އަންނަ އަހަރަށް ލަފާކޮށް ހުށަހެޅި ބަޖެޓުގައި ކައުންސިލްތަކަށް ބްލޮކް ގްރާންޓް ދޭން ހިމަނާފައިވާ އަދަދު ގާނޫނުގައި ބަޔާންކުރާ އަދަދަށްވުރެ މަދުވުމުން، ބްލޮކް ގްރާންޓަށް ކަނޑައެޅި ފައިސާއަށް މަދުވާ ބައި، ކޮންޓިންޖެންސީ ބަޖެޓުން ނަގަން މާލީ ވަޒީރު މޫސާ ޒަމީރު މިއަދު އެދިވަޑައިގެންފިއެވެ.
އަންނަ އަހަރަށް ލަފާކުރި ބަޖެޓުގައި ބްލޮކް ގްރާންޓްގެ ގޮތުގައި ހިމަނާފައިވަނީ 1.4 ބިލިއަން ރުފިޔާއެވެ.
އެއީ، ލާމަރުކަޒީ ގާނޫނުގައި ބަޔާންކުރާ އަދަދަށްވުރެ ކުޑަ އަދަދެކެވެ. އެހެންވެ، އިދިކޮޅު ފަރާތްތަކުން ވަނީ އެ ކަމުގެ ކަންބޮޑުވުން ފާޅުކޮށް، ވަރަށް ބޮޑަށް ނުރުހުން ފާޅުކުރައްވައިފައެވެ.
އެހެންވެ، ރައީސް ޑރ. މުހައްމަދު މުއިއްޒު ވެސް ވަނީ ގާނޫނުގައި ބަޔާންކުރާ އަދަދަށް ކައުންސިލްތަކަށް ބްލޮކް ގްރާންޓް ދެއްވާނެ ކަމަށް ކުރިން ވިދާޅުވެފައެވެ.
މާލީ ވަޒީރު މޫސާ ޒަމީރު މިއަދު ރައްޔިތުންގެ މަޖިލީހަށް ފޮނުއްވި ސިޓީއެއްގައި ވަނީ ބްލޮކް ގްރާންޓްގެ ގޮތުގައި އަންނަ އަހަރަށް ލަފާކޮށް ހުށަހެޅި ބަޖެޓުގައި 1.4 ބިލިއަން ރުފިޔާ ހިމަނާފައިވީ ނަމަވެސް ލާމަރުކަޒީ ގާނޫނުގައި ބަޔާންކުރާ މިންގަނޑާ އެއްވަރަށް އެ އަދަދު އިތުރުކުރަން ނިންމާފައިވާ ކަމަށް ވިދާޅުވެފައެވެ.
އެހެންވެ، ގާނޫނުގައި ބަޔާންކުރާ މިންގަނޑަށް އެ އަދަދު އިތުރުކުރަން ބޭނުންވާ 99.6 މިލިއަން ރުފިޔާ ކޮންޓިންޖެންސީ ބަޖެޓުން ނަންގަވައި، ބްލޮކް ގްރާންޓްގެ ގޮތުގައި ހިމަނަން ވަޒީރު ވަނީ އެދިވަޑައިގެންފައެވެ.
މި ބަދަލާ އެކު ކައުންސިލްތަކަށް ބްލޮކް ގްރާންޓްގެ ގޮތުގައި ލިބޭ އަދަދު އިތުރުވާނެއެވެ.
ކޮންޓިންޖެންސީ ބަޖެޓުން ނަގައިގެން ބްލޮކް ގްރާންޓުގެ ގޮތުގައި މަދުވައި ބައި ހަމަޖައްސަން މާލީ ވަޒީރު ނިންމެވީ ބަޖެޓުގެ ޖުމުލަ އަދަދަށް ބަދަލު ނުގެންނާށެވެ. އެހެންވެ، ޖުމުލަ އަދަދަށް ބަދަލު ނާންނާނެ ގޮތަށް މި ބަދަލު ގެނެސްދެއްވަން އޭނާ ވަނީ މަޖިލީހުގައި އެދިވަޑައިގެންފައެވެ.
މަޖިލީހުގެ ރައީސް އަބްދުއްރަޙީމް އަބްދުﷲ ވަނީ ވަޒީރުގެ ސިޓީ، ބަޖެޓު ދިރާސާކުރާ ކޮމިޓީއަށް ފޮނުއްވައިފައެވެ.
ލާމަރުކަޒީ ގާނޫނުގައި ބުނެފައިވަނީ ބަޖެޓުގެ ފަސް ޕަސެންޓު ބްލޮކް ގްރާންޓުގެ ގޮތުގައި ކައުންސިލްތަކަށް ދޭންޖެހޭނެ ކަމަށެވެ. ފުރަތަމަ ބަޖެޓު ހުށަހެޅިއިރު އެ އަދަދު ކުޑަކޮށް، ހިމެނުމުން އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
ފާހަގަކޮށްލެވޭ ގޮތުގައި މި މައްސަލައިގައި އިދިކޮޅު އެމްޑީޕީން މީގެ ކުރިން ވަނީ ބަޖެޓު އަލުން ހުށަހަޅަން ވެސް ސަރުކާރަށް ގޮވާލައިފައެވެ.