ވޮޝިންޓަން (7 ނޮވެންބަރު 2024) : އެމެރިކާގެ ރިޔާސީ އިންތިޚާބުގައި ޑިމޮކްރެޓިކް ޕާޓީގެ ކެންޑިޑޭޓް ކަމަލާ ހެރިސް އަށް ލިބުނު އާދަޔާޚިލާފު ނާކާމިޔާބީ އަކީ އެމެރިކާގެ ރައްޔިތުންގެ ވިސްނުމަށް ފިކުރަށް ބަދަލުތަކެއް އަންނަން ފަށާފައިވާ ކަމުގެ ހެއްކެއްކަމަށް އެމެރިކާގެ މުހައްލިލުން ވިދާޅުވެއްޖެއެވެ.
އަލްޖަޒީރާގެ "އަ ވިންޑޯ އިންޓު ދަ ޔޫއެސް އިލެކްޝަންސް" ޕްރޮގްރާމުގައި ވާހަކަ ދެއްކެވި އެމެރިކާގެ ހުރިހާ މުހައްލިލުންވެސް އެއްބަސްވެލައްވާ ގޮތުގައި އެމެރިކާގެ ރައީސް އިންތިޚާބު ކުރުމުގައާއި ކޮންގްރެސްގެ މެންބަރުން އިންތިޚާބު ކުރުމުގައި އެމެރިކާގެ ރައްޔިތުން ކުރިން ގެންގުޅޭ ވިސްނުމާއި ފިކުރަށް ބޮޑު ބަދަލެއް އަންނަމުންދާތަން މި ފަހަރުގެ އިންތިޚާބުގައި ފެނިގެން ހިނގައްޖެއެވެ.
މި ފަހަރުގެ ރިޔާސީ އިންތިޚާބު ކާމިޔާބު ކުރައްވާނެ ބޭފުޅަކާމެދު ނެގި ޚިޔާލު ހޯދުމުގެ ހުރިހާ ސާވޭތަކުން ވެސް ހާމަވެފައިވަނީ ޓްރަމްޕާއި ކަމަލާއާ ދެމެދުގައި ތަފާތު ކުޑަކަމުގައެވެ. އަދި އެއް ޕޮއިންޓާއި ދެ ޕޮއިންޓްގެ މިންވަރަކުން ކަމަލާ ކުރީގައި އުޅުއްވާ ކަމެވެ.
ނަމަވެސް އިންތިޚާބުގެ ނަތީޖާ ފެނިގެން ދިޔައީ ދިމާ އިދިކޮޅަށެވެ. ބޮޑު ތަފާތަކުން ކުރި ހޯއްދެވީ ޓްރަމްޕެވެ. އިލެކްޓޯރަލް ވޯޓުން ޓްރަމްޕް 295 ވޯޓު ހޯއްދަވާފައިވާއިރު އެވޯޓުން ކަމަލާއަށް ލިބިފައިވަނީ 226 ވޯޓެވެ. ރައްޔިތުންގެ ފަރުދީ ވޯޓަށް ބަލާއިރު ވެސް ގާތްގަނޑަކަށް ހަ މިލިޔަން ވޯޓުން ޓްރަމްޕް އުޅުއްވަނީ ކުރީގައެވެ.
އިންސައްތައަށް ބަލާއިރު ޓްރަމްޕްވަނީ 51 އިންސައްތަ ހޯއްދަވާފައެވެ. މިހާތަނަށް ކަމަލާއަށް ލިބުނީ 47 އިންސައްތައެވެ. އަދިވެސް ދެ ސްޓޭޓެއްގެ ވޯޓުގެ ނަތީޖާ ނޭންގެއެވެ.
އެމެރިކާގެ މުހައްލިލުންގެ ނަޒަރުގައި އެމެރިކާގެ އާންމުން ވޯޓު ދިނުމަށް ބަލަނީ އާންމުގޮތެއްގައި އިގްތިސާދަށާއި އަމާންކަމަށާ އަދި އެމެރިކާއަށް ޣައިރު ގާނޫނީ ގޮތުން ހިޖުރަކުރާ ހިޖުރަ ވެރިންގެ މައްސަލަތަކަށެވެ. މީގެއިތުރުން މިފަހަރު ދުނިޔޭގެ މައްސަލަތަކާ ބެހޭގޮތުން ވެސް އެމެރިކާ އާންމުންގެ ތެރެއިން ގިނަ ބަޔަކު ވިސްނާފައިވާކަން ހާމަވާކަމަށް އެމެރިކާގެ މުހައްލިލުން ދެކެއެވެ.
