މިދިޔަ ސެޕްޓެމްބަރު މަހުގެ 27ގައި ސިނަމާތަކުގައި ދެއްކި ފިލްމު "ދެވާރާ: ޕާޓް 1" މި ހަފުތާގެ ހުކުރު ދުވަހު ނެޓްފްލިކްސްގައި ސްޓްރީމްކުރަން ނިންމައިފިއެވެ.
ބެލުންތެރިންގެ ފަރާތުން ވެސް ބޮޑު ތަރުހީބެއް ލިބުނު މި ފިލްމަކީ، ބަތަލާ ޖާންވީ ކަޕޫރުގެ ކެރިއަރުގެ ފުރަތަމަ ތެލުގޫ ފިލްމެވެ. މިއީ ބަތަލާ ސައުތު ސިނަމާއަށް ތަޢާރަފްވުމުގެ ގޮތުން ކުޅުނު ފުރަތަމަ ފިލްމު ވެސް މެއެވެ.
ޖާންވީއާ އެކު ފިލްމުގެ ލީޑް ރޯލުން ތެލުގޫ އެކްޓަރު އެންޓީއާރް ޖޫނިއާ ފެންނާނެއިރު މި ފިލްމުގެ ވިލެންގެ ރޯލް ކުޅެފައިވަނީ ބޮލީވުޑްގެ އެކްޓަރު ސައިފް އަލީ ޚާނެވެ. މިއީ 2022 ވަނަ އަހަރު ރިލީޒްކޮށް ބޮޑު ކާމިޔާބީއެއް ހޯދި ފިލްމު "އާރްއާރްއާރް"އަށް ފަހު ތެލުގޫ އެކްޓަރު އެންޓީއާރު ޖޫނިއަ ބެލުންތެރިންނަށް ފެންނާނެ ފުރަތަމަ ފިލްމެވެ.
ފިލްމު "ދެވާރާ: ޕާޓް 1"ގެ މަންޒަރެއްގައި ބަތަލާ ޖާންވީ--ފޮޓޯ/ބޮލީވުޑްހަންގާމާ
ނެޓްފްލިކްސްގައި ފިލްމު ފުރަތަމަ ސްޓްރީމްކުރަން ނިންމާފައިވަނީ އިންޑިއާގެ ދެކުނުގެ މީހުން އާއްމުކޮށް ވާހަކަދައްކާ އުޅޭ ތެލުގޫ، ތަމަޅަ، މަޅަޔާލަމް އަދި ކަންނާޑާ ބަހުންނެވެ. ނަމަވެސް، ހިންދީ ބަހުން އަޑު އަޅާފައިވާ ފިލްމު ވަރަށް އަވަހަށް ނެޓްފްލިކްސްއިން ޕްރީމިއާ ކުރާނެ ކަމަށާއި އެހެންނަމަވެސް އެއީ ކޮން ތާރީޚެއްކަން އަދި އިއުލާނުކޮށްފައެއް ނުވެއެވެ.
މި ފިލްމު ހިންދީ ބަހުން އޯޑިއަންސަށް ގެނެސްދިނުމުގެ ޒިންމާއާ ހަވާލުވެފައިވަނީ ޕްރޮޑިއުސަރު ކަރަން ޖޯހަރުގެ ދަރުމާ ކުންފުނިންނެވެ.
އެންޓީއާރް ޑަބަލް ރޯލަކުން ފެންނަ މި އެކްޝަން ޑްރާމާ ސިނަމާތަކުން ނެގުމަށް ފަހު ނެޓްފްލިކްސްއަށް ގެންނާނެ ދުވަހަކަށް ވަރަށް ގިނަ ބަޔަކު އައީ އިންތިޒާރުކުރަމުންނެވެ.