އެޓަލާންޓާއިން ނަޕޯލީ ބަލިކޮށް، އެންމެން ހައިރާންކޮށްލައިފި

އިޓާލިއަން ސެރީއާގައި ތާވަލްގެ އެއްވަނައިގައި އޮތް ނަޕޯލީ ބަލިކޮށް، އެޓަލާންޓާއިން ގިނަ ބަޔަކު ހައިރާން ކޮށްލައިފިއެވެ.

ނަޕޯލީގެ ދަނޑުގައި ކުޅުނު މި މެޗު އެޓަލާންޓާއިން ކާމިޔާބުކޮށްފައިވަނީ ގިނަ ބަޔަކު ހީކުރިގޮތާ ހިލާފަށް 3-0 އިންނެވެ.

މެޗުގައި އެޓަލާންޓާގެ ތަފާތަކަށް ވެގެންދިޔައީ އެ ޓީމުގެ ފޯވަޑް އަޑެމޯލާ ލޫކްމަންއެވެ. ލީގުގައި މިހާތަނަށް އެންމެ ގިނަ ލަނޑު ޖަހާފައިވާ އެޓަލާންޓާގެ މެޓިއޯ ރެޓެގޫ ބެންޗުގައި ބާންދައިގެން ފެށި މި މެޗުގައި އެ ޓީމުގެ ފޯވަޑް ލައިނުގައި ކުޅެމުންދިޔަ ލޫކްމަންގެ އިތުރުން ޗާލްސް ޑި ކެޓެލެއާވަނީ މޮޅު ކުޅުމެއް ދައްކާފައެވެ.

މެޗުގައި އެޓަލާންޓާއިން ކާމިޔާބުކުރި ފުރަތަމަ ލަނޑު މެޗުގެ 10 ވަނަ މިނެޓުގައި ލޫކްމަން ކާމިޔާބުކޮށްދިނީ ޑި ކެޓެލެއާ ތަނަވަސްކޮށްދިން ފުރުސަތެއްގައެވެ. މި ލަނޑު ޖެހިތާ މާ ގިނައިރުތަކެއްނުވެ، ނަޕޯލީއަށް މެޗުގެ ނަތީޖާ ހަމަހަމަކުރުމަށް ފުރުސަތު ލިބިގެންދިޔަ ނަމަވެސް ސްކޮޓް މެކް ޓޮމިނޭ ފޮނުވާލި ހަމަލާ ބޭރަށް ދިޔައީ ގޯލް ދަނޑީގައި ޖެހިފައެވެ.

މެޗުގައި އެޓަލާންޓާއިން ކާމިޔާބުކުރި ދެވަނަ ލަނޑު މެޗުގެ 31 ވަނަ މިނެޓުގައި އަނެއްކާ ވެސް ޑި ކެޓެލެއާ ތަނަވަސްކޮށްދިން ފުރުސަތެއްގައި ކާމިޔާބުކުރީ ލޫކްމަންއެވެ. ލޫކްމަންއަށް އެންމެ ފަހުން ލީގުގައި ރަށުން ބޭރުގައި ލަނޑެއް ޖެހިފައިވަނީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ.

މެޗުގައި އެޓަލާންޓާގެ ފަހު ލަނޑު އެ ޓީމަށް ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ރެޓެގޫއެވެ. މިއީ އޭނާ މި ސީޒަންގައި ލީގުގައި ކާމިޔާބުކުރި 11 ވަނަ ލަނޑެވެ. މެޗުގައި ނަޕޯލީން ރަނގަޅު ކުޅުމެއްދެއްކި ނަމަވެސް، ލިބުނު ފުރުސަތު ބޭނުން ހިފުނު ތަނެއް ފެނިގެނެއް ނުދިޔައެވެ. ނަތީޖާއަކަށް ވެގެންދިޔައީ ލީގުގެ ފުރަތަމަ މެޗަށް ފަހު، ފުރަތަމަ ފަހަރަށް ނަޕޯލީ ބަލިވުމެވެ.

މެޗުން ލިބުނު ތިން ޕޮއިންޓާ އެކު އެޓަލާންޓާ މިހާރުވަނީ ވަގުތީ ގޮތުން ތާވަލުގެ ދެވަނައަށް ކުރިއަށް ޖެހިލާފައެވެ. އެއީ، 11 މެޗުން ލިބިފައިވާ 22 ޕޮއިންޓާ އެކުއެވެ. މެޗުން ބަލިވުމުން ނަޕޯލީއަށް ތާވަލުގެ އެއްވަނައިގައި ލީޑު ފުޅާކުރުމަށް ލިބިގެންދިޔަ ފުރުސަތު ވަނީ ގެއްލިގެން ގޮސްފައެވެ. މިހާރު އެ ޓީމު އެއްވަނައިގައި އޮތީ 25 ޕޮއިންޓާ އެކުއެެވެ.

މި ހަފްތާގައި އެންމެ ފަހުގެ ޗެމްޕިއަން އިންޓާ މިލާން ކުޅޭ މެޗު، އެ ޓީމު ކާމިޔާބުކޮށްފިނަމަ ނަޕޯލީގެ ލީޑު އެއް ޕޮއިންޓަށް ކުޑަވެގެންދާނެއެވެ.

މުބާރާތުގައި ފިއޮރެންޓީނާއާއި ޓޮރީނޯ ބައްދަލުކުރި މެޗު ރަށުން ބޭރުގައި 1-0 އިން ކާމިޔާބުކޮށް ފިއޮރެންޓީނާ މިހާރުވަނީ ތާވަލުގެ ތިންވަނައަށް ކުރިއަށް ޖެހިލާފައެވެ. މެޗުގައި ފިއޮރެންޓީނާގެ ހަމައެކަނި ލަނޑު މެޗުގެ 41 ވަނަ މިނެޓުގައި ކާމިޔާބުކޮށްދިނީ މޮއިސް ކިއާންއެވެ. މި ކާމިޔާބީއާ އެކު ފިއޮރެންޓީނާއަށް ވެސް ވަނީ 22 ޕޮއިންޓް ލިބިފައެވެ. އަދި، ޓޮރީނޯ އުޅެނީ 14 ޕޮއިންޓާ އެކު ތާވަލުގެ 10 ވަނައިގައެވެ.