އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑާއި ޗެލްސީ ބައްދަލުކުރި މެޗު އެއްވަރުވެއްޖެއެވެ.
ޕްރިމިއާ ލީގުގައި އެންމެ ވާދަވެރި ޓީމުތަކުގެ ތެރޭގައި ހިމެނޭ ދެ ޓީމުގެ ކުރިމަތިލުން ނިމުނީ 1-1 ދެ ޓީމު އެއްވަރުވެގެންނެވެ.
ޔުނައިޓެޑްގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޗެލްސީންނެވެ. މެޗުގެ ފުރަތަމަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވިފައިނުވި ނަމަވެސް ލަނޑު ޖަހާނެ ރަނގަޅު ފުރުސަތު ދެ ޓީމަށް ވެސް ލިބިގެންދިޔައެވެ.
މެޗުގެ ފުރަތަމަ ލަނޑު ޖަހައި މެޗުގެ ލީޑު ނަގާފައިވަނީ މެޗުގެ 70 ވަނަ މިނެޓުގައި ލިބުނު ޕެނަލްޓީއަކުން ޔުނައިޓެޑެވެ. ޗެލްސީގެ ރޮބަޓް ސަންޗޭޒް ޔުނައިޓެޑްގެ ފޯވަޑް ރަސްމުސް ހޮއިލުންޑަށް ކުރި ފައުލަކާ ގުޅިގެން ދިޔަ މި ޕެނަލްޓީ ކާމިޔާބުކޮށްދީ އެ ޓީމަށް ލީޑު ނަގައިދިނީ ކެޕްޓަން ބްރޫނޯ ފެނާންޑޭޒެވެ. މިއީ އޭނާ ލީގުގައި މި ސީޒަންގައި ކާމިޔާބުކުރި ފުރަތަމަ ލަނޑެވެ. މި ލަނޑާ އެކު ޔުނައިޓެޑުން އުފާފާޅުކޮށް މިލީޑު ދެމެހެއްޓޭތޯ މަސައްކަތްކުރި ނަމަވެސް ޗެލްސީން ވަނީ ހަތަރު މިނެޓު ފަހުން ލަނޑެއް ޖަހައި މެޗުގެ ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ މޮއިސެސް ކައިސޭޑޯއެވެ.
މި ލަނޑު ޖެހިތާ ކުޑައިރުކޮޅެއް ފަހުން ޗެލްސީއަށް މެޗުގެ ލީޑު ނަގާނެ ރަނގަޅު ފުރުސަތެއް ލިބިގެންދިޔަ ނަމަވެސް މުޅި މެޗުގައި ދެ ޓީމުގެ ފަރާތުން ވެސް ލިބުނު ފުރުސަތުތައް ނިންމާނުލެވިދިޔަތަން މި ފަހަރު ވެސް ފެނިގެންދިޔައެވެ. ނަތީޖާއަކަށް ވެގެންދިޔައީ ދެ ޓީމުގެ ކުރިމަތިލުން އެއްވަރުވެގެންދިއުމެވެ.
މެޗުން ލިބުނު ޕޮއިންޓާ އެކު ޗެލްސީ މިހާރު ވަނީ އާސެނަލް ފަހަތަށް ޖައްސާލާ ތާވަލުގެ ހަތަރުވަނައަށް ކުރިއަށް ޖެހިލާފައެވެ. އެއީ، އާސެނަލާ އެއްވަރަށް 18 ޕޮއިންޓް ލިބި ނަމަވެސް ފައިދާ ލަނޑަށް ބަލާއިރު ކުރި ލިބޭތީއެވެ. އަދި، ޔުނައިޓެޑްގެ އޮތީ 12 ޕޮއިންޓާ އެކު ތާވަލުގެ 13 ވަނައިގައެވެ.