ތޫނު ހަތިޔާރު ބޭނުންކޮށްގެން ގޭންގު މާރާމާރީ ހިންގުމުގެ ތުހުމަތުގައި ހަތަރު ޒުވާނުން ތަހުގީގީ މަރުހަލާއާއި ޝަރީއަތުގެ މަރުހަލާ ނިމެންދެން ބަންދުކުރަން ކްރިމިނަލް ކޯޓުން އިއްޔެ އަމުރުކޮށްފިއެވެ.
އެއީ، 21 އަހަރުގެ ދެ ޒުވާނުންނާއި 22 އަހަރުގެ ޒުވާނެއްގެ އިތުރުން 23 އަހަރުގެ ޒުވާނެކެވެ.
ކްރިމިނަލް ކޯޓުގެ ކޯޓު އަމުރުގައި ވާގޮތުން ތުހުމަތުކުރެވޭ މިންވަރަށް މި ހަތަރު މީހުންގެ މައްޗަށް ވެސް ހެކި ހުށަހަޅާފައި ވެއެވެ. އޭގެތެރޭގައި ތަހުގީގީ ބަޔާންތަކާއި، ސީސީޓީވީ ފުޓޭޖާއި އިންޓެލިޖެންސް ރިޕޯޓުގެ އިތުރުން ވެސް އިތުރު ހެކި ހުށަހަޅައިފައި ވެއެވެ.
މި މާރާމަރީއަކީ ކޮން ސަބަބަކާހުރެ ހިންގި މަރާމާރީއެއްކަމާއި މާރާމާރީގެ އިތުރު ތަފުސީލު އިންޓެލިޖެންސް ރިޕޯޓުގައި ފާހަގަކޮށްފައިވާކަމަށް ކޯޓު އަމުރުގައި ވެއެވެ. އަދި މި މާރާމާރީގައި ޖިސްމާނީ އަނިޔާއެއް ހިމެނޭކަން އެނގޭ ހެކި ހުށަހަޅާފައި ވާކަމަށް ވެސް ކޯޓު އަމުރުގައި ވެއެވެ.
ކޯޓު އަމުރުގައި ވާގޮތުން މާރާމާރީއަށްފަހު މި މީހުން ވަނީ ފުރައިގެން އެހެން ރަށަކަށް ގޮސްފައެވެ. އެހެންކަމުން އެމީހުން ހައްޔަރުކުރުމަށް ފަހު ފުރަތަމަ ހާޒިރުކުރީ އދ. މަހިބަދޫ މެޖިސްޓްރޭޓް ކޯޓަށެވެ.
ނަމަވެސް، މިހާރު ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކޮށްފައި ވަނީ ޖިނާއީ އިޖުރާއަތުގެ ގާނޫނާ ޚިލާފަށްކަމަށް ނުދެކޭ ކަމަށް އެ ކޯޓު އަމުރުގައި ވެއެވެ.
މި މީހުން ބައިތިއްބަނީ ދޫނިދޫ ޖަލުގައިކަން ކޯޓުު އަމުރުގައި ވަނީ ފާހަގަކޮށްފައެވެ.