މަސްތުވާތަކެތި ވިއްކި މީހަކު އުމުރަށް ޖަލަށް ލައި، 400،000 ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން މިއަދު ހުކުމް ކޮށްފިއެވެ.
މި މައްސަލައިގައި ހުކުމް ކުރީ މާލޭ ހ. ބްލޫބާޑުގޭ ހުސައިން އަބްދުﷲގެ މައްޗަށެޗެ.
ދައުލަތުން އޭނާގެ މައްޗަށް އުފުލީ މަސްތުވާތަކެތީގެ ބާވަތެއް ކަމަށްވާ ޑައިމޯފިން ޓްރެފިކް ކުރުމުގެ ކުށުގެ ދައުވާއެވެ.
އަބްދުﷲ އިތުރު ބަޔަކާ ގުޅިގެން ރާއްޖެއަށް މަސްތުވާތަކެތި އެތެރެކޮށް، އެ ބޭނުންކޮށް އޭގެ ވިޔަފާރި ކުރުމަށް ގ. ކޯޒީގޭގެ ދެވަަނަ ފަންގިފިލާ ކުއްޔަށް ހިފައިގެން އުޅޭކަމުގެ އިންޓެލް މައުލޫމާތު މިދިޔަ އަހަރުގެ ފެބްރުއަރީގައި ފުލުހުންނަށް ލިބިފައިވެއެވެ. އެއާއެކު ހަމަ އެ ދުވަހު ކޯޓު އަމުރެއްގެ ދަށުން ފުލުހުން އެ އެޕާޓްމަންޓަށް ގޮސް ބަލައިފާސްކުރިއިރު، 50 ގްރާމުގެ ޑައިމޯފިން ހުރި ޕެކެޓެއް ފެނިފައިވެއެވެ. އޭގެ އިތުރުން 24.8 ގްރާމާއި 0.2 ގްރާމުގެ ޑައިމޯފިން ފެނިފައިވެއެވެ.
އަދި އެ އެޕާޓްމަންޓުގެ ބަދިގޭ ސިންކު އަށިދަށުން ދެ ޑިޖިޓަލް ކައްޓާއަކާއި ކަރުހާދުން ހަދާފައިވާ ތިން ސަމުސާ ފެނިފައިވެއެވެ.
މީގެ އިތުރުން އަބްދުﷲގެ އަތުގައި އޮތް ދަބަހަކުންނާއި އެޕާޓްމަންޓުގެ ތެރެއިން 261،000 ރުފިޔާ ވެސް ފެނިފައިވެއެވެ.
އެއީ މަސްތުވާތަކެތީގެ ވިޔަފާރިކޮށްގެން ހޯދި ކަމަށް ކަމަށް ބެލެވޭތީ، ދައުވާގައި އެ ފައިސާ ދައުލަތަށް ނަގައިދިނުމަށް އެދިފައި ވެއެވެ.
މަސްތުވާތަކެއްޗާބެހޭ ގާނޫނުގައި ބަޔާންކޮށްފައި އޮންނަނީ، މަސްތުވާތަކެއްޗަށް ދެވިހިފާފައިނުވާ މީހެއްގެ އަތުގައި ހަތަރު ގްރާމަށްވުރެ ގިނަ އަދަދަކަށް ޑައިމޯފިން ހުރެއްޖެނަމަ، އެ އެއްޗެއް އޭނާގެ އަތުގައި އެ ހުރީ ޓްރެފިކް ކުރުމަށް ކަމުގައި ބެލެވޭނެ ކަމަށެވެ. އެ ފަދަ ކުށެއްގެ އަދަބަކީ އުމުރަށް ޖަލަށްލުމާއެކު، 100،000 ރުފިޔާއާއި 10،000،000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ.
ގާނޫނުގައި ބަޔާންކޮށްފައި އޮންނަ ގޮތުން ކުށެއް ކުރުމަށް ބޭނުންކުރި މަސްތުވާތަކެއްޗާއި އާލާތާއި އަދި ކުށުގެ އަމަލުން ހޯދާފައިވާ މުދަލާއި ފައިސާ ވެސް އަތުލެވޭނެއެވެ.
ކޯޓުން ކަނޑައަޅާފައިވަނީ ޝައްކެއް ނެތް މިންވަރަށް މި މައްސަލަ އަބްދުﷲގެ މައްޗަށް ސާބިތުވާ ކަމަށެވެ. އެ ގޮތުން އޭނާގެ މައްޗަށް ކަނޑައެޅޭ އަދަބެއްގެ ގޮތުގައި އޮތީ އުމުރަށް ޖަލަށްލުމާ އެކު ބޮޑު އަދަދަކުން ޖޫރިމަނާ ކުރުމެވެ.
އެހެން ނަމަވެސް ހުކުމުގެ ކުރިން އެއް އަހަރާއި ނުވަ މަސްދުވަހު އޭނާ ބަންދުގައި ހޭދަކޮށްފައިވާތީ، އެ މުއްދަތު ޖަލު އަދަބުން ކެނޑުމަށް ފަހު ކްރިމިނަލް ކޯޓުން އަބްދުﷲގެ މައްޗަށް ހުކުމްކުރީ 23 އަހަރާއި ދެ މަހާއި 25 ދުވަހުގެ ޖަލު އަދަބަކާއެކު 400،000 ރުފިޔާއިން ޖޫރިމަނާ ކުރުމަށެވެ.