އިސްރާއީލުން ޣައްޒާ އާއި ލުބުނާނުގެ އާންމުންނަށް ކުރިމަތިކުރުވަމުންދާ ލާއިންސާނީ އަނިޔާވެރިކަމަށް އެމެރިކާގެ ސަރުކާރުން އެއްބާރުލުން ދޭތީއާއި ކުރިއަށް އޮތް ތަނުގައި ވެސް ދޭނެ ކަމަށް ބުނެފައިވާތީ، އެ ގައުމުގެ އަރަބި ނަސްލުގެ މީހުން ވެރިކަންކުރާ ޑިމޮކްރެޓިކް ޕާޓީގެ ކެންޑިޑޭޓް އަދި ނައިބު ރައީސް ކަމަލަ ހެރިސްއަށް ނޫނެކޭ ބުނެފިއެވެ.
އެމެރިކާގައި އަރަބި ނަސްލުގެ މީހުން އެންމެ ގިނަ, މިޝިގަން ސްޓޭޓުގެ ޑިއާބޯން ސިޓީއިން ވަނީ އިދިކޮޅު ރިޕަބްލިކަން ޕާޓީގެ ކެންޑިޑޭޓް ޑޮނަލްޑް ޓްރަމްޕަށް ވަނީ 46.8 އިންސައްތަ ވޯޓު ދީފައެވެ. އެއާ އަޅައިބަލާއިރު ހެރިސްއަށް ލިބިފައި ވަނީ 27.8 އިންސައްތަ ވޯޓެވެ. ހެރިސްއާ އެންމެ ގާތުން ވޯޓު ހޯދި ގްރީން ޕާޓީގެ ކެންޑިޑޭޓް ޖިލް ސްޓޭއިންއަށް 22 އިންސައްތަ ވޯޓު ލިބިފައިވެއެވެ.
ޑިއާބޯންއަކީ 2020 ވަނަ އަހަރުގެ އިންތިޚާބުގައި ބައިޑެން ބޮޑު ތަފާތަކުން ކުރި ހޯއްދެވި ސިޓީއެކެވެ. އެގޮތުން އެ އިންތިޚާބުގައި ބައިޑެންއަށް 74.2 އިންސައްތަ ވޯޓު ލިބުނުއިރު ޓްރަމްޕަށް ލިބުނީ 24.2 އިންސައްތަ ވޯޓެވެ.
އިސްރާއީލުން ޣައްޒާއާ ދެކޮޅަށް ކުރާ އަނިޔާވެރި ހަނގުރާމައަށް ބައިޑަންގެ ސަރުކާރުން އެއްބާރުލުން ދޭތީ އާއި ހެރިސް ހޮވިއްޖެ ނަމަވެސް އިސްރާއީލަށް އަސްކަރީ އެހީދޭނެ ކަމަށް ވިދާޅުވެފައިވާތީ ޑިމޮކްރެޓުންނަށް އެ ސްޓޭޓްގެ އަރަބި ނަސްލުގެ މީހުންގެ ވޯޓު ގެއްލިދާނެ ކަމުގެ ބިރު އޮތީ ވަރަށް ބޮޑަށް ހީވެފައެވެ.
ޑިއާބޯންގައި އެ ކަންބޮޑުވުންތަކުން އިތުރުވެފައިވާއިރު، ޑިމޮކްރެޓުން އެމެރިކާގެ އަރަބި ނަސްލުގެ މީހުން ވަރަށް ބޮޑަށް އެކަހެރިކޮށްފައިވާ ކަމުގެ ކަންބޮޑުވުންތައްވެސް އޮތެވެ.
އޮގަސްޓް މަހު ބޭއްވި ޑިމޮކްރެޓިކް ނޭޝަނަލް ކޮންވެންޝަންގައި މުސްލިމް ނުވަތަ އަރަބި ސްޕީކަރަކު ހިމަނަން ހެރިސްގެ ކެމްޕޭނުން ދެކޮޅު ހެދިއިރު، މިދިޔަ ހަފުތާގައި ބިލް ކްލިންޓަން ދެއްކެވި ވާހަކައަކުން ވެސް އެ ޕާޓީއަށް ފާޑުކިޔުން އަމާޒުވިއެވެ. ހެރިސްގެ ކެމްޕެއިން ހަރަކާތެއްގައި ކްލިންޓަން ވަނީ، ޣައްޒާގެ އާންމުން މެރުމަށް އިސްރާއީލަށް މަޖުބޫރުވެފައިވާ ކަމަށް ވިދާޅުވެފައެވެ.
އަރަބި ނަސްލުގެ މީހުން ދެވަނައަށް އެންމެ ގިނަ މިޝިގަން ސްޓޭޓުން މިހާތަނަށް ގުނައިފައިވާ ވޯޓުން ދައްކާ ގޮތުގައި، ހެރިސްއަށް ލިބިފައިވަނީ 45.9 އިންސައްތަ ވޯޓު ކަމަށްވާއިރު ޓްރަމްޕަށް 52.3 އިންސައްތަ ވޯޓު ލިބިފައިވާ ކަމަށް އެސޯސިއޭޓެޑް ޕްރެސްއިން ރިޕޯޓުކޮށްފައިވެއެވެ.
އެމެރިކާގެ ރިޔާސީ އިންތިޚާބުގައި އެންމެ ބޮޑަށް ބަހުސް ކުރެވުނު މައްސަލަތަކުގެ ތެރޭގައި އިސްރާއީލުން ޣައްޒާއަށް ދެމުންދާ ހަމަލާތައް ހިމެނެއެވެ.
މީގެ ކުރިން 2017އިން 2021އަށް ވެރިކަން ކުރެއްވި ޓްރަމްޕް ފާހަގަވެފައިވަނީ އިސްރާއީލަށް ވަރަށް ބޮޑަށް އެހީތެރިވާ ރައީސެއްގެ ގޮތުގައެވެ. އެގޮތުން ގުދުސަކީ އިސްރާއީލުގެ ވެރިރަށް ކަމަށް އެމެރިކާއިން ބަލައިގަންނަ ކަމަށް އެގައުމުގެ ސިޔާސަތު ބަދަލުކޮށް، ތެލް އަވީވްގައި ހުރި އެމެރިކާގެ އެމްބަސީ ގުދުސަށް ބަދަލުކުރެއްވިއެވެ.
ޓްރަމްޕްގެ ކެމްޕެއިނަށް ޔަހޫދީ ޖަމާއަތްތަކުން ބޮޑު އަދަދުތަކުން ޚަރަދުކުރާއިރު، ކެމްޕެއިން ތެރޭގައި ޓްރަމްޕް ވެސް ވަނީ އިސްރާއީލުން ދޭ ހަމަލާތަކުގެ ދިފާއުގައި ވާހަކަދައްކަވައިފައެވެ.
އިއްޔެ ބޭއްވި އެމެރިކާގެ ރިޔާސީ އިންތިޚާބުގެ ވޯޓު ގުނުމުގެ މަސައްކަތް ކުރިއަށްދާއިރު، ޓްރަޕްވަނީ އިންތިޚާބު ކާމިޔާބުވެފައިވާކަން އިއުލާނުކުރައްވައިފައެވެ.