މޯލްޑިވްސް އިންލޭންޑް ރެވެނިއު އޮތޯރިޓީ (މީރާ)ގެ ޑެޕިއުޓީ ކޮމިޝަނަރު ޖެނެރަލް އޮފް ޓެކްސޭޝަންގެ މަގާމަށް ފާތިމަތު އަމީޒާ އައްޔަންކުރުމަށް ރައްޔިތުންގެ މަޖިލީހުން މިއަދު ރުހުން ދީފިއެވެ.
މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި އަމީޒާއަށް ރުހުން ދިނީ ޖަލްސާގައި ބައިވެރިވެ ވޯޓުދެއްވި 64 މެމަބްރުންގެ އިއްތިފާގުންނެވެ.
މަޖިލީހުން އަމީޒާއަށް ރުހުންދިނީ މީގެ ކުރީން އެ މަގާމުގައި ހުންނެވި އަސްމާ ޝަފީއުގެ ދައުރު ނިމިދިޔަ މަހަށް ހަމަވުމުންނެވެ. އެ މަގާމަށް ދެ ބޭފުޅަކު ކުރިމަތިލި ނަމަވެސް މަޖިލީހުން ރުހުން ދީފައި ވަނީ ރައީސުލް ޖުމްހޫރިއްޔާ ޑރ. މުޙައްމަދު މުއިއްޒު އިސްކަންދެއްވި ގޮތަށެވެ.
އެ މަގާމަށް ކުރިމަތިލުމަށް ރައީސުލްޖުމްހޫރިއްޔާގެ އޮފީހުން ހުޅުވާލީ މިދިޔަ އޮކްޓޯބަރު މަހުގެ ތިން ވަނަ ދުވަހެވެ. އެ މުއްދަތުގައި އެ މަގާމަށް ކުރިމަތިލި ބޭފުޅުންގެ ތެރެއިން އަމީޒާއާއި މިހާރު ވެސް އެ މަގާމުގައި ހުންނެވި އަސްމާގެ ނަން މަޖިލީހަށް ހުށަހެޅީ މިދިޔަ އޮކްޓޯބަރުމަހުގެ 23 ވަނަ ދުވަހުގައެވެ.
ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ ދައުރަކީ ފަސް އަހަރެވެ.