ލޯންސް ބަލިކޮށް، ޕީއެސްޖީން ލީޑު ފުޅާކޮށްފި

ފްރެންޗް ލީގު އާންގައި އެންމެ ފަހުގެ ޗެމްޕިއަން ޕެރިސް ސެއިންޓް ޖާމެއިން (ޕީއެސްޖީ)އިން ލޯންސް ބަލިކޮށް، އެއްވަނައިގައި ލީޑު ފުޅާކޮށްފިއެވެ.

ޕީއެސްޖީގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 1-0 އިންނެވެ.

ހަތަރުވަނަ މިނެޓުގައި މެޗުގެ ހަމައެކަނި ލަނޑު ޕީއެސްޖީއަށް ކާމިޔާބުކޮށްދިނީ އުސްމާން ޑެންބެލޭއެވެ. މި ލަނޑާ އެކު އިތުރު ލަނޑެއް މެޗުގައި ފެނިގެން ނުދިޔަ ނަމަވެސް ލަނޑު ޖަހާނެ ފުރުސަތު ދެ ޓީމަށް ވެސް ލިބިގެންދިޔައެވެ.

މެޗުގެ 59 ވަނަ މިނެޓުގައި ލޯންސްގެ އަބްދުލްކޯދިރު ހުސަނޯވްއަށް ރަތް ކާޑު ދެއްކުމާ ގުޅިގެން މެޗުގެ ބާކީބައި އެ ޓީމުން ކުޅެފައިވަނީ އެއް ކުޅުންތެރިއެއް މަދުކޮށެވެ.

މި ކާމިޔާބީއާ އެކު ޕީއެސްޖީން މިހާރުވަނީ ކުޅުނު 10 މެޗުން 26 ޕޮއިންޓް ހޯދައި، ތާވަލުގެ އެއްވަނައިގައި ހަ ޕޮއިންޓްގެ ލީޑެއް ނަގައިފައެވެ. މީގެ އެންމެ ބޮޑު އެއް ސަބަބަކަށް ވެގެންދިޔައީ ދެވަނައިގައި އޮތް އޭއެސް މޮނާކޯ އަމިއްލަ ދަނޑުގައި އެންޖާސް އަތުން 1-0 އިން ބަލިވިއިރު ތިންވަނައިގައި އޮތް ލީލް ވެސް އޮލިމްޕިކް ލިއޯން އަތުން 1-1 އިން އެއްވަރުވުމެވެ.

މޮނާކޯއަށް 20 ޕޮއިންޓް ލިބުންއިރު ލީލަށް ލިބުނީ 18 ޕޮއިންޓްގައެވެ.

ނަމަވެސް، މިރޭ އޮލިމްޕިކް މާސޭއާއި ނޯންޓްސް ބައްދަލުކުރާ މެޗު މާސޭއަށް ކާމިޔާބުކުރެވިއްޖެ ނަމަ އެ ޓީމު ތާވަލުގެ ދެވަނައަށް އެރުމުގެ ފުރުސަތު ލިބިގެންދާނެއެވެ. ޕީއެސްޖީ މެޗުން ބަލިވުމުން ލޯންސް މިހާރު އޮތީ 14 ޕޮއިންޓާ އެކު ތާވަލުގެ އަށްވަނައިގައެވެ.