓުން ހުކުރު ދުވަހު މެންހަޓަންގެ ފެޑެރަލް ކޯޓަށް ހުށަހެޅި ޖިނާއީ އެ މައްސަލައިގައި ބުނެފައި ވަނީ އީރާނުގެ ރިވޮލިއުޝަނަރީ ގާޑުގެ އޭޖެންޓަކު އޮކްޓޯބަރު މަހު، ޓްރަމްޕް އަވަހާރަކޮށްލުމުގެ ރޭވުމެއް އެކުލަވާލުމަށް އަފްޣާން ރައްޔިތެއް ކަމަށްވާ ފަރުހާދު ޝަކެރީއަށް އަންގާފައިވާ ކަމަށެވެ.
ނަމަވެސް ޝަކެރީ އެކަމަށް އިޖާބަ ނުދިން ކަމަށް ދައުވާގައިވެއެވެ. ރިވޮލިޔުޝަނަރީ ގާޑުން އެދުނީ އެމެރިކާގެ އިންތިޚާބު ބޭއްވި ދުވަސް ކަމަށްވާ މިދިޔަ އަންގާރަ ދުވަހުގެ ކުރިން ހަމަލާ ދިނުމަށް ކަމަށް އަލް ޖަޒީރާއިން ރިޕޯޓުކޮށްފައިވެއެވެ.
އެޓާނީ ޖެނެރަލް މެރިކް ގާލަންޑް ނެރުނު ބަޔާނެއްގައި ވިދާޅުވީ ޓްރަމްޕް އަވަހާރަކޮށްލަން އުޅުނު މީހެއްގެ މައްޗަށް ޖަސްޓިސް ޑިޕާޓްމަންޓުން ދައުވާ ކޮށްފައިވާ ކަމަށެވެ. އަދި އީރާނުން އެމެރިކާގެ ގައުމީ ސަލާމަތަށް ނުރައްކާ ކުރާ ކަމަށް ވެސް އެ ބަޔާނުގައިވެއެވެ.
އެ ތުހުމަތުތައް އީރާނުން ވަނީ ދޮގުކޮށްފައެވެ.
ޝަކެރީއަކީ ނިއުޔޯކް ސިޓީގެ ރައްޔިތުން ކަމަށްވާ ކާލިސެލް ރިވެރާ އާއި ޖޮނަތަން ލޮޑްހޯލްޓާއެކު، އީރާނަށް ފާޑުކިޔާ އެމެރިކާގެ ނޫސްވެރިއަކު މަރާލުމަށް ރޭވި ރޭވުމެއްގައިވެސް ބައިވެރިވެފައިވާ ކަމަށް ތުހުމަތުކުރެވޭ މީހެކެވެ.
ރިވެރާއާއި ލޮޑްހޯލްޓާ އެ ނޫސްވެރިޔާއަށް އެތައް މަހެއް ވަންދެން ފާރަލައި، އެ މައުލޫމާތު ގަވާއިދުން ޝަކެރީއަށް ފޯރުކޮށްދީފައިވާ ކަމަށްވެސް އަލް ޖަޒީރާއިން ބުނެފައިވައެވެ.
ޖަސްޓިސް ޑިޕާޓްމަންޓުން ބުނާ ގޮތުގައި ޝަކެރީއަކީ ކުޑައިރު އެމެރިކާއަށް ހިޖުރަކޮށްފައިވާ މީހެކެވެ. ނަމަވެސް ފޭރުމުގެ ކުށް ސާބިތުވެ 2008 ވަނަ އަހަރު އޭނާ ވަނީ ޑީޕޯޓުކޮށްފައެވެ.
އެފްބީއައި އިން ބުނެފައި ވަނީ ޖުލައި 13 ވަނަ ދުވަހު ޕެންސިލްވޭނިއާގެ ޓްރަމްޕް އަވަހާރަކޮށްލަން ކުރި މަސައްކަތަށް ފަހު ޓްރަމްޕަށް އިންޒާރުތައް އިތުރުވި ނަމަވެސް އެ ހަމަލާއަކީ ބޭރުގެ އެއްވެސް ފަރާތަކާ ގުޅުން ހުރި ހަމަލާއެއް ކަމަށް ނުބެލެވޭ ކަމަށެވެ.
ސެޕްޓެމްބަރު މަހު ޓްރަމްޕް އަވަހާރަކޮށްލުމަށް ދެވަނަ ފަހަރަށް ކުރި މަސައްކަތަކީ ވެސް ބޭރުގެ އެއްވެސް ސަރުކާރަކާ ގުޅުން ހުރި ކަމެއް ނޫން ކަމަށް އޮފިޝަލުން ބުނެއެވެ.
ނަމަވެސް އޭގެކުރިން އޮގަސްޓް މަހު ޖަސްޓިސް ޑިޕާޓްމަންޓުން ބުނެފައި ވަނީ އެމެރިކާގައި ބަޔަކު މަރާލުމަށް ރޭވި ކަމަށް ތުހުމަތު ކުރެވޭ ޕާކިސްތާނުގެ މީހެއްގެ މައްޗަށް ދައުވާ އުފުލާފައިވާ ކަމަށެވެ.
ހުކުރު ދުވަހު ޖަސްޓިސް ޑިޕާޓްމަންޓުން ނެރުނު ބަޔާނުގައި ވަނީ އީރާނުން ދުނިޔޭގެ ގައުމުތަކުގައި ދިރިއުޅޭ އެމެރިކާ އާއި އެގައުމުގެ އެކުވެރި ގައުމުތަކުގެ ރައްޔިތުންނަށް ހަމަލާދީ، ރަހީނުކުރުމާއި، މަރާލުން ފަދަ ހަމަލާތައް ދިނުމަށް މަސައްކަތްކުރަމުންދާ ކަމަށެވެ.
އެގޮތުން އީރާނުން އެކަން ކުރަނީ 2020 ވަނަ އަހަރުގެ ޖެނުއަރީ މަހު އެމެރިކާއިން އިސްލާމިކް ރިވޮލިއުޝަނަރީ ގާޑް ކޯޕްސްގެ ކޮމާންޑަރު ޤާސިމް ސުލައިމާނީ އިރާގުގައި މަރާލި މައްސަލައިގެ ބަދަލު ހިފުމަށް ކަމަށްވެސް ބުނެފައިވެއެވެ. އޭރު އެމެރިކާގެ ވެރިކަމުގައި ހުންނެވީ ޓްރަމްޕެވެ.