އެމެރިކާގެ ރައީސް ޑޮނަލްޑް ޓްރަމްޕް މީގެ ފަސް ދުވަސް ކުރިން އައްޔަންކުރެއްވި ވައިޓް ހައުސްގެ އައު ޕްރެސް ސެކްރެޓަރީ ކޭޓީ ޒަކަރާޔާ މަގާމުން ވަކިކޮށްފިއެވެ.
ސީއެންއެން އާއި އެކްސިއޯސް ފަދަ މީޑިއާތަކުގައިވާ ގޮތުން، ޒަކަރާޔާ މިހާރު ވެފައިވަނީ އެމެރިކާގެ ފަހުގެ ތާރީޚުގައި އެންމެ ކުރު މުއްދަތަކަށް ވައިޓް ހައުސްގެ ޕްރެސް ސެކްރެޓަރީކަން ކުރެއްވި މުވައްޒަފަށެވެ.
ރިޕޯޓުތަކުގައިވާ ގޮތުން، ޓްރަމްޕް މިއަދު ނޫސްވެރިންނާ ވާހަކަ ދައްކަވަމުން ވަނީ، ޒަކަރާޔާ މަގާމުގައި ދެމިހުރުމާ މެދު ދެވަނަ ވިސްނުމަކަށް ދިޔުމަށް އޭނާއަށް ލަފާދެއްވާފައިވާކަން ހާމަކުރައްވައިފައެވެ. އަދި މީޑިއާތަކުން އޭނާއާ މެދު އަމަލުކުރީ ވަރަށް ބޭއިންސާފުން ކަމަށް ޓްރަމްޕް ފާހަގަކުރެއްވި ނަމަވެސް، ސަރުކާރުގެ އިސް ތަރުޖަމާނެއްގެ ގޮތުގައި ހުރުމަށް އޭނާ އެކަށީގެންނުވާ ކަމަށް ޓްރަމްޕް ވަނީ އިޝާރާތްކުރައްވާފައެވެ.
ވައިޓް ހައުސްގެ އޮފިޝަލަކު ވިދާޅުވި ގޮތުގައި، ކުރިއަށް އޮތް ދުވަސްކޮޅުގެ ތެރޭގައި ޒަކަރާޔާ މަގާމުން ވަކިކުރުމުގެ ހުރިހާ މަސައްކަތްތައް ނިންމައިލާނެއެވެ.
ޒަކަރާޔާއަށް ފާޑުކިޔުންތައް އަމާޒުވާން ފެށީ އަންގާރަ ދުވަހު ވައިޓް ހައުސްގައި ބޭއްވި އޭނާގެ ފުރަތަމަ ނޫސްވެރިންގެ ބައްދަލުވުމުގައި، އެންމެ ތިން ސުވާލަށް ޖަވާބު ދެއްވުމަށް ފަހު ބައްދަލުވުން ނިންމަވައިލެއްވުމުންނާއި އެކަށީގެންވާ ގޮތެއްގައި ނޫސްވެރިންނަށް މައުލޫމާތު ފޯރުކޮށްނުދެވުނު ކަމަށް ގިނަ ބަޔަކު ފާހަގަކުރުމުންނެވެ.
މީގެ އިތުރުން، އޭނާއަކީ ގާނޫނީ ވަކީލެއް ކަމަށް ޓްރަމްޕް ވިދާޅުވެފައިވީ ނަމަވެސް، އޭނާ ބާ އިމްތިޚާނުން ފާސްވެފައި ނުވާކަން ހާމަވެފައިވާ ކަމަށް އެމެރިކާގެ ނޫސްތަކުގައިވެއެވެ. ޒަކަރާޔާ އަމިއްލައަށް ވެސް އޭނާއަކީ ވަކީލެއް ކަމަށް މީގެ ކުރިން ވިދާޅުވި ނަމަވެސް، ފޮކްސް ނިއުސްގެ ޝޯން ހެނިޓީއަށް ދިން އިންޓަވިއުއެއްގައި އޭނާ ވަނީ، 2011 ވަނަ އަހަރު ކެލިފޯނިއާގެ ބާ އިމްތިޚާނުން އޭނާ ފާސްވެފައި ނުވާކަން ހާމަކުރައްވައިފައެވެ. އެގޮތުން އެ ދުވަސްވަރު ފިރިމީހާގެ ވަޒީފާގެ ސަބަބުން ޗައިނާއަށް ބަދަލުވި ކަމަށާއި ނަމަވެސް އެއަށްފަހު ބާ އިމްތިޚާނު އަލުން ހަދާފައިނުވާކަން ޒަކަރާޔާ ހާމަކުރެއްވިއެވެ.
އެ މައުލޫމާތު ހާމަވި ފަހުން މުޅި ސަރުކާރަށް ވެސް ފާޑުކިޔުންތައް ވަނީ އިތުރުވެފައެވެ.
ޓްރަމްޕްގެ ވެރިކަމުގެ ފުރަތަމަ ދައުރުގައި، 2017 ވަނަ އަހަރު ވައިޓް ހައުސްގެ ކޮމިއުނިކޭޝަންސް ޑިރެކްޓަރުގެ މަގާމާ ހަވާލުވި އެންތަނީ ސްކަރަމޫޗީ ވެސް ވަނީ އެންމެ 11 ދުވަހަށް ފަހު މަގާމުން ވަކިކޮށްފައެވެ. ޒަކަރާޔާގެ ފަސް ދުވަހުގެ މުއްދަތު އެއަށްވުރެ ވެސް ކުރުވެފައިވާއިރު، އޭނާގެ ބަދަލުގައި ދެން އެ މަގާމަށް އައްޔަންކުރާނެ ފަރާތެއް ވައިޓް ހައުސްއިން މިހާތަނަށް އިއުލާންކޮށްފައެއް ނުވެއެވެ.