މިދިޔަ އަންގާރަ ދުވަހުގެ ފަތިހު މަޖީދީ މަގުގައި ހުންނަ ފިހާރައެއް ފަޅާލައި ވަގަށް ނެގި ތަކެތީގެ އަގު އެއް ލައްކައަށް އަރާކަން ހާމަވެއްޖެއެވެ.
މަޖީދީ މަގުގައި ހުންނަ "ޒިއޯން މޯބައިލްސް 4" ފިހާރައިގެ ބިއްލޫރިގަނޑު ތަޅާލައި އެ ފިހާރައިން ވައްކަންކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި އާންމުވެފައިވެއެވެ. އެ ވީޑިއޯއިން އެ މީހާ ކޮތަޅުތަކަށް ފޯނުތައް އަޅައިގެން ދާ މަންޒަރު ފެނެއެވެ.
ފުލުހުން ވަނީ އެ މައްސަލައިގެ ރިޕޯޓު ލިބިފައިވަނީ އެ ދުވަހުގެ ފަތިހު 5:35 ހާއިރު ކަމަށް ބުނެފައެވެ.
އެ މައްސަލައިގައި ހއ. މާރަންދޫ، ފިނިރޯޅި، އަހުމަދު ނިޔާޒް (47އ) ވަނީ ހައްޔަރުކޮށްފައެވެ.
އެ މީހާ އަންގާރަ ދުވަހު ކްރިމިނަލް ކޯޓަށް ހާޒިރުކުރުމުން އޭނާގެ ބަންދަށް 20 ދުވަސް ޖަހައިފައިވާއިރު، އެ އަމުރުގައިވާ ގޮތުން އޭނާއަކީ އެފަދަ މައްސަލަތަކުގެ ހައްޔަރާއި ބަންދު ލޮގް އޮތް މީހެކެވެ.
ފިހާރައިން ވައްކަންކުރުމުގެ ތުހުމަތުގައި ހައްޔަރުކުރި އަހުމަދު ނިޔާޒް: އޭނާ އަތުން ނުވަ ފޯނު ފެނުނު ކަމަށް ފުލުހުން ބުނި --- ފޮޓޯ/ ފުލުހުން
އެ އަމުރުގައިވާ ގޮތުން ތުހުމަތު ކުރެވޭ މީހާ އެ ފިހާރައިން ގިނަ އަދަދެއްގެ ސާމާނު ވަގަށް ނަގައިފައިވާ ކަމަށް ތުހުމަތު ކުރެވޭއިރު، އޭނާ ހައްޔަރުކުރިއިރު ގިނަ އަދަދެއްގެ ފޯނު އޭނާގެ އަތުން ފެނިފައިވެއެވެ. އަދި މައްސަލަ ހުށަހެޅި ފަރާތުގެ ބަޔާނުގައި އެ ތަކެތީގެ އަގު ބަޔާންކޮށް ހުށަހެޅި ލިޔުމުން ގެއްލިފައިވާ ތަކެތީގެ އަގު އެއް ލައްކަ ރުފިޔާއަށް ވުރެ މަތިވާކަން އެނގޭ ކަމަށް އަމުރުގައިވެއެވެ.
ޖިނާއީ އިޖުރާއަތުގެ ގާނޫނުގައި، އެއް ލައްކަ ރުފިޔާއިން ފެށިގެން މަތީގެ ފައިސާގެ އަަދަދު ހިމެނޭ ވައްކަމުގެ މައްސަލަތައް ޖިނާއީ ބޮޑު ކުށްތަކުގެ ގޮތުގައި ބެލެން އޮވެއެވެ. އެހެންވެ މި މައްސަލަ ވެސް ބަލަނީ ޖިނާއީ ބޮޑު ކުށެއްގެ ގޮތުގައި ކަމަށް ކްރިމިނަލް ކޯޓުން ފާހަގަކޮށްފައިވެއެވެ.
ފުލުހުންނަށް އެންމެ ގިނައިން ރިޕޯޓުކުރާ ކުށަކީ ވައްކަން ކަމަށްވާއިރު، ތަފާސްހިސާބުތަކުން ދައްކާ ގޮތުގައި މި އަހަރުގެ މިހާތަނަށް ވައްކަމުގެ 3،140 މައްސަލަ ހުށަހަޅައިފައިވެއެވެ.