ވައިގެ މަގުން ރާއްޖެ އެތެރެ ކުރަން އުޅުނު 3.3 މިލިއަން ރުފިޔާގެ މަސްތުވާތަކެތި ހިފަހައްޓައި، އެ މައްސަލައިގައި މީހަކު ހައްޔަރު ކޮށްފިއެވެ.
ކަސްޓަމްސްއިން ބުނީ މި މައްސަލައިގައި ހިމެނޭ 45 އަހަރުގެ ދިވެހި ފިރިހެނަކު ފުލުހުންނާ ހަވާލުކޮށްފައިވާ ކަމަށެވެ.
އެ ތަކެތި އަތުލައިގަނެފައިވަނީ ރާއްޖެ ގެނެސްފައިވާ އެއާފްރައިޓް ޝިޕްމަންޓެއް ތެރެއިންނެވެ. އެ ފެނުނީ ބަލައިފާސްކުރުމުގެ ތެރޭގައި ޝައްކު ކުރެވޭ ޒާތުގެ ބާވަތްތަކެއް ހުރުމުން، އިތުރަށް ބަލާ ފާސްކުރުމުގެ ތެރޭގައި ކަމަށް ކަސްޓަމްސްއިން ވަނީ ބުނެފައެވެ.
އެ އިދާރާއިން ބުނީ އެއީ މިދިޔަ ބުރާސްފަތި ދުވަހު ބެންކޮކުން ރާއްޖެ ގެނެސްފައިވާ އެއާފްރައިޓް ޝިޕްމަންޓެއް ކަމަށެވެ. އޭގައި މަސްތުވާތަކެތިކަމަށް ޝައްކު ކުރެވޭ ބާވަތުގެ އެއްޗެހި ހުރުމުން، ފުރަތަމަ މަރުހަލާގައި މިތަކެތި ތަހުލީލުކުރިއިރު، މަސްތުވާތަކެތީގެ ތަފާތު ދެ ބާވަތެއް ކަމަށްވާ ކެތިނޯން އަދި ކެނެބިސްއަށް ޕޮޒިޓިވްވެފައިވާ ކަމަށް ކަސްޓަމްސްއިން ބުންޏެވެ.
އެއީ 5.5 ކިލޯގެ ކެނެބިސްއާއި 416 ގްރާމްގެ ކެތިނޯންއެވެ.
ބަރުދަން ޖުމްލަ 5.9 ކިލޯއަށް އަރާ މިތަކެތީގެ މަގުމަތީ އަގަކީ 3,348,000.00 ދިވެހި ރުފިޔާކަމަށް ކަސްޓަމްސްއިން ލަފާ ކުރެއެެވެ.
ވަގަށް ވައިގެ މަގުންނާއި ކާގޯ މެދުވެރިކޮށް މަސްތުވާތަކެތި އެތެރެކުރަން އުޅުމުގެ މައްސަލަތައް މިފަހުން ވަނީ އިތުރުވެފައެވެ.