މިދިޔަ އަހަރުގެ ސެޕްޓެމްބަރު މަހު ރިލީޒްކުރި ފިލްމު "ޖަވާން"އިން ހިންދީ ސިނަމާއަށް ތައާރަފުވި ސައުތު ސިނަމާގެ މަޝްހޫރު ބަތަލާ ނަޔަންތާރާގެ ހަޔާތާ ގުޅޭ ޑޮކިއުމެންޓްރީއެއް ނެޓްފްލިކްސްއިން ގެނެސްދޭނެކަން އިއުލާނުކޮށްފިއެވެ.
"ނަޔަންތާރާ: ބިޔޯންޑް ދަ ފެއަރީޓޭލް"ގެ ނަމުގައި ގެނެސްދޭ މި ޑޮކިއުމެންޓްރީގެ ޕޯސްޓަރެއް ވެސް ދައްކާލާފައިވާއިރު މި މަހުގެ 18 ވަނަ ދުވަހު ނެޓްފްލިކްސްގައި މި ޑޮކިއުމެންޓްރީ ޕްރީމިއާކުރާނެކަން ވަނީ އިއުލާނުކޮށްފައެވެ.
ނަޔަންތާރާގެ ޑޮކިއުމެންޓްރީގެ ޕޯސްޓަރު ނެޓްފްލިކްސްއިން ރިލީޒްކޮށްފައި--ފޮޓޯ/ބޮލީވުޑްހަންގާމާ
މި ޑޮކިއުމެންޓްރީއަކީ ސައުތު ސިނަމާގެ ފިލްމުތަކުން ކާމިޔާބު ހޯދުމަށް ފަހު ދުނިޔޭގެ ގިނަ ބައެއްގެ މެދުގައި ނަޔަންތާރާ މަގުބޫލު ފިލްމީ ތަރިއަކަށްވުމަށް ކުރި މަސައްކަތްތަކާ އެކު ކެރިއަރުގައި ކުރި ތަޖުރިބާތައް ދައްކުވައިދޭނެ ޑޮކިއުމެންޓްރީއެކެވެ.
ސައުތު ސިނަމާގެ އެންމެ އަގުބޮޑު ބަތަލާއިންގެތެރޭ ހިމެނޭ ނަޔަންތާރާގެ ދިރިއުޅުމާ ބެހޭގޮތުން އާއްމުންނަށް ނޭނގޭ ވަރަށް ގިނަ ކަންކަން "ނަޔަންތާރާ: ބިޔޯންޑް ދަ ފެއަރީޓޭލް"އިން ބެލުންތެރިންނަށް ފެންނާނެ ކަމަށް ނެޓްފްލިކްސްއިން ވަނީ ބުނެފައެވެ.
ސައުތު ސިނަމާގެ ޑައިރެކްޓަރު ވިގްނޭޝް ޝިވަންއާ ކައިވެނިކޮށް ސަރޮގެސީ މެދުވެރިކޮށް އެއްމާބަނޑު ދެ ކުދިން ވެސް ހޯދާފައިވާ ބަތަލާގެ ލޯބީގެ ހަޔާތުގެ މައްޗަށް ވެސް މި ޑޮކިއުމެންޓްރީގައި އަލި އަޅުވާލާނެ ކަމަށް ރިޕޯޓުތައް ބުނެއެވެ.
ނަޔަންތާރާ ފިރިމީހާ އަދި ދެ ކުދިންނާ އެކު--ފޮޓޯ/ޓައިމްސްނައު
ނަޔަންތާރާގެ 40 ވަނަ އުފަންދުވަހާ ގުޅުވައިގެން ޕްރީމިއާކުރާ މި ޑޮކިއުމެންޓްރީއަކީ ބަތަލާގެ ސަޕޯޓަރުންނަށް ދޫކޮށްލާ ހަދިޔާއެއް ކަމަށް ރިޕޯޓުތައް ބުނެއެވެ. ފިލްމު "ޖަވާން"އަށް ފަހު ނަޔަންތާރާ އިތުރު ބޮލީވުޑްގެ ފިލްމަކަށް ސޮއިކޮށްފައިނުވި ނަމަވެސް ބަތަލާގެ ޝެޑިއުލް ވަނީ ވަރަށް ބޮޑަށް ފުރިފައެވެ.
ސައުތު ސިނަމާގެ ފިލްމެއްގައި ނަޔަންތާރާ މަސައްކަތްކުރަމުން އަންނައިރު މި އަހަރު ތިން ފިލްމެއް ރިލީޒްކުރާނެ ކަމަށް ރިޕޯޓުތައް ބުނެއެވެ.