އަންނަ އަހަރަށް ލަފާކޮށް މިހާރު ރައްޔިތުންގެ މަޖިލީހަށް ހުށަހަޅާފައި އޮތް ދައުލަތުގެ ބަޖެޓުގައި, 8,782 މަގާމު އިތުރުކުރަން ހިމަނާފައިވާ ކަމަށާއި އެއާއެކު، 2023 ވަނަ އަހަރާ އަޅައިބަލާއިރު މުވައްޒަފުންގެ ޚަރަދުތައް 37 ޕަސެންޓު އިތުރުވާނެ ކަމަށް ނިމިދިޔަ އެމްޑީޕީ ސަރުކާރުގައި ފިނޭންސް މިނިސްޓަރުކަން ކުރެއްވި އިބްރާހިމް އަމީރު މިއަދު ވިދާޅުވެއްޖެއެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި އަމީރު ވިދާޅުވީ، ބައިލައްކަ މުވައްޒަފުންގެ މުސާރައަށް 14 ބިލިއަން ރުފިޔާ ޚަރަދުވާނެ ކަމަށެވެ. އެގޮތުން 2025 ވަނަ އަހަރުގެ 51،605 މުވައްޒަފުން އިތުރުވާނެ ކަމަށް އަމީރު ވިދާޅުވިއެވެ.
އަމީރު ވިދާޅުވީ 2،280އަށް ވުރެ ގިނަ ސިޔާސީ މުވައްޒަފުން މިހާރު ވެސް އެބަތިބި ކަމަށާއި އެއީ 2023 ވަނަ އަހަރާ އަޅައިބަލާއިރު ދެގުނަ އިތުރު އަދަދެއް ކަމަށެވެ. އެހެންކަމުން 2025 ވަނަ އަހަރު ވެސް އެ އަދަދުތައް އަދިވެސް އިތުރުކުރަންވީތޯ ސުވާލުއުފެއްދެވިއެވެ.
ޚަރަދު ކުޑަކުރަންޖެހޭ ސިޔާސަތުތަކެއް ގެންނަން ޖެހޭ ދަނޑިވަޅެއްގައި އަންނަ އަހަރު 8،782 މުވައްޒަފުން އިތުރުކުރަން ބަޖެޓުގައި މިވަނީ ހިމަނާފައި. މުވައްޒަފުންގެ ޚަރަދުތައް 2023 އާ އަޅައިބަލާއިރު 37 ޕަސެންޓުން އިތުރުވޭ، ކުރީގެ ފިނޭންސް މިނިސްޓަރު އިބްރާހީމް އަމީރު
އަމީރު ވިދާޅުވީ، ފެނިގެންދަނީ ޚަރަދު ކުޑަ ކުރަންވީ ދަނޑިވަޅުގައި ދައުލަތުގެ މުވައްޒަފުންގެ އަދަދު އިންތިހާއަށް އިތުރުވާތަން ކަމަށެވެ. އަދި އޭގެ ތެރޭގައި ގިނައީ ސިޔާސީ ގޮތުން ނެގޭ މުވައްޒަފުން ކަމަށް ވެސް ތުހުމަތުކުރެއްވިއެވެ. އަދި މިނިސްޓްރީތަކާއި އެމްބަސީތައް ހުޅުވައި، މުވައްޒަފުން އިތުރުކުރާވަރަކަށް ޑޮލަރަށް އޮންނަ ޑިމާންޑް ބޮޑުވާނެ ކަމަށާއި، ޑޮލަރުގެ އަގު އުފުލޭނެ ކަމަށް އަމީރު ވިދާޅުވިއެވެ.
2025 ވަނަ އަހަރުގެ ބަޖެޓުން އަމީރު ފާހަގަކުރެއްވި އިތުރު ކަންކަން:
- ރިކަރަންޓް ޚަރަދު ބޮޑު. އޭގެ ތެރޭގައި ތަކެއްޗާއި ޚިދުމަތުގެ ޚަރަދާއި، ދަތުރުފަތުރުގެ ޚަރަދާއި، ކޮންސިއުމަބަލްސް އަދި ތަމްރީނު ޚަރަދު ހިމެނޭ.
- އާންމު ޚަރަދުތައް ބޮޑު.
- އަސާސީ ޕެންޝަންގެ ގޮތުގައި ލިބޭ 5،000 ރުފިޔާ ކުޑަކޮށްފައި.
- ގެދޮރުވެރިކަމުގެ ބަޖެޓު ވޭތުވެދިޔަ ތިން އަހަރަށްވުރެ ދަށް.
- ގެދޮރުވެރިކަމަށް ކަނޑައެޅީ ޕީއެސްއައިޕީގެ 50 ޕަސެންޓުގެ ބަދަލުގައި 15 ޕަސެންޓް.
- ސަރުކާރުގެ ވައުދުތަކުގެ ތެރޭގައި ހިމެނޭ އައްޑޫ ބްރިޖު މަޝްރޫއާއި، ރަސްމާލެ ހިއްކުން ފަދަ މަޝްރޫއުތައް ބަޖެޓުގައި ހިމަނާފައި ނެތުން.
- ކައުންސިލްތަކުގެ ބްލޮކް ގްރާންޓުން އެއް ބިލިއަން ރުފިޔާ އުނިކުރުން.
އަމީރު ވިދާޅުވި ގޮތުގައި ޚަރަދުކުޑަކުރުމަށް ރާވާފައިވާ ކަންކަން ހާސިލުކުރުމުގެ ގާބިލުކަމެއް ސަރުކާރުގެއެއް ނެތެވެ. އޭގެތެރޭގައި އާސަންދައިގެ ޚަރަދުކުޑަކުރުމާއި އިންޑިރެކްޓް ސަބްސިޑީގެ ޚަރަދުތައް ކުޑަ ކުރުމުގެ ގާބިލުކަން ނެތް ކަމަށް އޭނާ ވިދާޅުވިއެވެ.
އަމީރު ވިދާޅުވީ އަންނަ އަހަރަށް ހުށަހަޅާފައިވާ ބަޖެޓުގައިވާ ގޮތުން، އަހަރު ނިމޭއިރު ދައުލަތުގެ ޖުމްލަ ދަރަނި 155 ބިލިއަން ރުފިޔާއަށް ވުރެ މައްޗަށް އަރާނެ ކަމަށެވެ. އަދި 2025 ވަނަ އަހަރުގެ ބަޖެޓުގައި ގާނޫނާ ޚިލާފު އެތައް ކަމެއް އެބަހުރި ކަމަށް ތުހުމަތުކުރެއްވިއެވެ.