މާލޭގައި އަމީނިއްޔާ ސްކޫލާ އިންވެގެން ހުރި ކުރީގެ ސީއެޗްއެސްއީ އިމާރާތް ރަސްމީކޮށް، މިރޭ އަލުން ހުޅުވައިފިއެވެ.
މިރޭ އެ އިމާރާތުގައި އޮތް ރަސްމިއްޔާތެއްގައި ސީއެޗްއެސްއީ ހުޅުވައިދެއްވީ ރައީސް، ޑރ. މުޙައްމަދު މުއިއްޒެވެ.
އެ ރަސްމިއްޔާތިގައި ސީއެޗްއެސްއީގެ ދަރިވަރުންގެ ފަރާތުން ވަނީ ރައީސަށް ވަނީ، ސްކޫލުގެ އެހާރާއި މިހާރުގެ ހަނދާނީ ރަމްޒެއް އަރުވައިފައެވެ.
މާލޭގައި ހުރި ސީއެޗްއެސްއީގައި ކިޔަވައިދިނުން ހުއްޓައިލައި، އެ ތަން ބަންދުކުރީ ހުޅުމާލޭގައި ސީއެޗްއެސްއީގެ އާ އިމާރާތެއް ހުޅުވަމަށްފަހު، އެ ތަނަށް ކިޔެވުން ބަދަލުކުރުމާއެކުގައެވެ.
މާލޭ ސީއެޗްއެސްއީ އަލުން ހުޅުވައިފައި: އެ ސްކޫލުގައި ސެޕްޓެމްބަރު މަހު ވަނީ ކިޔަވަން ފަށައިފައި --- ފޮޓޯ/ ރައީސް އޮފީސް
ނަމަވެސް މާލޭގައި އޭލެވެލަށް ކިޔަވައިދޭނެ ސަރުކާރުގެ ސްކޫލެއް ނެތުމަކީ އެ ކަމުގެ ދަތިކަން ގިނަ ދަރިވަރުންނަށާއި ބެލެނިވެރިންނަށް ފޯރަމުންދާ ކަމެއް ކަމަށް އާ ސަރުކާރުގެ އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މީގެ ކުރިން ވިދާޅުވިއެވެ.
އެހެންވެ، އެތަނުގެ އާބާތުރަ ފިލުވައި، އަލުން ކިޔަވައި ދޭން ފެށީ މިދިޔަ ސެޕްޓެމްބަރު މަހުގެ އެއްވަނަ ދުވަހެވެ.
އެ ކަން ފާހަގަކުރައްވައި މިނިސްޓަރު ވިދާޅުވީ، މި ސްކޫލު ވާނީ ފުރަމާލޭގައިހުރި މަތީ ސާނަވީއަށް ކިޔަވައިދޭ އެންމެ ފެންވަރު ރަނގަޅު ތަނަށް ކަމަށެވެ.
ހަމައެއާއެކު އެ ތަން ވާނީ ހިތްފަސޭހަ އަދި ދަރިވަރުންނަށް އުފާވެރި އުނގެނުމުގެ މާހައުލު ތަނަވަސްވެފައިވާ ސްކޫލަކަށް ކަމަށް ވިދާޅުވިއެވެ.
އެ ސުކޫލުގައި މިހާރު ކިޔަވަމުން ދަނީ 423 ދަރިވަރުނެވެ.