ލުބުނާނުގެ ހަތިޔާރު އެޅި ޖަމާއަތް، ހިޒްބުﷲއިން ބޭނުންކުރަމުންދިޔަ ޕޭޖަރުތަކެއް ސެޕްޓެމްބަރު މަހު އިސްރާއީލުން ގޮއްވާލުމާ ގުޅިގެން، ލުބުނާނުން އެ މައްސަލަ އދ ގެ ލޭބާ އޮގަނައިޒޭޝަން (އައިއެލްއޯ) އަށް ހުށަހަޅައިފިއެވެ.
ލުބުނާނުގެ ލޭބަ މިނިސްޓަރު މުސްތަފާ ބައިރަމް ރަސްމީކޮށް ޝަކުވާ ހުށަހެޅީ މިދިޔަ އަންގާރަ ދުވަހު ސްވިޒަލޭންޑްގެ ޖެނީވާގައި ހުންނަ އދ. ހެޑް އޮފީހަށެވެ. ބުދަ ދުވަހު ނޫސްވެރިންނާ ވާހަކަދައްކަވަމުން އޭނާ ވިދާޅުވީ، މި ހަމަލާއަކީ "އިންސާނިއްޔަތާ ދެކޮޅަށް، ޓެކްނޮލޮޖީއާ ދެކޮޅަށް، މަސައްކަތާ ދެކޮޅަށް ހިންގި ވަރުގަދަ ހަނގުރާމައެއް" ކަމަށެވެ.
"މިއީ ކުށްވެރި ނުކޮށްފިނަމަ ވަރަށް ނުރައްކާތެރި ކަމަކަށް ވެދާނެ،" އޭނާ ވިދާޅުވިއެވެ.
އަލް ޖަޒީރާއިން ރިޕޯޓުކޮށްފައިވާ ގޮތުގައި ސެޕްޓެމްބަރު 23 ވަނަ ދުވަހު ހިނގި އެ ހާދިސާއަކީ މުއާމަލާތް ކުރުމަށް އެ ޑިވައިސްތައް ބޭނުންކުރި ހިޒްބުاللهގެ ހަތިޔާރު އެޅި ޖަމާއަތަށް އަމާޒުކޮށްގެން ގޮވުންތަކެއް ކަމަށް ބެލެވެއެވެ.
އެ ހަމަލާގެ ޒިންމާ އިސްރާއީލުގެ ބޮލުގައި ގިނަ ބަޔަކު އަޅުވާއިރު، ހަމަލާދިން ކަމަށް ނުވަތަ ނުދޭ ކަމަކަށް ވެސް އިސްރާއީލުން ބުނެފައެއްނުވެއެވެ.
ބައިރަމް ވިދާޅުވީ، އެ އަމަލުގެ ފަހަތުގެ އިސްރާއީލު އޮތް ކަމަށް މުޅި ދުނިޔެއިން ގަބޫލުކުރާ ކަމަށެވެ.
މިނިސްޓަރު އިތުރަށް ވިދާޅުވީ، ފުރަތަމަ ރިޕޯޓްކުރި ވަރަށް ވުރެ ވެސް ގެއްލުން ލިބުނު މީހުންގެ އަދަދު އިތުރު ކަމަށާއި، އެ ހަމަލާގެ ސަބަބުން 4،000 އަށް ވުރެ ގިނަ އާންމުން ޝަހީދުންގެ ގޮތުގައި ނިޔާވެ، ނުވަތަ ޒަޚަވެފައިވާ ކަމަށެވެ.
ސެޕްޓެމްބަރު މަހު ޕޭޖަރުތަކަށް ދިން ހަމަލާއާ އެކު އިސްރާއީލުން ވަނީ ލުބުނާނާ ދެކޮޅަށް ދޭ ހަމަލާތައް އިތުރަށް ވަރުގަދަކޮށްފައެވެ.
ޕޭޖަރު ހަމަލާއަށް ހަފުތާއެއް ފަހުން އިސްރާއީލުން ވަނީ ލުބުނާނުގެ ދެކުނުގައި އެއްގަމު މަގުން ހަމަލާދީ، ބެއިރޫތުގެ ދެކުނު ސަބާބްސްއާއި އިރުމަތީ ބެކާ ވެލީގެ ސަރަހައްދުތަކަށް ބޮޑެތި ވައިގެ ހަމަލާތަކެއް ދޭނެކަން އިއުލާންކޮށްފައެވެ.
އިސްރާއީލުގެ ހަމަލާތަކުގެ ސަބަބުން މިދިޔަ އޮކްޓޯބަރު މަހުން ފެށިގެން މިހާތަނަށް ލުބުނާނުގައި 3،000 އަށް ވުރެ ގިނަ މީހުން މަރުވެ، 13،492 މީހުން ޒަޚަމުވެފައިވާ ކަމަށް ލުބުނާނުގެ މިނިސްޓްރީ އޮފް ޕަބްލިކް ހެލްތުން ބުނެއެވެ.
އިސްރާއީލުން ލުބުނާނަށް ދިން ހަމަލާތަކުގެ ސަބަބުން ވެސް މިލިއަނަކަށް ވުރެ ގިނަ މީހުންގެ ގެދޮރު ވަނީ ގެއްލިފައެވެ.