މީގެ ތިން އަހަރު ކުރިން ކައިވެންޏެއް ކޮށް، ވަރިވީއިރު ވެސް އެ ކައިވެންޏަށް ރަނުގެ ގޮތުގައި ދޭން އެއްބަސްވި 85،000 ރުފިޔާ ނުދީވާތީ އެ ހޯދައިދިނުމަށް ކޯޓުން ހުކުމެއް ކޮށްފިއެވެ.
އެ ހުކުމް ކޮށްފައިވަނީ މިދިޔަ މަހު ފަހުކޮޅެވެ.
މި މައްސަލަ ފެމެލީ ކޯޓަށް ހުށަހެޅީ 2021ވަނަ އަހަރުގެ ޖޫން 21 ވަނަ ދުވަހު ކުރި ކައިވެންޏެއްގެ ރަން އަދިވެސް އަންހެން މީހާއަށް ލިބިފައިނުވާތީ އެ ހޯދުމަށެވެ.
ހުކުމުން އެނގޭ ގޮތުގައި އެންމެ ފުރަތަމަ ރަނުގެ މިންވަރުކަމަށް ލިޔެފައިވަނީ ހައްޖު ދަތުރެކެވެ. ނަމަވެސް އޭގެ މަތީ ރޮނގެއް ދަމައިލުމަށްފަހު، 85،000 ރުފިޔާ ފަހުން އޮތީ ލިޔެފައެވެ. އަދި ކައިވެނީގެ ސެޓްފިކެޓުގައި ވެސް ލިޔެފައިވަނީ އެ އަދަދެވެ.
ކޯޓު ހުކުމްގައި ފާހަގަކޮށްފައިވާ ގޮތުން އެ ދެ މީހުން ކައިވެނިކޮށްގެން އުޅުނުއިރު ވެސް އޭނާއަށް އެއްވެސް ޚަރަދެއް ކޮށްފައިނުވާ ކަމަށް އަންހެން މީހާ ވަނީ ކޯޓުގައި ބުނެފައެވެ.
އަދި އޭނާ އެދެނީ ރަނުގެ ފައިސާ އެއްފަހަރާ ދައްކައި ޚަލާސްކުރަންކަމަށް ވެސް ބުނެފައިވެއެވެ. އެއީ އޭނާގެ ފިރިމީހާގެ މަންމަ ގޭގެ އެޕާޓްމަންޓެއް ކުއްޔަށް ދީފައިވާތީ އެ ފައިސާ އެކީ އެއްފަހަރާ ދޭން ދަތިނުވާނެތީކަަމަށް އަންހެން މީހާ ކޯޓުގައި ބުންޏެވެ.
ފިރިހެން މީހާއަކީ މަސްތުވާތަކެތީގެ ވަބާގައިޖެހި ފަރުވާ ހޯދަމުން އަންނަ މީހެއްކަން ވެސް ކޯޓު ހުކުމުން އެނގެއެވެ.
ކޯޓު ހުކުމުން އެނގޭ ގޮތުގައި މިހާރު އެ މީހުން ވަނީ ވަރިވެފައެވެ.
އެއާއެކު މި މައްސަލައިގައި ކޯޓުން ހުކުމްކޮށްފައިވަނީ މި ހިނގާ ނޮވެމްބަރު އެކަކުން ފެށިގެން 10 މަސް ދުވަހުގެ ތެރޭ، ކޮންމެ މަހަަކު 8،500 ރުފިޔާ ކޯޓަށް ދައްކައި ޖުމްލަ 85،000 ރުފިޔާ ދައްކައި ޚަލާސްކުރުމަށެވެ.
ކައިވެންޏާ ގުޅޭ ޚަރަދުގެ މައްސަލަތައް ފެމެލީ ކޯޓަށް ކޮންމެވެސް މިންވަރަކަށް ހުށަހަޅާކަން ކޯޓުގެ ތަފާސް ހިސާބުތަކުން ހާމަވެއެވެ.