މަޖީދީ މަގުގައި ހުރި ފޯނު ފިހާރައެއް ތަޅާލައި ރޭ ފަތިހު ވައްކަންކޮށްފިއެވެ.
ފުލުހުން މިއަދު މީޑިއާތަކާ ހިއްސާކުރި މެސެޖެއްގައި ބުނީ، މަޖީދީ މަގުގައި ހުރި "ޒިއޯން މޯބައިލްސް 4" ފިހާރައިގެ ބިއްލޫރިގަނޑު ތަޅާލައި އެ ފިހާރައިން ވައްކަންކޮށްފައިވާ ކަމަށް މިއަދުގެ 5:35 ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.
ނަމަވެސް، މި މައްސަލައާ ގުޅިގެން މިހާތަނަށް އަދި މީހަކު ހައްޔަރުކޮށްފައިނުވާ ކަމަށް ފުލުހުން ވަނީ ބުނެފައެވެ.
މީސްމީޑިއާގައި ދައުރުވަމުން އަންނަ ވީޑިއޯތަކުން ފެންނަ ގޮތުގައި މަގުމަތިން ހިނގާފައި ދިޔަ މީހަކު ފުރަތަމަ އެ ފިހާރައިގެ ބިއްލޫރިގަނޑު ތަޅައިލަނީއެވެ. އޭގެ ފަހުން އިތުރު މީހަކު އައިސް، ފިހާރައިން ވައްކަން ކުރާ މަންޒަރު ފެންނަ ސީސީޓީވީ ފުޓޭޖުތަކެއް އަންނަނީ ދައުރުވަމުންނެވެ.
ފިހާރައަށް ވަން މީހާ އެ ތަނުގެ ވަތްގަނޑުތައް ހަލާކުކޮށްލައި، ކޮތަޅުކޮތަޅުގައި އެއްޗެހިތަކެއް ހިފައިގެން ނުކުންނަތަން ވެސް ވީޑިއޯއިން ފެނެއެވެ. އެ މީހާ ހުރީ މޫނު ނިވާކޮށްގެންނެއް ވެސް ނޫނެވެ.
ފުލުހުން އަންނަނީ މި މައްސަލަ ތަހުގީގުކުރަމުންނެވެ.
ވައްކަމުގެ މައްސަލަތައް ދޭތެރެއަކުން ހިނގާއިރު، އިއްޔެ ވެސް ވަނީ އޯޝެން ނީޓިކަލްސް ޕްރައިވެޓް ލިމިޓެޑުން 67 ކާޓަން ސިނގިރޭޓު ވަގަށް ނެގި މީހަކު ހައްޔަރުކޮށް، އޭނާ ފަސް ދުވަހުގެ މުއްދަތަށް ބަންދުކޮށްފައެވެ. އެ މައްސަލައިގައި ހައްޔަރުކޮށްފައި ވަނީ ށ. ފޭދޫ ހިރުނދުމާގޭ، އުމުރުން 24 އަހަރުގެ އަޙްމަދު ލުޖައިންއެވެ.
ފުލުހުން ގެންދަނީ މި މައްސަލަ ވެސް ތަހުގީގުކުރަމުންނެވެ.