ފަތުރުވެރިކަމުގައި ފައިހަރުލައްވާލައިފައިވާ ކ. މާފުށީގައި ޙައްޖު ކޯޕަރޭޝަނުން ހަލާލް ޓޫރިޒަމް ފަށަން ތައްޔާރުވަމުން އަންނަ ކަމަށް ޙައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް މިއަދު ވިދާޅުވެއްޖެއެވެ.
ހެޔޮ އަގުގައި ރައްޔިތުންނަށް ޙައްޖަށް ދެވޭނެ ގޮތްތަކެއް ފަހިކޮށްދޭން ކުރަމުން އަންނަ މަސައްކަތްތަކާ ގުޅޭ ގޮތުން ފުވައްމުލަކު މެދުދާއިރާގެ ޕީއެންސީގެ މެންބަރު އަލީ ފަޒާދު ވަނީ މިއަދު ޙައްޖު ކޯޕަރޭޝަނާ ސުވާލުކޮށްފައެވެ. އެއީ، ސަރުކާރުގެ މަސްއޫލިއްޔަތު އަދައިކުރާ މިންވަރު ބަލާ ކޮމިޓީގެ ތެރެއިންނެވެ.
ޝަކީލް ވިދާޅުވި ގޮތުގައި ޙައްޖު ކޯޕަރޭޝަނުން މިހާރު ޙައްޖަށް މީހުން ފޮނުވަނީ ގެއްލުމުގައެވެ. އެ ގޮތުން، މިހާރު ޙައްޖަށް ގެންދާ އަގަކީ 2013 ވަނަ އަހަރު ކަނޑައެޅި އަގެކެވެ. އެއީ، 69،965 ރުފިޔާއެވެ.
"ވިސްނާލީމާ އެނގިވަޑައިގަންނަވާނެ ތަކެތީގެ އަގަށް އައިސްފައިވާ ބަދަލުތަކާއި، އެއާލައިން ޓިކެޓުތަކަށް އައިސްފައިވާ ބަދަލުތަކާއި އެކޮމޮޑޭޝަނާ މި ކަހަލަ ހުރިހާ ތަކެއްޗަކާ އެއްކޮށް އަގުތަކަށް ވަނީ ބޮޑެތި ބަދަލުތަކެއް އައިސްފައި،" އޭނާ ވިދާޅުވިއެވެ.
"އެވްރެޖްކޮށް ގާތްގަނޑަކަށް ލައްކައެއްހައި ރުފިޔާ ކޮންމެ ޙައްޖުވެރިއަކަށް ޚަރަދުވެގެން އެބަދޭ،"
ޝަކީލް ވިދާޅުވީ، 3،000 މީހުން ޙައްޖަށް ގެންދާނަމަ ޙައްޖު ކޯޕަރޭޝަނުން މިހާރު އިތުރަށް 30 މިލިއަން ރުފިޔާ ޚަރަދުކުރަން ޖެހޭ ކަމަށެވެ. އެހެންވެ، ޙައްޖަށް މީހުން ގެންދާ އަގު ކުޑަކުރަން ޙައްޖު ކޯޕަރޭޝަނަކީ ފައިދާވާ ކުންފުންޏަކަށް ހަދަން މަސައްކަތްކުރައްވާ ކަމަށް އޭނާ ވިދާޅުވިއެވެ.
އެ ގޮތުން، ރިސްކު ކުޑަ ވިޔަފާރިތަކަށް އެ ކުންފުނިން އިންވެސްޓްކުރަން ނިންމައި، ބައެއް މަސައްކަތްތައް ކުރަމުން އަންނަ ކަމަށް އޭނާ ވިދާޅުވިއެވެ.
"ޙައްޖުގެ ކަންކަމަށް ކުރަންޖެހޭ ހޭދައަކީ ބޭރުގެ ފަރާތްތަކާ ކުރަންޖެހޭ މުއާމަލާތްތަކަކަށްވާތީ، މުޅިން ވެސް ބޭރު ފައިސާއިން މުއާމަލާތްތައް ކުރަން މި ޖެހެނީ. އެހެންވީމާ އަޅުގަނޑުމެންނަށް މި ވަގުތު ދިމާވެފައި އޮތް އެންމެ ބޮޑު ދަތިކަމަކީ ބޭރު ފައިސާ ހޯދުމުގެ ދަތިކަން،" އޭނާ ވިދާޅުވިއެވެ.
ޝަކީލް ވިދާޅުވީ، އެހެންވެ ބޭރު ފައިސާ ހޯދަން މާފުށީގައި ގެސްޓްހައުސްއެއް ތަރައްގީކޮށް، ހަލާލް ޓޫރިޒަމް ތައާރަފުކުރަން ނިންމާފައިވާ ކަމަށެވެ.
އެ މަސައްކަތުގެ ތެރެއިން މާފުށީ ކައުންސިލްގެ ކުންފުންޏާއި ޙައްޖު ކޯޕަރޭޝަން ގުޅިގެން ސަބްސިޑިއަރީ ކުންފުންޏެއް ހަދަން ހުށަހަޅާފައިވާ ކަމަށް އޭނާ ވިދާޅުވިއެވެ. އެ ކަމަށް މާފުށިން ބޮޑު ބިމެއް ހަމަޖައްސާފައިވާ ކަމަށް އޭނާ ވިދާޅުވިއެވެ.
"މި ކަމަށްޓަކައި އިންވެސްޓްކުރާނެ ފަރާތްތަކެއް ވެސް އަޅުގަނޑުމެންނަށް އޯލްރެޑީ އެޕްރޯޗްކޮށްފައިވަނީ. މާފުއްޓަކީ އޯލްރެޑީ ޓޫރިޒަމަށް އެސްޓާބްލިޝްޑް ތަނެއް ވީމާ މިއީ ވަރަށް ރިސްކު ކުޑަ، އެހެންނަމަވެސް ރަނގަޅު އާމްދަނީއެއް ބޭރު ފައިސާއެއް ލިބޭނެ މަގެއް ކަމަށް އަޅުގަނޑުމެންނަށް ގަބޫލުކުރެވޭތީ މި ދާއިރާއަށް އިންވެސްޓްކުރަނީ،" އޭނާ ވިދާޅުވިއެވެ.
މީގެ އިތުރުން، ޙައްޖު ކޯޕަރޭޝަނުން އަންނަނީ ހުޅުމާލޭގައި ލަގްޒަރީ އެޕާޓްމަންޓްތަކެއް ވެސް ބިނާކުރަމުންނެވެ. ޝަކީލް ވިދާޅުވި ގޮތުގައި މިހާރު ކުރިއަށް ދަނީ އެ އިމާރާތް ކުރެހުމުގެ މަސައްކަތެވެ. ކުރިއަށް އޮތް ދެތިން މަހެއް ތެރޭ އެ މަސައްކަތް އެވޯޑުކުރެވޭނެ ކަމަށް އޭނާ ވިދާޅުވިއެވެ.
ސަރުކާރުން ވަނީ ޙައްޖަށް މީހުން ގެންދަން ލިބޭ ހުރިހާ ކޯޓާއެއް ޙައްޖު ކޯޕަރޭޝަނަށް ދޭން ނިންމައިފައެވެ.
އެކަމަކު، އަންނަ އަހަރުން ފަށައިގެން ކޯޓާ އިތުރުވެއްޖެ ނަމަ، އިތުރުވާ ބައިން އަމިއްލަ ޖަމާއަތްތަކަށް ދިނުމުގެ ވިސްނުން ވެސް ގެންގުޅުއްވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މީގެ ކުރިން ވިދާޅުވެފައިވެއެވެ.