މީގެތެރޭގައި ޔުކްރެއިން ހަނގުރާމައާއި ޣައްޒާއާއި ލުބްނާނުގެ އާންމުންނާ ދެކޮޅަށް އިސްރާއީލު ހިންގާ ގަތުލުއާންމުތަކާއި ހަނގުރާމައިގެ ޖަރީމާތަކުގެ މައްސަލަ ހިމެނެއެވެ.
އެމެރިކާގެ މުހައްލިލުންގެ ނަޒަރުގައި އެމެރިކާގެ ވާތު ފިޔައިގެ މީހުންނާއި މުސްލިމުންގެ ވޯޓު ކަމަލާއަށް ނުލިބެއެވެ. އޭގެ ބަދަލުގައި ޔަހޫދީންގެ 80 އިންސައްތަ ވޯޓު ލިބުނީ ކަމަލާއަށެވެ. ޓްރަމްޕަށް ލިބުނީ ޔަހޫދީންގެ 20 އިންސައްތަ ވޯޓެވެ.
މުސްލިމުންނާއި ވާތު ފިޔައިގެ މީހުންގެ ވޯޓު ކަމަލކާއަށް ނުލިބުނީ އިސްރާއީލުގެ އަނިޔާވެރި އަމަލުތަކަށް ޖޯ ބައިޑެންގެ ސަރުކާރުން ވާގިވެރިވުމުގެ ސަބަބުންނެވެ. ޓްރަމްޕަކީ ވެސް ފަލަސްތީނަށް ރަނގަޅު ބޭފުޅެއް ނޫނެވެ. ނަމަވެސް ޓްރަމްޕަކީ ހަނގުރާމައާއި ތަޅާފޮޅުމަށް ގަޔާވާ ބޭފުޅެއް ނޫނެވެ. އެެހެންކަމުން ޓްރަމްޕްގެ ވެރިކަމުގައި އިސްރާއީލުގެ އުދުވާނާއި ޖަރީމާތައް ހުއްޓުވާނެކަމަށް ބަލާފައި ވާތު ފިޔައިގެ މީހުންނާއި މުސްލިމުން ޓްރަމްޕަށް ވޯޓު ދިނީއެވެ.
ޓްރަމްޕަކީ ރަނގަނޅު ބޭފުޅެއް ނޫންނަމަވެސް އިސްރާއީލުގެ ގަތުލުއާންމުތަކާއި ޓެރަރިޒަމްގެ އަމަލުތައް ސްޕޮންސާ ކުރާ އެމެރިކާ ސަރުކާރުގެ ނައިބު ރައީސްކަމަށްވާ ކަމަލާ ހެރިސް އަށް ވޯޓު ދިނުމަކީ އެއްވެސް ހާލެއްގައި ކުރެވޭނެ ކަމެއް ނޫންކަމަށް އެފަރާތްތަކުން ބުނެފައިވާ ކަމަށް އެމެރިކާގެ މުހައްލިލުން ވިދާޅުވެފައިވެއެވެ.
އެމެރިކާގެ ރިޔާސީ އިންތިޚާބު ޑިސައިޑް ކުރާ ސްވިންގް ސްޓޭޓްތަކުގެ އިލެކްޓޯރަލް ވޯޓުތައް ޓްރަމްޕަށް ލިބުނީ އެސްޓޭޓްތަކުގެ ވާތު ފިޔައިގެ މީހުންނާއި މުސްލިމުން ގެ ވޯޓުތަކުގެ ސަބަބުން ކަމަށް ބެލެވޭ ހެކިތައް އެބަހުރިކަމަށް އެބޭފުޅުން ވިދާޅުވިއެވެ. އެމެރިކާގެ މުސްލިމުންގެ އަދަދަކީ ހަ މިލިޔަނެވެ. ނަމަވެސް ވާތު ފިޔައިގެ ވިސްނުމުގެ މީހުންގެ އަދަދު 130 މިލިޔަނަށް އަރާނެކަމަށް ލަފާކުރެވެއެވެ.
ރިޔާސީ އިންތިޚާބާއެކު ބޭއްވި އެމެރިކާގެ ސެނެޓްގެ އިންތިޚާބުވެސް ކާމިޔާބު ކުރީ ޓްރަމްޕްގެ ރިޕަބްލިކަން ޕާޓީއެވެ. ޓްރަމްޕް ވަނީ މިހާރު ހިނގަމުންދާ ހަނގުރާމަތައް ހުއްޓުވައި އިތުރު ހަނގުރާމަތައް ފެށުމުގެ ފުރުސަތު ނުދޭނެކަމަށް ވިދާޅުވެ ވާހަކަ ދައްކަވާފައެވެ.