ދުޅަހެޔޮ ސިއްހަތެއްގައި ދެމިހުރުމަށް މަސައްކަތްކޮށް ދުވަހުގެ ކެއުން ވަކި ގޮތަކަށް ބަހައްޓަން ސަމާލުކަންދޭ ކޮންމެ މީހަކު ގެންގުޅޭ މެނޫގެ ލިސްޓުގެ އެންމެ މުހިއްމު އެއް ބާވަތަކަށް ވާނީ ޗިއާ ސީޑްސްއެވެ.
މިއީ ހަށިގަނޑަށް ނުހަނު ގިނަ ފައިދާތަކެއް ލިއްބައިދޭ އެއްޗެކެވެ. އޭގެ ތެރޭގައި ހަށިގަނޑަށް ބޭނުންވާ އޮމެގޭ 3 ފެޓީ އެސިޑްސް، ފައިބާ، ޕްރޮޓީން، ކެލްސިއަމް، ފޮސްފަރަސް އަދި ޒިންކް ހިމެނެއެވެ.
މީގައި ހިމެނޭ އޮމެގާ-3 ފެޓީ އެސިޑުގެ ސަބަބުން ހިތުގެ ދުޅަހެޔޮކަން އިތުރުކޮށްދީ ހަށިގަނޑުގެ ކޮލެސްޓްރޯލް ދަށްކޮށްދީ ބްލަޑް ޕްރެޝަ ދަށްކޮށްދިނުމަށް އެހީތެރިވެދެއެވެ. ހަމައެއާ އެކު ހަށިގަނޑުގެ އިންފްލެމޭޝަން ދަށްކޮށްދިނުމަށް ވެސް ޗިއާ ސީޑް ކެއުމުން އެހީތެރިވެދެއެވެ.
ޗިއާ ސީޑް: ހެނދުނުގެ ނާސްތާ ފައިދާހުރި މާއްދާތަކުން ފުރިހަމަކޮށްލަދޭ ބާވަތެއް--ފޮޓޯ/ ޕިންޓްރެސްޓް
ޗިއާ ސީޑްގައި ހިމެނޭ މުހިއްމު މާއްދާ ޑައިޓްރީ ފައިބަރުގެ ސަބަބުން ހަށިގަނޑަށް އެތެރެކުރެވޭ ކާނާ ރަނގަޅުގޮތުގައި ހަޖަމު ކުރުމަށް ބާރު އަޅައެވެ. ހަށިގަނޑުގައި އުފެދޭ ގުލްކޯޒް މި މާއްދާގެ ސަބަބުން ވަކި މިންގަނޑެއްގައި ހިފެހެއްޓުމަށް އެހީތެރިވެދޭއިރު މިއީ ހަކުރު ބަލި ތަހައްމަލުކުރާ މީހުންނަށް ވެސް ބޭނުން ކުރެވިދާނެ މުހިއްމު ބާވަތެކެވެ.
ހަށިގަނޑުގެ ބަރުދަން ލުއިކުރާ މީހުންގެ މެދުގައި އެންމެ މަގުބޫލު ޗިއާ ސީޑް ކެއުމުގެ ސަބަބުން ހައިހޫނުކަން ފިލުވައިދީ ބަނޑު ފުރިފައިވާ ކަމުގެ އިހުސާސްކުރުވާ ކަމަށް ދިރާސާތަކުން ވަނީ ދައްކާފައެވެ.
ޗިއާ ސީޑްއަކީ އޭގައި މަތީ މިންވަރަށް ފައިބާ، ޕްރޮޓީންސް އަދި އޮމެގާ- 3 ފެޓީ އެސިޑްސްގެ މާއްދާ ހިމެނޭ ބާވަތަކަށްވުމުން ދުވާލެއްގެ މައްޗަށް ދެ މޭޒުމަތީ ސަމުސާއަށް ވުރެ ގިނައިން މި ބޭނުން ނުކުރުމަށް ޑައިޓީޝަނުން ލަފާ ދެއްވައެވެ. ޗިއާ ސީޑް ބޭނުންކުރުމަށް އެންމެ ރަނގަޅު ވަގުތަކީ ހެނދުނު ހުސް ބަނޑާ ހުރެ ތާފަނާ ފެނަށް އެ އަޅައިގެންނެވެ.