މިއަހަރުގެ ދިރާގު މޯލްޑިވްސް ރޯޑްރޭސް (ޑީއެމްއާރްއާރް)ގައި ބައިވެރިވެ ވަނަތަކަށް ދިޔަ މީހުންނަށް މިއަދު އިނާމު ހަވާލުކޮށްފިއެވެ.
އެގޮތުން، ޑީއެމްއާރްއާރްގެ 21.1ކޭ ކެޓެގަރީގެ ޗެމްޕިއަންއަށް 25,000 ރުފިޔާގެ ފައިސާގެ އިނާމު ދިރާގުން ހަދިޔާކޮށްފައިވާއިރު ރަނަރަޕްއަށް 15,000 ރުފިޔާ އަދި ސެކަންޑް ރަނަރަޕްއަށް 10,000 ރުފިޔާގެ އިނާމު ވަނީ ހަވާލުކޮށްފައެވެ.
އަދި 10ކޭ 5ކޭ އޯޕަން އަދި 5ކޭ އޮފީސް، ރިސޯޓް ކެޓެގަރީތަކުގެ ޗެމްޕިއަނުންނަށް 10,000 ރުފިޔ،ާ ރަނަރަޕްއަށް 8,000 ރުފިޔާ އަދި ސެކަންޑް ރަނަރަޕްއަށް 6,000 ރުފިޔާގެ ފައިސާގެ އިނާމު ވެސް ވަނީ ހަވާލުކޮށްފައެވެ.
މީގެ އިތުރުން 5ކޭ ސްކޫލް ކެޓެގަރީގެ ވަނަތައް ހާސިލްކުރި ދަރިވަރުންނަށް ވަނީ ހާއްސަ ގިފްޓް ވައުޗާ ހަވާލުކޮށްފައެވެ. އެއީ ޗެމްޕިއަނުންނަށް 5,000 ރުފިޔާ، ރަނަރަޕްއަށް 3,000 ރުފިޔާ އަދި ސެކްންޑް ރަނަރަޕް އަށް 1,000 ރުފިޔާގެ ވައުޗަރުތަކެކެވެ.
މީގެ އިތުރުން މި ދުވުމުގައި ދިރާގުން ވަނީ 21.1ކޭ އަދި 10ކޭ ކެޓެގަރީތަކުން ވަކި އުމުރުފުރާތަކަކުން ވަނަވަނައަށް ދިޔަ ފަރާތްތަކުގެ އަގު ވަޒަންކޮށް ސެޓިފިކެޓް ހަވާލުކޮށްފައެވެ.
މި ސެޓިފިކެޓް ދިން އުމުރުފުރާތަކަކީ:
- 45 އަހަރާއި 50 އަހަރާ ދެމެދު
- 51އަހަރާއި 55 އަހަރާ ދެމެދު
- 56އަހަރާއި 60 އަހަރާ ދެމެދު
- އަދި 61އަހަރާއި 65 އަހަރާ ދެމެދު
މި ހަފުލާގައި ވާހަކަފުޅުދައްކަވަމުން ދިރާގުގެ ސީއީއޯ އަދި މެނޭޖިންގް ޑިރެކްޓާ، އިސްމާއިލް ރަޝީދު ވަނީ އެކި ވަނަތަކަށް ހޮވުނު ފަރާތްތަކަށް މަރުހަބާ ދަންނަވައި ދުވުންތެރިން ހޯދި ކާމިޔާބީ އަށް ތައުރީފު ކުރައްވާފައެވެ.
ޑީއެމްއާރްއާރަކީ ރާއްޖޭގެ ދުވުންތެރިންގެ އިތުރުން ބައިނަލްއަގުވާމީ ދުވެންތެރިން ވެސް އިންތިޒާރު ކުރާ އިވެންޓެއްކަން އުފަލާއެކު އޭނާ ވަނީ ފާހަގަކުރައްވާފައެވެ.
