ރައީސް ޑރ. މުޙައްމަދު މުއިއްޒު އިއުލާނުކުރެއްވި ޚަރަދު ކުޑަކުރުމުގެ ސިޔާސަތުގެ ދަށުން މިހާތަނަށް 248 ސިޔާސީ މުވައްޒަފުން ވަކިކޮށްފައިވާ ކަމަށް ސަރުކާރުން ބުނި ނަމަވެސް، ވަކިކުރި މުވައްޒަފަކު ނުފެންނަ ކަމަށް ހަނިމާދޫ ދާއިރާގެ އެމްޑީޕީގެ މެމްބަރު އަބްދުލްޣަފޫރު މޫސާ މިއަދު ވިދާޅުވެއްޖެއެވެ.
އެމްޑީޕީގެ ޕާލިމެންޓަރީ ގުރޫޕުން ބޭއްވި ނޫސްވެރިންގެ ބައްދަލުވުމެއްގައި ޣަފޫރު ވިދާޅުވީ މި އަހަރު ރިކަރަންޓު ޚަރަދު 1.5 ބިލިއަން ރުފިޔާއިން އިތުރުވެފައިވާ ކަމަށާއި، ރައްޔިތުންގެ އަތުން އިތުރަށް ޓެކްސް ނަގަން އުޅޭއިރު އެ ޚަރަދުތައް ކުޑަކުރަން ޖެހޭ ކަމަށެވެ.
މި ސަރުކާރުން ޚަރަދު ކުޑަކުރަން އަޅާ ފިޔަވަޅުތަކުގެ ދަށުން ސިޔާސީ މުވައްޒަފުން ވަކިކޮށްފައިވަ ކަމަށް ބުނި ނަމަވެސް އެކަމާ ގުޅޭ ތަފުސީލު ހާމަނުކުރާ ކަމުގެ ކަންބޮޑުވުން އޭނާ ފާޅުކުރެއްވިއެވެ.
"ކޮބައިތޯ ކަނޑާލި 280 މުވައްޒަފުންނަކީ؟ އެ މީހަކު ނެތް. ސަރުކާރުން އެބަ ބުނޭ ކަނޑައިފީމޭ. ޚަރަދަކުން ނުދައްކައޭ އަދި އެ މީހާ ވެސް އޮފީހަށް ނުދާ މީހެއް އަޅުގަނޑުމެންނަކަށް ނުފެނޭ،" ޣަފޫރު ވިދާޅުވިއެވެ.
އޭނާ ވިދާޅުވީ މި ސަރުކާރުން ކޮންމެ ކަމެއް ފޮރުވައި، އަވަސް އަރުވާލައިގެން، އެކަމެއް ކުރަން ޖެހޭ އުސޫލުން ބޭރުން އަމަލު ކުރާ މަންޒަރު ފެންނަ ކަމަށެވެ. އެހެންވެ، ކަންތައްތައް ހާމަކޮށް، ރައްޔިތުންގެ ފައިސާ ޚަރަދު ކުރުމުގައި ޒިންމާދާރުވުމަށް ޣަފޫރު ގޮވައިލެއްވިއެވެ.
"ރިކަރަންޓު ޚަރަދު ބޮޑުވާން ޖެހޭ އެއްވެސް ސަބަބެއް އަޅުގަނޑުމެންނަކަށް ނުފެނޭ. ރިކަރަންޓު ޚަރަދުން ޚަރަދު ކުރަން ޖެހެނީ ރައްޔިތުންނަށް، ރައްޔިތުންނަށް ދެ ޚަރަދުތައް އެ ދަނީ ދުވަހުން ދުވަހަށް އުނިކުރަމުން، ހިފަހައްޓަމުން، ބަންދުކުރަމުން،" އޭނާ ވިދާޅުވިއެވެ.
