މި ސަރުކާރުގެ ފުރަތަމަ އަހަރުގައި ވެސް ދިވެހި އަސްކަރިއްޔާ ތަރައްގީ ކުރުމުގައި ނަތީޖާ ދައްކައިފި ކަމަށް ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީ މިއަދު ވިދާޅުވެއްޖެއެވެ.
ހިލްމީ މިފަދައިން ވިދާޅުވީ ނަސްރުގެ ދުވަހުގެ މުނާސަބަތުގައި ދިވެހި އަސްކަރިއްޔާއިން ޖުމްހޫރީ މައިދާނުގައި ބޭއްވި ހަރަކާތުގެ ތެރެއިން ވާހަކަދައްކަވަމުންނެވެ.
ރައީސް ޑރ. މުޙައްމަދު މުއިއްޒު ޝަރަފުވެރިކޮށްދެއްވި އެެ ރަސްމިއްޔާތުގައި ވާހަކަދައްކަވަމުން ހިލްމީ ވިދާޅުވީ މިދައު އެންމެ އުފާވާ ކަމަކީ ސިފައިންގެ އެންމެ މަތީ ވެރިޔާއަކީ މި ގައުމުދެކެ ލޯބިވެވަޑައިގަންނަވާ، ގައުމުގެ މިނިވަންކަން ދިފާއުކުރުމަށް އަސްކަރިއްޔާ އިތުރު ހަރުފަތަކަށް ގެންދަން ބޭނުންވެވަޑައިގަންނަވާ ބޭފުޅަކަށް ވުން ކަމަށެވެ. އަދި މި ސަރުކާރުކާރުގެ ފުރަތަމަ އަހަރުގައި ވެސް އަސްކަރިއްޔާ ތަރައްގީކުރުމުގައި ނަތީޖާތަކެއް ހާސިލް ކޮށްދެއްވާފައިވާ ކަމަށް އޭނާ ވިދާޅުވިއެވެ.
"ނަސްރުގެ ދުވަސް މީގެ ކުރީން ފާހަގަކުރަމުން އައީ ހަމައެކަނި ސިފައިންގެ ލެވެލްގައި. އެދުވަހަށް ދޭންޖެހޭ ސަމާލުކަން އެންމެ ރަނަގަޅަށް އެންމެ އެދެވޭ ގޮތަށް ނުދެވި. އެހެންކަމުން މި ސަރުކާރުން ނިންމާފައިވަނީ ނަސްރުގެ ދުވަސް ވީހާވެސް ކުލަގަދަ ގޮތެއްގައި ފާހަގަކުރުމަށް،" ހިލްމީ ވިދާޅުވިއެވެ.
ހިލްމީ ވިދާޅުވީ، ނޮވެމްވަރު 3، 1988ގައި ޝަހީދު ހުސައިން އާދަމް ދެއްކެވި ހިތްވަރަކީ ގައުމު ދިފާއުކުރުމުގައި މިއަދު ކޮންމެ ސިފައިންގެ މީހަކު ވެސް ދައްކަން ބޭނުންވާ ހިތްވަރެއްގެ ގޮތުގައި އަޒުމު ކަނޑައަޅަން ޖެހޭ ކަމަށެވެ. އަދި ދިވެހި އަސްކަރިއްޔާ އޮތީ ގައުމުގެ ދިފާއުގައި ސާބިތުވެ ކަމަށާއި ދިވެހި ސިފައިން ތިބީ އެ މީހުން ކޮށްފައިވާ ހުވަޔާ އެއްގޮތަށް ކަމުގެ ޔަގީންކަން އޭނާ ދެއްވިއެވެ.
ހަމައެއާއެކު، ދިވެހިރާއްޖޭގެ މިނިވަންކަން ދިފާއުކުރުމުގައި ދިވެހި ސިފައިން ތިބީ ފުރާނައިން ވެސް ގުރުބާންވުމަށް ތައްޔާރަށް ކަމަށާއި އެކަމުގެ ޔަގީންކަން ދިވެހި ރައްޔިތުން ދޭން ބޭނުންވާ ކަމަށް ހިލްމީ ވިދާޅުވިއެވެ.
މިއަދު ނަސްރުގެ ދުވަސް ފާހަގަކުރުމަށް ގިނަ ހަރަކާތްތަކެއް ރާވާފައިވެއެވެ. އެގޮތުން ތިނެެއް ނޮވެމްބަރުގެ ހަމަލާއާ ގުޅޭ ތަކެތި ދައްކުވައިދޭ މައުރަޒެއް މިއަދު ނެޝަނަލް އާޓް ގެލެރީގައި ހުޅުވައިފައިވެއެވެ.
އަންނަ ހޮނިހިރު ދުވަހާ ހަމައަށް އޮންނަ އެ މައުރަޒު ކޮންމެ ދުވަހެއްގެ ހެނދުނު 9:00އިން 12:00އަށް، މެންދުރު ފަހު 2:00އިން 6:00އަށް އަދި ރޭގަނޑު 8:00އިން 10:00އަށް ހުޅުވައިފައި ހުންނާނެއެވެ.
ނަސްރުގެ ދުވަހުގެ ރަސްމީ ޖަލްސާ މިރޭ ދަރުބާރުގޭގައި އޮންނާނެއެވެ.