ބޮލީވުޑްގެ ކިންގް ޚާންގެ ލަގަބު ހޯދާފައިވާ އެކްޓަރު ޝާހްރުކް ޚާން ބޮޑުވަމުން އައި ދުވަސްވަރު ދިރިއުޅުމުގައި ވަރަށް ގިނަ ގޮންޖެހުންތަކާ ކުރިމަތިވި ކަމަށް ބުނެ، އޭރު ކުރެވެނު ތަޖުރިބާތައް ނޫސްވެރިންނާ ހިއްސާކޮށްފިއެވެ.
ދާދި ފަހުން ދުބާއީގައި ބޭއްވި ވޯލްޑް ގަވަމެންޓް ސަމިޓްގައި ބައިވެރިވުމަށްފަހު ނޫސްވެރިޔާ ރިޗާޑް ކުއެސްޓް ކުރި ބައެއް ސުވާލުތަކަށް ޖަވާބުދެމުން ޝާހު ބުނީ، ވަރަށް ކުޑައިރު މައިންބަފައިން ދުނިޔެ ދޫކުރުމާ ގުޅިގެން ޔަތީމު ކުއްޖަކަށްވި ކަމަށެވެ.
މައިންބަފައިން ދުނިޔެ ދޫކުރުމާ ގުޅިގެން ހުރި ހަމައެކަނި ދައްތަ ބެލުމުގެ ޒިންމާއާ އެކު އާއިލާގެ ޒިންމާ އެކްޓަރަށް ނަގަން ޖެހުނު ކަމަށާއި އަމިއްލަ ދިރިއުޅުން ބިނާކުރުމަށް ވަރަށް ޅަ އުމުރުގައި ބުރަ މަސައްކަތްތަކެއް ކުރި ކަމަށް ޝާހު ވަނީ ބުނެފައެވެ.
މި ސަމިޓުގައި ޝާހު ބުނީ، ފިލްމީ ކެރިއަރުގައި މިހާތަނަށް އެންމެ ދިގު މުއްދަތަކަށް ބްރޭކެއް ނެގީ ވޭތުވެދިޔަ ފަސް އަހަރު ކަމަށާއި އޭގެ އެންމެ ބޮޑު ސަބަބަކީ ޝާހުގެ ފިލްމުތައް ފްލޮޕްވުން ކަމަށެވެ. ނަމަވެސް, އެ ފަސް އަހަރުގެ ބޭނުން ރަނގަޅު ގޮތުގައި ހިފުމަށް ކުރި ކަމަކީ ޕިއްޒާ ތައްޔާރުކުރާނެ ގޮތް ދަސްކުރުން ކަމަށް ޝާހު ވަނީ ބުނެފައެވެ.
ޝާހު ގަބޫލުކުރާގޮތުގައި ދުނިޔޭގައި މިހާރު ހުރި އެންމެ މޮޅަށް ޕިއްޒާ ތައްޔާރުކުރަން ދަންނަ މީހުންގެ ތެރޭ ޝާހު ހިމެނޭނެ ކަމަށް ވަނީ ބުނެފައެވެ. މި މަސައްކަތް ދަސްކުރުމަށް އަމިއްލަ ކުޑަ ބަދިގެއެއް ވެސް ގޭގައި ތައްޔާރުކުރި ކަމަށާއި ރީތިކޮށް ވަށްކޮށް އޮންނަ ޕިއްޒާއެއް ތައްޔާރުކޮށްލަން އެތައް މިލިއަން ހަތަރެސްކަން ޕިއްޒާ ތައްޔާރުކުރަން ޖެހުނު ކަމަށް ކުޅަދާނަ އެކްޓަރު ވަނީ ބުނެފައެވެ.
މިދިޔަ އަހަރު ބޮޑު ކާމިޔާބީއެއް ހޯދި ފިލްމު "ޕަތާން"ގެ އެކްޓަރު ހުވަފެނަކީ ބައިނަލްއަޤުވާމީ ދުނިޔޭގެ ފެންވަރުގައި އެއްވެސް ބަޔަކަށް ސުވާލު އުފައްދާނުލެވޭހާ މޮޅު ފިލްމުތައް އުފެއްދުން ކަމަށާއި ކޮންމެ ވެސް ދުވަހަކުން އެކަން ކާމިޔާބުކުރާނެ ކަމަށް ޝާހު ވަނީ ބުނެފައެވެ.
އެންމެ ފަހުން ފިލްމު "ދުންކީ"އިން ބެލުންތެރިންނަށް ފެނުނު އެކްޓަރު އަންނަނީ ދަރިފުޅު ސުހާނާ ޚާންގެ ފުރަތަމަ ބޮޑު ސްކްރީން ފިލްމުގެ މަސައްކަތް ފެށުމަށް ތައްޔާރުވަމުންނެވެ. މި ފިލްމުގެ ވަރަށް ޚާއްސަ ރޯލަކުން ސުހާނާއާ އެކު ޝާހު ފެންނާނެއެވެ.