އަންނަ އަހަރު ތެރޭ މޯލްޑިވްސް އިސްލާމިކް ބޭންކް (އެމްއައިބީ) އިން މީހުން ދިރިއުޅޭ 19 ރަށެއްގައި އޭޓީއެމް ގާއިމުކުރުމަށް ނިންމައިފިއެވެ.
އޭޓީއެމްތައް އަޅައި، ޚިދުމަތް ފޯރުކޮށްދިނުމަށް ޓަކައި ރައީސް އޮފީހުގައި ބޭއްވި ރަސްމިއްޔާތެއްގައި ވަނީ އިކޮނޮމިކް މިނިސްޓްރީއާއި އެމްއައިބީއާ ދެމެދު ވަނީ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގައި ސޮއިކުރެއްވީ އިކޮނޮމިކް މިނިސްޓަރު މުޙައްމަދު ސައީދާއި އެމްއައިބީގެ ސީއީއޯ މުފައްދަލް އިދްރީސް ޚުމްރީއެވެ.
މި ރަސްމިއްޔާތުގައި ވާހަކަދައްކަވަމުން އެމްއައިބީގެ ސީއީއޯ ވިދާޅުވީ، އެއްބަސްވުމުގެ ދަށުން 23 އެޓީއެމްއެއް ގާއިމުކުރާނެ ކަމަށެވެ.
މިހާރު 18 ރަށެއްގައި އެމްއައިބީ ގެ 39 އޭޓީއެމް ވަނީ ޤާއިމުކޮށްފައެވެ. އެހެންކަމުން އަންނަ އަހަރު ނިމޭއިރު މުޅި ޖުމުލަ 37 ރަށެއްގައި 62 އޭޓީއެމްއެއް ގާއިމުކުރެފިވައި ހުންނާނެ ކަމަށް އެމްއައިބީން ވަނީ ބުނެފައެވެ. އޭގެތެރޭގައި 56 ރުފިޔާ އޭޓީއެމްތަކާއި ހަ ޑޮލަރު އޭޓީއެމް ހިމެނޭކަމަށް އޭނާ ވިދާޅުވެފައިވެއެވެ.
އެ ރަށްތަކުގެ އިތުރުން ވެސް އެހެން އޭޓީއެމްތައް ގާއިމުކުރަން މަސައްކަތް ކުރައްވާނެ ކަމަށާއި އެމްއައިބީގެ އޭޓީއެމްތަކުން އެކްސެސް ފީއެއް ނުކަނޑާނެ ކަމަށް އޭނާ ވިދާޅުވެފައިވެއެވެ.
އަދި، އެ ބެންކުގެ ޚިދުމަތްތައް ފުޅާކުރަން މަސައްކަތް ކުރައްވާނެކަން އެމްއައިބީގެ ސީއީއޯ ވަނީ ފާހަގަކުރައްވާފައެވެ.