އެމްޑީޕީ ޕީޖީން ބޭއްވި ނޫސްވެރިންގެ ބައްދަލުވުން: ސިޔާސީ މުވައްޒަފުން ވަކިކުރި ކަމަށް ކަރުދާހުން ވެސް ޚަރަދުން ވެސް ނުދައްކާ ކަމަށް ޣަފޫރު ވިދާޅުވި -- ސަން ފޮޓޯ/ އަމީން ލަތީފް
އަންނަ އަހަރަށް ލަފާކޮށްފައިވާ 56.6 ބިލިއަން ރުފިޔާގެ ބަޖެޓަކީ މިހާތަނަށް ފާސްކުރާނެ އެންމެ ބޮޑު ބަޖެޓުކަން ފާހަގަކުރައްވައި ޣަފޫރު ވިދާޅުވީ މެންބަރުންނަށް އަދިވެސް ބަޖެޓު ފޮތް ލިބިފައި ނުވާ ކަމަށެވެ. އަދި މިމަހުގެ 20 ވަނަ ދުވަހުގެ ކުރިން ބަޖެޓުގެ މަސައްކަތްތައް ނިންމަން ޖެހޭއިރު، ކުރިއަށް މި އޮތް ދުވަސްތަކުގައި ބަޖެޓު ދިރާސާކޮށް ނިންމޭނީ ކިހިނެއްތޯ އޭނާ ސުވާލު އުފެއްދެވިއެވެ.
ބަޖެޓު ދިރާސާ ކުރަން ކުރު މުއްދަތެއް ދެނީ ސަރުކާރުން ރާވައިގެން ކަމަށް ޣަފޫރު ތުހުމަތު ކުރެއްވިއެވެ.
"ބޭނުމަކީ އެ ދިރާސާކޮށް، އެއާމެދު ބަހުސްކޮށް ވަގުތު ލިބިގެން އެކަން ކުރަން ފުރުސަތު ނުދިނުން. އެއީ ކަމެއް އޮޅުވާލުމަށާއި ކަންކަން ހުރި ގޮތް ސާފުނުކޮށް ދިނުމަށާއި ވައްކަމަށް މަގުފަހިވާ ގޮތަށް އާންމުކޮށް ކަންކަން ކުރާ އުސޫލު އެއީ،" އޭނާ ވިދާޅުވިއެވެ.
މި ސަރުކާރުން ގިނަ އަދަދެއްގެ ސިޔާސީ މުވައްޒަފުން އައްޔަނުކޮށް، އަދަދުތައް ހާމަނުކުރާ މައްސަލައިގައި ވަރަށް ބޮޑަށް ފާޑުކިޔުންތައް ވަނީ އަމާޒުވެފައެވެ. ނަމަވެސް ސަރުކާރުން ވެސް ވަނީ ސިޔާސީ މުވައްޒަފުންގެ އަދަދު ހާމަކުރަން ދެކޮޅު ހަދައިފައެވެ.
ރައީސް މިދިޔަ މަހުގެ 15 ވަނަ ދުވަހު، ޚަރަޑު ކުޑަކުރުމުގެ ގޮތުން 228 ސިޔާސީ މުވައްޒަފުން ވަކިކުރާނެކަން އިއުލާން ކުރެއްވިއިރު ވެސް ބާކީ ތިބޭނީ ކިތައް މުވައްޒަފުންނެއް ކަމެއް ވިދާޅެއް ނުވެއެވެ. އަދި 248 ސިޔާސީ މުވައްޒަފުން ވަކިކޮށްފައިވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު މިމަހު ވިދާޅުވިއިރު ވެސް، އެއީ ކިހާ ބޮޑު ބަދަލެއް ކަމެއް ވިދާޅެއްނުވެއެވެ.
ރައީސް ވިދާޅުވެފައިވަނީ، 228 ސިޔާސީ މުވައްޒަފުން ވަކިކުރުމުން ދައުލަތުގެ މާލިއްޔާއިން މަހަކަށް 5.7 މިލިއަން ރުފިޔާ ސަލާމަތްކުރެވޭނެ ކަމަށެވެ.
މިދިޔަ މަހު 24 ވަނަ ދުވަހުގެ ނިޔަލަށް ދައުލަތުން ކޮށްފައިވާ ޚަރަދާ ގުޅޭ ގޮތުން ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުން ދައްކާ ގޮތުގައި، މުސާރައާއި ސަބްސިޑީތައް ހިމެނޭ ގޮތަށް މިއަހަރު ކޮށްފައިވާ ރިކަރަންޓް ޚަރަދަށް ދިޔަ 27.2 ބިލިއަން ރުފިޔާއަށް އަރައެވެ. އެއީ މިދިޔަ އަހަރުގެ މި މުއްދަތާ އަޅައިބަލާއިރު 2.1 ބިލިއަން އިތުރު އަދަދެކެވެ.
މީގެ ކުރިން އެމްޑީޕީން ވަނީ މި ސަރުކާރުގެ ސިޔާސީ މުވައްޒަފުންގެ އަދަދު 2،000އަށް ވުރެ އިތުރުވާނެ ކަމަށް ތުހުމަތުކޮށްފައެވެ.