ޔުނިވާސަލް ޕީރިއޮޑިކް ރިވިއު ޔޫޕީއާރު ގެ 47 ވަނަ ބައްދަލުވުން ސްވިޒަލޭންޑްގެ ޖެނީވާގައި ހުންނަ އދ. ގެ އޮފީހުގައި މިއަދު ފަށައިފިއެވެ.
ދެ ހަފްތާގެ މުއްދަތަކަށް ކުރިއަށްގެންދާ މި ސެޝަން، އޮންނާނީ މިއަދުން ފެށިގެން މި މަހުގެ 15 ވަނަ ދުވަހުގެ ނިޔަލަށެވެ. އަދި މި ސެޝަންގައި 14 ޤައުމެއްގައި އިންސާނީ ޙައްޤުތައް ނަގަހައްޓާ މިންވަރު ވަޒަންކުރުމަށްވަނީ ހަމަޖެހިފައެވެ.
އެ 14 ގައުމުގެ ތެރޭގައި ހިމެނެނީ އަލްބޭނިއާ، ބޫޓާން، ބްރުނާއި ދާރުއްސަލާމް، ޑިމޮކްރެޓިކް ރިޕަބްލިކް އޮފް ދަ ކޮންގޯ، ކޮސްޓަ ރީކާ، ކޮޓް ޑިވުއާ، ޑޮމިނިކާ، އިކުއިޓޯރިއަލް ގިނީ، އިތިއޯޕިއާ، ޑިމޮކްރެޓިކް ޕީޕަލްސް ރިޕަބްލިކް އޮފް ކޮރެއާ، ނިކަރާގުއާ، ނޯވޭ، ޕޯޗުގަލުގެ އިތުރުން ޤަތަރެވެ.
ޔޫޕީއާރު ވޯކިން ގްރޫޕުގެ ތިން ބައްދަލުވުމެއް އިންސާނީ ޙައްޤުތަކާ ބެހޭ ކައުންސިލުގައި ކޮންމެ އަހަރަކު ބާއްވައެވެ. އެގޮތުން، 2022 ވަނަ އަހަރުގެ ނޮވެމްބަރު މަހުން ފެށިގެން މިހާރު ކުރިއަށްދާ ހަތަރު ވަނަ ޔޫޕީއާރު ސައިކަލް 2027 ވަނަ އަހަރާ ހަމައަށް ކުރިއަށްދާނެއެވެ.
ޔުނިވާސަލް ޕީރިއަޑިކް ރިވިއުއަކީ އ.ދ. ގެ މެމްބަރު ޤައުމުތަކުގައި އިންސާނީ ހައްޤުތަކުގެ ޙާލަތު ވަޒަންކޮށް ދެނެގަތުމަށް އެ ޖަމުޢިއްޔާއިން ކަނޑައަޅާފައިވާ ނިޒާމެކެވެ.
އަދި އިންސާނީ ހައްޤުތަކުގެ ޙާލަތު ރަނގަޅުކުރުމަށާއި އިންސާނީ ހައްޤުތައް ކަށަވަރުކުރުމުގައި މެމްބަރު ޤައުމުތަކުން ހޯދާފައިވާ ކުރިއެރުން އދ.ގެ އިންސާނީ ޙައްޤުތަކާ ބެހޭ ކައުންސިލަށް ހުށަހެޅުމުގެ ފުރުޞަތު، ޔޫޕީއާރު މެދުވެރިކޮށް އެ ޤައުމުތަކަށް ލިބިގެންވެއެވެ.
ޔޫޕީއާރުގެ ނިޒާމު ޤާއިމުކޮށްފައިވަނީ އިންސާނީ ޙައްޤުތަކާ ބެހޭ އިލްތިޒާމުތައް އުފުލުމުގައި މެންބަރު ޤައުމުތަކުން އިތުރަށް ރަނގަޅުކުރަން ފެންނަ ކަންކަން ހުށަހަޅައި، އެޤައުމުތަކުން ކުރަމުން އަންނަ މަސައްކަތުގެ އަގުވަޒަންކުރެވޭނެ ފަދަ ގޮތަކަށެވެ.
ޔޫޕީއާރު ވޯކިން ގްރޫޕްގެ ބައްދަލުވުންތަކުގައި ކަނޑައެޅިފައިވާ ކޮންމެ ޤައުމެއްގެ އިންސާނީ ޙައްޤުތަކުގެ ޙާލަތު ވަޒަންކުރުމަށް އެހީތެރިވުމުގެ ގޮތުން އދ.ގެ އިންސާނީ ޙައްޤުތަކާ ބެހޭ ކައުންސިލްގެ ތިން މެމްބަރުން "ޓްރޮއިކާ" ގެ ގޮތުގައި ހަރަކާތްތެރިވެއެވެ. އެގޮތުން، މިފަހަރުގެ ބައްދަލުވުމުގައި އދ.ގެ އިންސާނީ ޙައްޤުތަކާ ބެހޭ ކައުންސިލްގެ މެމްބަރެއްގެ ހައިސިއްޔަތުން ދިވެހިރާއްޖެއިން ޤަތަރުގެ ރިވިއުގައި ޓްރޮއިކާގެ މެމްބަރުކަން ކުރާނެއެވެ.
ޔޫޕީއާރުގެ 47 ވަނަ ބައްދަލުވުމުގައި ދިވެހިރާއްޖެއިން ބައިވެރިވާ ވަފުދުގައި އެންމެ އިސްކޮށް ހުންނަވާނީ ޖެނީވާގައި ހުންނަ އދ.ގެ އޮފީހާއި އެހެނިހެން ބައިނަލްއަޤްވާމީ ޖަމުޢިއްޔާތަކަށް ކަނޑައަޅާފައި ހުންނަ ދިވެހިރާއްޖޭގެ ދާއިމީ މަންދޫބު ޑރ. ސަލްމާ ރަޝީދެވެ.
އަދި މި ވަފުދުގައި ކައުންސިލާ އާދަމް ހާމިދު، ކައުންސިލާ އަލްއުސްތާޛާ އާމިނަތު ޝިފާޔާ އިބްރާހީމް، ސެކަންޑް ސެކްރެޓަރީ މަރްޔަމް ފާތިކާ ފަޔާޒް އަދި އެޓާޝޭ، މުޙައްމަދު ރާއިދު ސައީދު ހިމެނެއެވެ.
މިފަހަރުގެ ޔޫޕީއާރު ބައްދަލުވުމުގައި ވެސް ރާއްޖޭގެ ވަފުދުން ބައިވެރިވެ، ދިވެހި ސަރުކާރުގެ މުހިންމު ސިޔާސަތުތަކާ އެއްގޮތްވާ ގޮތުގެ މަތިން ބިނާކުރަނިވި އިސްލާޙުތަކެއް ރިވިއު ކުރެވޭ ޤައުމުތަކަށް ހުށަހަޅާނެ ކަމަށް ފޮރިން މިނިސްޓްރީއިން ވަނީ ބުނެފައެވެ.