އަދި މި ދުވުމަކީ ދިރާގުގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ޕްރޮގްރާމްގެ މައިގަނޑު އެއް ދާއިރާ ކަމަށްވާ ކުޑަކުދިންގެ ރައްކާތެރިކަމަށްޓަކައި ކުރިއަށް ގެންދާ މުހިންމު ހަރަކާތެއްކަމާއި އަދި މިކަމަށް ރޭހުގެ ހުރިހާ ބައިވެރިންގެ ފަރާތުން ވެސް ލިބޭ އެއްބާރުލުމަށް އޭނާ ވަނީ ޝުކުރު އަދާކުރައްވާފައެވެ.
ދިރާގުން ވަނީ ރޭގެ ހަފުލާގައި ޖުމްލަ 680،850 ރުފިޔާ ރޯޑް ރޭހުގެ އެންޑޯސްޑް އެންޖީއޯތަކަށް ހަދިޔާކޮށްފައެވެ. އެގޮތުން ރޭހުގެ ބައިވެރިން އެންމެ ގިނައިން ނޮމިނޭޓްކުރި ފަސް އެންޖީއޯއަކަށް ޖުމްލަ 200،000 ރުފިޔާގެ ފައިސާގެ އިނާމު ދިރާގުން ވަނީ ހުށަހަޅާފައެވެ.
ޑީއެމްއާރްއާރް 2024: ވަނަތަކަށްދިޔަ ފަރާތްތަކަށް އިނާމު ހަވާލުކުރުމަށް ބޭއްވި ޙަފަްލާގެ ތެރެއިން --- ފޮޓޯ/ ދިރާގު
ބައިވެރިންގެ ރަޖިސްޓްރޭޝަން ފައިސާގެ ބަޔަކާއި ރީތި ބިބް ނަމްބަރު ވިއްކައިގެން ލިބުނު ފައިސާވަނީ ރޯޑް ރޭހުގެ އެންޑޯސްޑް 12 އެންޖީއޯއަށް ހަވާލުކޮށްފައެވެ. އެގޮތުން ޓޕް ފަސް އެންޖީއޯތަކުގެ ތެރެއިން ކޮންމެ އެންޖީއޯއަކަށް 80،071 ރުފިޔާ އަދި ބާކީ ހަތް އެންޖީއޯތަކުގެ ތެރެއިން ކޮންމެ އެންޖީއޯއަކަށް 40،071 ރުފިޔާ ވަނީ ހަދިޔާކޮށްފައެވެ.
ޑީއެމްއާރްއާރަކީ ރާއްޖޭގައި ކޮންމެ އަހަރަކު ބާއްވާ އެންމެ ބޮޑު ދުވުމުގެ އިވެންޓެވެ. އެގޮތުން މިއަހަރު ބޭއްވި މި ދުވުމުގެ 15ވަނަ އެޑިޝަން ބާއްވާފައި ވަނީ އޮކްޓޯބަރުމަހުގެ 25ވަނަ ދުވަހު ހުޅުމާލޭގެ ސެންޓްރަލް ޕާކުގައެވެ.
މި ދުވުމުގައި 4،400 އަށް ވުރި ގިނަ ބައިވެރިން ރެޖިސްޓާ ކުރިއިރު 41 ގައުމެއްގެ ދުވުންތެރިން ވަނީ މި ދުވުމުގައި ބައިވެރިވެފައެވެ. އަދި 28 ސްކޫލެއްގެ ދަރިވަރުން ބައިވެރިވިއިރު އޭގެ ތެރޭގައި އަތޮޅުތެރޭގެ ހަތް ސްކޫލެއް ވެސް ހިމެނެއެވެ.
މި ހަފުލާގައި ދިރާގުން ވަނީ އަންނަ އަހަރުގެ ދިރާގު މޯލްޑިވްސް ރޯޑް ރޭސް އަންނަ އަހަރުގެ އޮކްޓޯބަރު 24ގައި ބާއްވާނެ ކަމަށް އިއުލާނުކޮށްފައެވެ.
ޑީއެމްއާރްއާރްއަކީ ވޯލްޑް އެތުލެޓިކްސް ސާޓިފައިޑް ރޭސް ރޫޓަކާއެކު އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް
ރޭސަސް (އެއިމްސް) ވޯލްޑް ރަނިން ކަލަންޑަރުގައި ލިސްޓުކޮށްފައިވާ ދިވެހިރާއްޖޭގެ ހަމައެކަނި ބައިނަލްއަގްވާމީ ދުވުމެވެ.