މިއަދުގެ ރީތި ތާރީޚު ކަމަށްވާ 25.1.25 އާ ގުޅުވައި ފެމެލީ ކޯޓުން ކޮށްދީފައިވަނީ 25 ކައިވެނި ކަމަށް އެ ކޯޓުން ބުނެފިއެވެ.
ރީތި ތާރީޚުތަކާ ގުޅުވައި ކައިވެނި ކުރުމަކީ ގިނަ ބައެއްގެ މެދުގައި މަގުބޫލު ކަމެކެވެ. މީގެ ކުރިން ވެސް ރާއްޖޭގައި ރީތި ތާރީޚުތަކާއި، ޚާއްސަ ދުވަސްތަކާ ދިމާކޮށް އެއް ދުވަހެއްގައި ގިނަ ކައިވެނިތަކެއް ކޮށްފައި އެބަހުއްޓެވެ.
އެއާއެކު މިއަދުގެ ތާރީޚާ ގުޅުވައި ކުރި ކައިވެނީގެ އަދަދު ހިއްސާކުރަމުން ފެމެލީ ކޯޓުން ބުނީ މިއަދު އެ ކޯޓުން ކޮށްދިނީ 25 ކައިވެނި ކަމަށެވެ. ނަމަވެސް މިއީ ރީތި އެހެން ތާރީޚުތަކުގައި އާންމުކޮށް ކައިވެނިކޮށްދޭ މިންވަރާ އަޅައިބަލާއިރު މަދު އަދަދެއްކަމަށް އެ ކޯޓުން ބުންޏެވެ.
އެއާއެކު ބުރާސްފަތި ދުވަހާއި ހުކުރު ދުވަހުގެ އިތުރުން މިއަދު ހިމެނޭހެން މި ތިން ދުވަހު އެ ކޯޓުން ކޮށްދިނީ ޖުމްލަ 48 ކައިވެނިކަމަށް ވަނީ މައުލޫމާތު ދީފައެވެ.
އެންމެ ފަހުން ދިމާވި ރީތި އެއް ތާރީޚު ކަމަށްވާ 24.12.24 ގައި މާލޭގައި ފެމިލީ ކޯޓުން 52 ކައިވެނި ކޮށްދީފައިވެއެވެ.