ޗައިނާގެ ރައީސް ޝީޖިން ޕިން ރާއްޖެ ވަޑައިގެންނެވި ތާރީޚީ ދަތުރުފުޅަށް 10 އަހަރު ފުރުން ފަހަގަކޮށްފިއެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ވެރިކަމުގައި 2014ވަނަ އަހަރު، ޗައިނާގެ އޭރުގެ އަދި މިހާރުގެ ވެސް ރައީސް ޝީ ކުރެއްވި ދަތުރުފުޅަކީ އެ ގައުމުގެ އެންމެ އިސް ވެރިއަކު ރާއްޖެއަށް ކުރެއްވި ފުރަތަމަ ރަސްމީ ދަތުރުފުޅެވެ.
އެ ކަން ފާހަގަކުރުމަށާއި، އޭގެ ފަހުން ދެ ގައުމުގެ ގުޅުން ބަދަހިވެފައިވާ މިންވަރު ފާހަގަކުރުމުގެ ގޮތުން ބޭއްވި ޚާއްސަ ހަފްލާއެއްގައި ވާހަކަދައްކަވަމުން ޗައިނާއިން ރާއްޖެއަށް ކަނޑައަޅުއްވައިފައި ހުންނަވާ ސަފީރު ވަންގް ލިޒިން ވިދާޅުވީ، ފާއިތުވި 10 އަހަރުގެ ތެރޭ ދެ ގައުމުގެ މެދުގައި އޮތް އިތުބާރު ވަރުގަދަވެ އިތުރުވަމުން އަންނަ ކަމަށެވެ. އަދި މި ގުޅުުމުން ދެ ގައުމުގެ ރައްޔިތުންނަށް ވެސް ފައިދާވަމުން އަންނަކަމަށެވެ.
ސަފީރު ވިދާޅުވީ ރާއްޖެއާއި ޗައިނާގެ ގުޅުމުގެ މުސްތަގްބަލު ރަމްޒުކޮށްދެނީ ދެމެހެއްޓެނި ތަރައްގީއިން ކަމަށެވެ.
މީގެ އިތުރުން ސަފީރު ވިދާޅުވި ގޮތުގައި ދެ ގައުމުގެ ދެމެދު ގާއިމުކުރެވިފައިވާ ވަރުގަދަ ސިޔާސީ ގުޅުމާއި އިތުބާރަކީ ވެސް ގުޅުން ބަދަހިވުމުގެ ސަބަބެއްކަމަށެވެ. އަދި އެ ގައުމުގެ ބެލްޓް އެންޑް ރޯޑް އިނީޝިއޭޓިވަކީ ވެސް ގުޅުން ބަދަހިކޮށް ދެމިއޮތުމުގެ ސަބަބެއްގެ ގޮތުގައި ފާހަގަކުރެއްވިއެވެ.
ޗައިނާގެ ރައީސް ޝީޖިން ޕިން ރާއްޖެ ވަޑައިގެންނެވި ތާރީޚީ ދަތުރުފުޅަށް 10 އަހަރު ފުރުން ފަހަގަ ޗައިނާއިން ބޭއްވި ހަފްލާ ތެރެއިން --
ސަފީރު ވިދާޅުވީ ޗައިނާއިން އޮތީ، ދެ ގައުމުގެ ވެރީންގެ މެދުގައި މަޝްވަރާކުރެވި އެއްބަސްވެވިފައިވާ ގޮތުގެ މަތީން ރާއްޖެއާއެކު މަސައްކަތްކުރުމަށް ތައްޔާރަށް ކަމަށެވެ. އަދި އެއް މުސްތަގްބަލެއް ހިއްސާކުރާ ބައެއްގެ ގޮތުގައި، ސިޔާސީ ގޮތުންނާއި އެހެނިހެން ދާއިރާތަކުން އިތުރަށް ގުޅުން ބަދަހިކުރުމަށް ވެސް ތައްޔާރުކަމަށް ފާހަގަކުރެއްވިއެވެ.
އެ ބައްދަލުވުމުގައި ސަރުކާރު ހިންގާ ޕީއެންސީގެ ބައެއް މަޖިލިސް މެމްބަރުންނާއި ބައެއް ވުޒާރާތަކުގެ އިސް ވެރިން ވެސް ބައިވެރިވަޑައިގެންފައިވެއެވެ. އެ ބޭފުޅުން ވެސް ވަނީ ހަފްލާގައި ވާހަކަދައްކަވައިފައެވެ.
އެގޮތުން 2014ވަނަ އަހަރު ޝީ ކުރެއްވި ދަތުރުފުޅުގެ ތެރެެއިން ރާއްޖެއަށް އުމްރާނީ ތަރައްގީގެ ރޮނގުން ފަހިވި ބޮޑެތި ފުރުސަތުތަކުގެ ވާހަކައަށް އަލިއަޅުއްވައިލައްވައިފައިވެއެވެ. އެގޮތުން ސިނަމާލެ ބްރިޖާއި އެ ނޫން ވެސް މަޝްރޫއުތަކުން ދިވެހީންގެ ދިރިއުޅުމަށް ހެޔޮ ބަދަލުތަކެއް އައިސްފައިވާކަން އެ ބޭފުޅުންގެ ވާހަކަތަކުގައި ވަނީ ފާހަގަކޮށްފައެވެ.
ޗައިނާއާއި ރާއްޖޭގެ ގުޅުން ބަދަހިއިރު، ރައީސް ޑރ. މުޙައްމަދު މުއިއްޒުގެ ދެކަނބަލުން ވެސް ވަނީ މި އަހަރުތެރޭ ޗައިނާއަށް ފުރަމާނަ ދަތުރުފުޅެއްގައި ވަޑައިގެންފައެވެ.