ރާއްޖޭން މީހުން ޙައްޖަށް ގެންދަން އިތުރު ކޯޓާތަކެއް ލިބިއްޖެ ނަމަ، އަމިއްލަ ޖަމިއްޔާތަކަށް އެ ފުރުސަތު ދިނުމުގެ ވިސްނުން ގެންގުޅުއްވާ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދު މިއަދު ވިދާޅުވެއްޖެއެވެ.
ޙައްޖު ކޯޓާތައް އަމިއްލަ ޖަމާއަތްތަކަށް ނުދީ، ޙައްޖު ކޯޕަރޭޝަނަށް ދޭން ސަރުކާރުން ވަނީ ނިންމައިފައެވެ.
ރާއްޖޭގައި ޙައްޖާއި ޢުމްރާގެ ޚިދުމަތްދޭ ކުންފުނިތަކަށް ބާއްވާ ފުރަތަމަ 'ޙައްޖު ޢުމްރާ ކޮންފަރެންސް' ފެށުމަށް ހެނދުނު އިސްލާމިކް މިނިސްޓްރީގައި ބޭއްވި ރަސްމިއްޔާތުގައި މިނިސްޓަރު ވިދާޅުވީ، މިހާރު ކަންތައް ހަމަޖެހިފައި އޮންނަ ގޮތުން، ސައުދީ އަރަބިއާއިން ބޮޑަށް ބާރު އަޅަނީ ޙައްޖުގެ ކަންތައް ދައުލަތުގެ ބެލުމުގެ ދަށުގައި ބޭއްވުމަށް ކަމަށެވެ.
އެ ގޮތުން، ރާއްޖެއަށް ލިބޭ ކޯޓާތައް ޙައްޖު ކޯޕަރޭޝަނަށް ދޭ ގޮތަށް ހަމަޖައްސާފައި އޮތް ކަމަށް ވިޔަސް، މުސްތަގުބަލުގައި އިތުރު ކޯޓާތަކެއް ލިބިއްޖެ ހާލަތެއްގައި އަމިއްލަ ޖަމިއްޔާތަކަށް އެ ކޯޓާތަކުން ބައެއް ދިނުމުގެ ވިސްނުން ހުރި ކަމަށް މިނިސްޓަރު ޝަހީމް ވިދާޅުވިއެވެ.
ހައްޖާ އުމްރާގެ ކޮންފަރެންސް ފެށުމަށް ބޭއްވި ރަސްމިއްޔާތުގެ ތެރެއިން --- ފޮޓޯ/ އިސްލާމިކް މިނިސްޓްރީ
އަޅުގަނޑުމެން ޙައްޖު ކަންކަން ދިވެހިރާއްޖެއަށް ލިބޭ ރަސްމީ ކޯޓާ ޙައްޖު ކޯޕަރޭޝަނަށް ދޭން ހަމަޖައްސާފައި އޮތް ކަމުގައި ވިޔަސް، އިތުރު ކޯޓާތަކެއް މުސްތަގުބަލުގައި ވެސް ލިބިއްޖެ ހާލަތެއްގައި އަމިއްލަ ޖަމާއަތްތަކަށް އެ ކޯޓާއިން ވެސް ބައެއް ދިނުމުގެ ވިސްނުން އެބަހުރި،އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދު
ކޮވިޑްގެ ޢާލަމީ ވަބާއަށް ފަހުގައި ސައުދީގައި ޙައްޖު ކަންކަމުގައި ކުރިން ހާލަތަށް އަދި ނުދާ ކަމަށާއި އެ ގައުމުގެ ހާލަތަށް ބަލައި މައްކާއާއި މަދީނާއަށް ގެންނަ އުމްރާނީ ބަދަލުތަކުގެ ސަބަބުން ކުރީގައި ގައުމުތަކަށް ކޯޓާ އިތުރުކުރާ ގޮތަށް މިހާރު އެކަން ނުކުރާ ކަމަށް މިނިސްޓަރު ވިދާޅުވިއެވެ.
ޝަހީމް ވިދާޅުވި ގޮތުގައި މީގެ ކުރިން ގައުމުތަކަށް އިތުރަށް 1،000 ނުވަތަ 2،000 ކޯޓާ ދިން ކަމަށްވި ނަމަވެސް، އެ ގައުމުގެ ކަންކަމަށް ބަދަލު އައުމަށް ފަހު ކޯޓާގެ ނިސްބަތަށް ވެސް ބަދަލު އަންނާނެކަމުގެ އިޝާރާތް ލިބިފައި އޮތް ކަމަށް މިނިސްޓަރު ވިދާޅުވިއެވެ.
ހައްޖާ އުމްރާގެ ކޮންފަރެންސް ފެށުމަށް ބޭއްވި ރަސްމިއްޔާތުގެ ތެރެއިން ---- ފޮޓޯ އިސްލާމިކް މިނިސްޓްރީ
އޭގެ އިތުރުން، މިނިސްޓަރު ވަނީ، އަންނަ އަހަރުން ފެށިގެން ޙައްޖާއި ޢުމްރާގެ ކުންފުނިތަކުގެ ތެރެއިން ޚިދުމަތުގެ ގޮތުން އެންމެ ރަނގަޅު ފަސް ކުންފުންޏަކަށް އެވޯޑެއް ދިނުމަށް ނިންމާފައިވާ ކަމަށެވެ. އެކަން ކުރާނީ ކަނޑައެޅޭ އުސޫލެއްގެ ތެރެއިން ކަމަށާއި އެކަން ކުރިއަށް ގެންދާނެ ގޮތަކާ މެދު ކޮންފަރެންސްގައި މަޝްވަރާ ކުރެވޭނެކަން ޝަހީމް ވަނީ ފާހަގަކުރައްވާފައެވެ.
އެ ކަމަކީ ސައުދީގައި ވެސް އޮތް ކަމެއް ކަމަށާއި އެވޯޑު ލިބުމަކީ ޖަމާއަތަށް ލިބޭނެ ވަރަށް ބޮޑު ބާރެއް ކަމަށް މިނިސްޓަރު ވިދާޅުވިއެވެ.
މިއަދު ބާއްވާ ކޮންފަރެންސްގެ މަޤުސަދަކީ ޙައްޖާއި އުމްރާއަށް ގެންދިއުމުގެ ނިޒާމު ހަރުދަނާކުރުމާއި، ޙައްޖާއި ޢުމްރާގެ ޚިދުމަތް ދެމުން އަންނަ ކުންފުނިތަކުގެ ހިޔާލާއި މަޝްވަރާ ހޯދުން ކަމަށް އެ ވުޒާރާއިން ބުންޏެވެ.
މިއީ ޙައްޖާ ޢުމްރާގެ ނިޒާމު ހަރުދަނާކުރުމަށް އެވުޒާރާއިން ކުރަމުން އަންނަ މަސައްކަތްތަކުގެ ތެރެއިން ކުރިއަށްދާ ކޮންފަރެންސްއެއްކަން ފާހަގަކޮށްލެވެއެވެ. މި ކޮންފަރެންސް ކުރިއަށް ގެންދާނީ ދެ ދަންފަޅިއަކަށް ބަހާލައިގެން ކަމަށްވާއިރު، އެ ކޮންފަރެންސްގެ ބައިވެރިންގެ މެދުގައި ދެ ފަރާތަކަށް ޢުމްރާގެ ދަތުރެއް ލިބޭ ގުރުއަތުލުމެއް ނެގުމަށް ވަނީ ހަމަޖެހިފައެވެ.